名堂经
沪语朗读：杨露
朗读者
名堂经
作者：郑自华
来源：旅游时报2013年5月14日
沪语改写：丁迪蒙
诵读：杨露
前几日看文艺演出，听见几个演员用上海方言唱《沙家浜》当中个《智斗》。原来是胡传奎：“刁德一，搞的什么鬼花样？”结果拨唱成功：“刁德一，侬搞啥个名堂经？”于是呢，台下头哄堂大笑。
追溯来源，要回到古代辰光。
老底子，皇帝侪要修明堂个，因为明堂是当时帝王会见诸侯、接见长者个地方。唐朝武则天当权，相传有个大臣写了篇文章，以名堂个修法失传为由，反对武则天建“明堂”。武则天出于政治需要，力排众议，说勿必完全符合失传个明堂修法，只要华丽、宏伟就可以了。由于“明”搭仔“名”个读音相同，后首来，“明堂”慢慢叫就写成了“名堂”，“明堂经”也拨讲成是“名堂经”了。
后来个人拿稀奇古怪、别出心裁个物事称作为“搞啥个名堂”，武则天就勿知物觉个成为了搞“名堂”个祖先。
“名堂”，上海人又称伊为“花头”，“名堂”多末，就是“花头”多。“名堂经”，是“名堂”个升级版，上海人往往就拿“名堂经”叫做“花头经”了。
强强讨了个宁波姑娘做老婆。勒上海已经办过酒水了，但是丈母娘关照，一定要到宁波个老家，按照当地个风俗习惯再要举办一次婚礼。搿个一天，一长溜个车子专发宁波。强强晓得宁波人个家庭规矩比较大，“名堂经”蛮多个，因此呢，早就有得思想准备了。车子进了村，一路浪向勿停个有人“拦驾”，于是，就拿喜糖、喜烟打发搿眼“拦驾者”。好勿容易突破了重围，到了新娘子个屋里向，拨一批经验丰富个人“拦门”，进到闺房里去是没介便当个！喜糖、喜烟咾啥已经是没啥用场了，新郎大把大把个拿出红包来（红包里向个金额当然是意思意思个），搿个辰光新郎个嘴巴一定要甜，伴郎呢，要能说会道，许愿、保证、唱歌，有个还要做俯卧撑，客气了大概半个钟头伐，强强听讲，新娘个表姐夫整整花了2个钟头，再进到了闺房。勒繁琐个宁波婚礼以后，总算可以接新娘子回屋里了。但是啊，新娘子上车前头个规矩是更加大呀！搿就是第三道关：“拦人”。新娘子必须着自家个旧鞋子，到了车子浪坐定，伊再好换为婚礼准备个新鞋。上车个伊个一霎那，有无数个女宾会得提醒伊：屁股碰到了座位就勿好再移动。新娘子个身边一直会有傧相拎好一只手炉，里向表摆了香料，几乎整个村子侪好闻到搿种婚礼特有个香味道。
新娘子上车以后，伊个兄弟要用一支香烟的到手炉里向去取火，点着以后奔回去，插勒灶头浪向。据说，搿能一来，娘家个好运气就会得有一部分留下来，勿会让新娘侪带了跑。搿个还勿算，还有一只“喂上轿饭”个仪式，囡儿坐勒姆妈个脚馒头浪，让姆妈抱勒海，外婆喂饭，意思是勿忘记养育之恩，希望外婆搿能个长寿之人拨新娘子带来好运气。上轿饭有得三只碗：一只碗是红烧肉，一只碗是红烧鲫鱼，还有一碗饭，饭浪向有得花生搭仔红枣，外婆喂一口，讲一句祝福个吉利言话，新娘子呢，要每一种侪尝一口，表示以后生活富有，早生贵子。宁波个接新娘子之行，让强强几乎是虚脱了。
等到强强个婚假结束，发现自家供职个公司换老板了，要命个是，搿个新来个老板“名堂”也特别多。讲是金融危机，要从严治理公司，上班要打卡，假使早浪向直接外出，就必须打只电话到单位里来，平时勿好上搭工作无关个任何聊天工具，工作用个电脑勿好设置密码，老板随时可以检查。老板还经常安排双休日出差。强强晓得，“名堂精”一多末，就是“收骨头”个辰光开始了！
精彩回放：
起蓬头
宋词赏析 如梦令·常记溪亭日暮
少年游 柳永
拎只猪头好过年
同老相怜
青玉案·元夕
春节，上海人勿吃饺子吃年糕
归彼大荒（下）
归彼大荒（上）
图片来自网络