想起当年高考
沪语朗读：高仁
朗读者
来源：新民晚报2019-12-22
作者：许德华
推荐：丁迪蒙
前几天看到2020年上海春季高考下月举行个新闻，忽然又想起当年参加高考个事体。碰巧老班长金同学也辣朋友圈里晒出了伊参加1979年高考个准考证，班级群一下子闹猛起来。
当时我是应届生，埃歇辰光考场离阿拉屋里比较远，交通呒没搿歇好，中浪向吃饭休息侪蛮伤脑筋。我阿姐就托单位同事个姆妈照顾我，伊拉住个石库门房子离考场比较近。我考进大学以后，就上门感谢过搿位老人，今朝想起来仍旧邪气开心。
萍和我一个寝室，伊比阿拉应届生大了好几岁。据伊讲，中学毕业以后就被分配到郊区种地，后来高考政策一出来，伊拉侪用足力气复习。到了考试搿天，伊要去个考场辣松江县城里，路程勿短，萍心思灵活，除脱文具还多带了一听奶粉，可以临时垫饥，后来果然派上用场。
金班长当时也是历届生，辣上海街道工厂上班。伊点赞萍：“还是侬想得周到。我上半天考好以后还要回到屋里自家弄中饭，吃好以后再去考场考试。三天侪是搿能奔波。”
讲到吃，应届生江枫印象特别深个是高考前头一天，阿爸特地关照姆妈，去菜场用肉票买一点肉改善一下伙食。
和江枫同龄个男生李明附和：“我上半天考好，中浪向就吃了一只一角洋钿个面包，再加一瓶一角三分个桔子水，待遇算是相当好了。而且，阿爸还专门为我准备了一盏八烛光个台灯，方便看书复习。”
萍讲每一个经历过当年高考个人侪有一段难忘个记忆：第一天考语文，进考场前伊到考场旁边个弄堂里寻公共厕所，一勿当心误入男厕，结果落荒而逃，直到坐进考场仍旧心里别别跳。第三天考政治，考场附近有一家工厂用高音喇叭放京剧《智取威虎山》，结果考场里个考生侪是一边哼曲子一边写考卷。
大家聊到搿搭，蓝同学也发言证明：伊记得高考第一天考语文，伊拉考场外面就有高音喇叭放印度电影《流浪者》插曲“拉兹之歌”，假使放到现在真是无法想象。金班长当过中学校长，伊讲现在高考侪是家长送考，还有警察叔叔维持秩序，甚至实行交通管制。萍同学讲，当年考试结束，伊坐长途车回到徐家汇汽车站已经夜里十点钟了，看到姆妈还坐辣车站里等伊，伊激动得眼泪水溚溚渧。
何同学当年也是应届生。记得高考第一天早浪，伊一早出门，呒没想到平常走个小路浪多了一条大沟，前一天夜里还落过雨。伊心想：我不相信搿条沟能拦牢我，我一定要跳过去!跳过沟，何同学心里对自家讲：高考也一定会成功！伊姆妈有块新个“钟山”牌手表拨儿子看考试时间。姆妈讲假使儿子考上大学，“钟山”牌就是奖励，反之手表还是要还拨姆妈。何同学全名何全胜，果然全胜，“钟山”牌一戴就是10年。
我也有块“孔雀”牌手表，当年阿姐省吃俭用，省下一点钞票拨我上大学。因为当时上海产个手表侪要凭票供应，所以就买了外地牌子。虽然现在手表指针不动了，但是姊妹情深一直埋辣我心里。
图片来自网络
上海言话叙身边事体
往期回顾：
“上海言话讲起来”旨在传播沪语，若有不当之处，敬请留言指正。
感谢您的支持转发，欢迎关注本公众号