爷佬佬
作者：周云海
沪语改写：荣梅
推荐、指导：丁迪蒙
五十几年前，我还是一个懵懂个少年。勒阿拉石库门二楼个前楼，住勒一个光浪头、人老长个邻居老头。从我开始记事个辰光，就晓得伊是勿上班个，倒是伊个老婆勒做工退休辰光，拨厂里敲锣打鼓个送回屋里，阿拉石库门个大门浪还贴有光荣退休个大红喜报。除脱倒垃圾、倒生活废水，伊勒屋里基本浪是勿做事体个，伊个袋袋里也呒没啥个钞票个，假使有得二分洋佃，伊就会得到门口头个烟纸店去买三支整包拆零卖个“勇士牌”香烟过过瘾头，偶尔也会得用三分零碎钿买两支“飞马牌”香烟，迭个对伊来讲就更加是快意享受了。阿拉石库门里向个大人侪称伊“方先生”，小囡勿管大小，侪喊伊“爷佬佬”。
“爷佬佬”个身材又长又阔，夏天着一件老里八早拨汏个褪脱了黑颜色衣漆、轻轻柔柔薄薄个香云纱衫，脚浪着仔一双圆口、船形、薄底、黑颜色个布鞋，勒阿拉石库门里向显得是鹤立鸡群。伊要七十岁快了，但手臂膀还是粗壮有力。伊坐勒嗨石库门个弄堂口，小小囡侪欢喜吊仔伊个手臂白相，几个小囡还会得合力一道试探“爷佬佬”个孔武臂力，搿就是我童年辰光再晓得个“吊膀子”。伊个辰光，勿行喊“先生”个，侪叫“同志”。“方先生”，也就是“爷佬佬”，其实是个有故事个人。听阿拉姆妈讲，伊老里八早是个“跑街先生”，只是阿拉小囡勿晓得，认为伊生来就是搿能介个一个“爷佬佬”。
大热天夜快辰光，太阳个光影漫过了西墙，老城厢蜿蜒狭长个弄堂里，有微风徐徐飘来。石库门里向闲散无事个邻居，常庄欢喜拿仔竹椅、矮凳，坐勒弄堂口乘风凉、嘎讪湖，等勒嗨吃夜饭。慢慢叫走进弄堂、又逐渐走出去个路人，有辰光也是邻居们嘎讪湖个话题。
伊个辰光个脚踏车，比现在个私家轿车还要吃价，阿拉石库门里向一共有13家人家，但摆勒底楼客堂间里个脚踏车，也就二三部。凡是弄堂里有人踏过去、或者推仔脚踏车穿过，一眼勒勒嘎讪湖、乘风凉个邻居，勿单单会得向踏脚踏车个人搭仔脚踏车行注目礼，而且还会得带眼点评搭仔发散个闲话。
有一天，一个人踏仔脚踏车，摁仔车子铃铛，叮叮当当个飞驶穿过阿拉个弄堂，引起邻居们个勿满。车子已经踏出去老远了，但点评还勒勒继续。热议中，“爷佬佬”勿由得也讲了一句有关脚踏车个闲话，邻居开乐哥哥就嘲笑伊，勿会得踏脚踏车个老头也跟牢仔大家瞎起哄。“爷佬佬”听了勿开心，马上讲：“啥人讲我踏勿来？我会得踏，好伐？”于是，开乐哥哥搭“爷佬佬”打赌：“假使侬能够踏仔脚踏车绕牢阿拉个果育堂街道、张家弄、薛弄底街兜一圈，我马上就买一包飞马牌香烟拨侬。”大家开心得唻拍手叫好，阿拉小囡也跟牢仔叫起来：“爷佬佬加油！”。大家晓得，伊个辰光会得踏脚踏车个人并勿多，何况是一个从来也呒没勒单位里向上过班、而且年龄要七十岁快个老头？
从客堂间里向借出了邻居王哥个28寸永久牌脚踏车，开乐哥哥拿车子交拨“爷佬佬”。只看见平常辰光勿大出远门个“爷佬佬”，双手轻扶车把，左脚踏仔踏脚板，右脚抬起，一个弧线翻身上了脚踏车。勿摁车铃，勿晃车身。风，拿“爷佬佬”身浪褪了黑漆色、薄薄个香云纱衫吹得微微鼓起来，身形高大个“爷佬佬”就好像骑勒马浪一样，左转弯，一记头就勿看见了身影；只一歇歇功夫，伊就从薛弄底街绕回果育堂街，勒阿拉34弄个弄堂口飘然而至，稳稳当当下了车子，笑眯眯个拿脚踏车还拨开乐哥哥，老少邻居侪啧啧称奇。当然，“爷佬佬”也开心个吃起来伊欢喜个飞马牌香烟。搿趟勿是吃两支，而是吃了整整一包飞马牌香烟。
作者
往期回顾：
图：网络 / 编辑：渺渺