大饼、油条豆腐浆
沪语朗读：石铮铮
朗读者
大饼、油条豆腐浆
作者:石铮铮
朗读:石铮铮
文字修正:丁迪蒙
大饼、油条豆腐浆拨阿拉搿一代人留下了深刻个印象。因为，老底子阿拉搿代人个早饭一般侪吃泡饭个，弄点咸菜过过泡饭。
假使讲，啥人家屋里早浪向勿吃泡饭，吃大饼、油条豆腐浆了，乃未，搿家人家绝对算改善生活了。小辰光阿拉屋里向搿条弄堂出来穿过马路，对过就有一爿大饼、油条豆腐浆店，搿爿店个门面勿大，但生意邪气好，每日天早浪向来此地买大饼、油条豆腐浆个人老多个。我路过搿爿店，常常看到来买大饼油条豆腐浆个人要排队个。一阵风吹过来，我就会闻到大饼勒勒炉子里向烤，散发出来个葱油香味道，听到油条勒勒镬子里煎发出噼噼啪啪个声音，搿个香味搭仔声响邪气诱惑人，让人垂涎三尺。
我记忆中，伊个辰光大饼3分一只，油条4分一根，豆腐浆分甜浆、淡浆搭仔咸浆。咸浆里向要放点油条搭仔葱、再洒点酱油。咸浆里向物事多，所以价佃稍微大一眼。伊个辰光要是啥人早浪向，弄一付大饼油条，再配一碗咸浆吃吃，搿是呒没咸话讲了，咾开心个。
吃饱肚皮，精神一天，去上班个人就有力气了。老早阿拉屋里每天早浪向是外婆帮阿拉烧泡饭个，阿拉早饭侪吃泡饭，要是泡饭勿够吃了，外婆就会得去买两根油条拨我搭仔阿弟吃吃。文革期间，外婆搭我父母亲统统拨打倒了，一夜之间伊拉变成了“黑六类”，为了划清界线，吓得来沪探亲个舅舅勿敢到屋里向来看外婆搭仔姆妈，姆妈搭仔舅舅相约了曹家渡新康里旁边个一爿大饼、油条豆腐浆店见面。见面搿天是冬天，天老冷个。姆妈搀牢我来到搿爿店，买了三碗豆腐浆，每个人一碗。我手冻僵脱了，呒没捧牢碗，豆腐浆翻了我身浪向，我吓得两只眼晴拨瞪拨瞪看牢仔姆妈，只看到姆妈从自家衣裳袋袋里向拿出绢头帮我揩脱溅了身浪向个豆腐浆，轻声个搭我讲:“侬要当心点个呀”，回头拿自家搿一碗豆腐浆送到了我个手浪向，搭我讲:”侬两只手端端牢哦”，我点点头，双手紧紧捧牢仔碗，嘴巴慢慢叫靠近，吃了一口豆腐浆，热乎乎个豆腐浆顺牢我喉咙口滑到胃里向，邪气暖热个感觉传遍了全身。我只晓得吃豆腐浆，姆妈搭舅舅讲了点啥，我就勿晓得了。伊个辰光我还小，搞勿清“黑六类”是啥意思，但我心里向晓得，姆妈是我最亲个人，伊是好人，伊最爱我，有好吃个物事伊勿吃拨我吃，我爱我个姆妈。
50多年过去了，姆妈老早就离开我了，伊个大饼、油条、豆腐浆店也老早就关脱勒了，物去人非，但是，搿点事体搭仔人我永远勿会得忘记脱个。
点以下文字即可听到精彩回放：
图片来自网络