最美不过石腊红
沪语朗读：疯疯兔
最美不过石腊红
作者：金洪远
沪语改写：荣梅
指导推荐：丁迪蒙
屋里向窗门外头个花架浪有几盆石腊红，心形个叶片碧绿浓密，现在，刚好从绿叶当中伸出来一只只淡绿颜色个细细个长伞柄，高擎仔一只有十几朵、廿几朵小花个花球，有粉红个，有淡紫个，轧了一道勒尽情个开放。勿管是远望还是近观，我觉着用“适意”来形容是最最恰当个了。
搭交关勒海滨小城工作过个老同事一样，当年每家人家个阳台浪侪少勿了石腊红美丽个身影。原因邪气简单，伊是常开勿败个花。伊勿像一眼娇贵个花，要千呼万唤始出来，羞羞答答呒没几日，甚至于一个夜到就香消玉殒了，而让人叹息。伊是尽心尽力个拿自家囥了交关辰光个靓丽侪呈现出来。于是，伊眼鲜艳个红、洁白个雪、粉红个娇润搭仔淡紫个花球，勒春风个呼唤下头，刷刷齐个托勒海，装扮每家人家个阳台。最让人赞叹个是：伊个枝头总归是花色繁茂，搿一捧“绣球”还呒没谢幕，伊个一簇又探头探脑个勒浓绿个叶片当中了。于是就花团锦簇，春满枝头，让人情勿自禁想起古人咏唱个名句：红杏枝头春意闹。噢，勿是个！是石腊红花开真是适意呀！
石腊红又叫天竺葵，原产地是南非。伊个花语是：偶然个相遇，幸福就勒勒侬个身边。伊年，搭老友团勒拨驴友誉为“西班牙最美个纯白小镇”个米哈斯偶然碰到伊，只看见小镇居家纯白色个墙面浪，一只只高低错落个深蓝颜色个花盆，勒阳光个映射下头，一束束血血红个石腊红一记头就拉牢了一团游客个脚步。白墙、蓝盆、红花拿搿只小镇衬托得邪气漂亮、让人惊艳。假使我个屋里向有只小院子，我一定会得照此复制黏贴。
我欢喜种养花草，勒花草里向最欢喜个是石腊红。因为伊勿娇贵勿矫情，属于像我搿种懒人养个花。每日天看阳台浪一盆盆石腊红竞相开放，我个心情也会像伊眼开放个花一样。自作多情个我，只想对身边个亲朋好友讲一声：最美不过夕阳红，最美不过石腊红。
往期回顾：
图：网络 / 编辑：渺渺