上海人的称谓密码 / 四六文摘

沪语朗读：何秀萍

朗读者

上海人的称谓密码

作者：李大伟

来源：夜光杯

改编：郭莉

朗读：何秀萍

推荐：丁迪蒙

过去个上海，也就是工厂个上海。路浪向碰着，问个路、借个火，举手打招呼：“师傅……”迭个是尊称，是卷首语。师傅是传授吃饭家生个，是可以养家活口个。上海人信奉“荒年饿勿死烧饭个”，手艺比文凭金贵，师傅比老师吃香。技工凭手艺吃饭，是铁饭碗。有眼人一旦退休，“黄老”就变成“老黄”。黄老是尊称，老黄是俗称，而“老师傅”个老，勿是老黄个老，老朽个老，而是老头子个老。老头子勒嘞场面浪，是可以摆言话的。摆言话，就是一锤定音；又叫“一句言话”。老师傅敢跟老板光火：“我讲勿来事就是勿来事！”调成别人，敢伐？

改革开放以后，上海从工业中心升华到金融中心，传统制造业慢慢叫淡出去了，车钳刨好像也勿需要了，老师傅，自然也勿吃香了。社会浪向个称呼跟勒海勿知勿觉迓迓叫改变了。上海人相互之间个招呼，调成了“朋友”。“朋友”两个字，像一碗水个平面，呒没啥高低。朋友之间，香烟是可以勿论好坏个，侬敬我，我敬侬，有来有去。“朋友朋友，碰碰揩油”，搿个尽管是一句寻开心言话，但是透露出来个，是相互平等个潜台词。

上一世纪个上海人，看见熟人，勿分地位高低，拍拍肩胛，平等意识还呒没变。后来，好像复古了，赛过回到旧时代，男人是称兄道弟，女人是姐妹相称，不过迭个称呼里向倒仍旧暗藏一眼上海人亲、疏、远、近个密码：老伯伯是辈分尊称，大伯伯再是血缘敬称；阿哥是辈分，大阿哥是骨肉；老阿姐是客气，大阿姐再是屋里向排行。凡是称呼里向带了大小数码个，侪是血缘性个称呼。迭个，好算是上海人个称呼密码。

假使称呼女性为小姐，侬自然勿是熟人，肯定勿是上海人，也勿是外地人，是啥呢？书踱头！“小姐”两个字，过去是尊称、嫩称，现在变成了一个充满歧义个称呼。葛末哪能去称呼呢？女性之间要叫阿姐阿妹；男女之间，齐巧又是同样姓数，葛末上海人个老法称呼：“本家妹妹”，亲切得让侬推也推勿开。

倘使喊侬“先生”，葛末侬一定就是陌生人，隔得老远，好远到天涯海角。上海人待侬一客气，实质浪向就生分了，就有距离了，就有戒心了，就只好讲讲客气言话：“今朝天气？哈哈哈……”上海人叫“假客气”。既然假字开头，自然也就没实话了。譬如早见面，“吃了伐？”即使侬没吃过，也要讲：“吃过了。”实话实讲回答“还没吃”，搿就是“勿客气”了，是打算要对方请侬吃早饭了。计划经济时代，就像一句电影台词，叫“地主屋里向也呒没余粮呀”，侬个实话回答会得让问个人下勿来台阶，因为彼此还没亲密到随便请客吃饭个程度，伊勿可能请你到屋里向吃饭。迭个就叫“勿会聊天”，上海人叫做“勿会嘎山湖”，一句言话就噎煞了对方。上海人也讲搿能叫：“将军”！所以要客来客气，没吃过讲“吃过了”，是假话，假话就是客气言话，客气就是假客气，就是会讲言话，是文明人必须犯个“美丽的错误”。礼貌搭仔虚伪，就是硬币个两面，相辅相成个。倘使是老朋友，一早路浪见面，拍拍肩胛：“走，陪我吃早茶去。”绝对勿会问：“吃了伐”？朋友之间讲客气言话，就是瞎讲。上海人有一句口头语：“瞎讲有啥讲头啦！”勿客气，再是真客气。边头人一听，就晓得迭个是一对宝货，就是侬吃过了也一定要跟伊去，否则就勿拨面子了。乃末舍命陪君子，绝对老朋友。

新世纪了，上海人见面个称呼又变了：拿侬个小名，再加上尊称，譬如，曾经个学生看见我，叫我“大伟老师”。小名是亲切，尊称是敬重，亲情有了，感觉也有了。你可以从中判断：伊一定是上海人家。迭个，也是上海人称呼个密码。

现在个上海，已经是中国化个上海，也沾了眼海外风气。上海个尊称发生裂变了，分叉了。大家见面侪称呼：老板！连象牙塔里个研究生，也叫自家导师为“老板”。因为导师手里捏牢侬个课题经费，跟老板一样，掐牢侬个生命线——生活费。还有眼老板看见当官个就低头哈腰，所以现在上海滩个酒水台面浪，有人开始见面就叫“领导”。不过，迭个是上海人个口气伐？从前辰光，上海人并没动勿动就拿“领导”挂勒勒嘴巴浪个！迭个也说明，上海人个称谓密码有仔新个变化了。