评弹票友写个淮海路（中）
沪语朗读：肖德生
评弹票友写个淮海路（中）
来源：网 络
改编：丁迪蒙
朗读：肖德生
经营意式西餐个天鹅阁勒淮海中路1074号，东湖路搭仔襄阳南路之间。勒上海做西餐个，有个叫馆，也有称社个；天鹅阁个全称是天鹅阁西菜社。勒必胜客没进中国以前，勒搿搭就可吃到5块一只个匹萨，还有味道纯正个意大利馅饼。阿拉除脱自家买搭仔搭同事带匹萨搭仔意大利馅饼，也坐到里向去吃；店堂勿大，搭红房子勒陕西南路个老店面积差勿多。
意大利菜以汤见长，面式繁多，到天鹅阁少勿了点汤搭仔面。汤要吃乡下浓汤搭仔牛尾汤，面要吃各式奶酪焗面（芝士面）。勒面里向，首选个是麦西尼鸡面。伊个材质是自制个蛋黄面，配上鸡肝、洋葱等等作料，再用鸡片、蘑菇搭仔奶酪咾啥拿面覆盖；然后摆到烤箱里去焗面。吃起来是美香勿粘。天鹅阁做菜个另一特点，是“焗”字当头，有奶酪焗鳜鱼、焗牛尾搭仔焗明虾咾啥。就讲奶酪焗鳜鱼，用新鲜鳜鱼辅以沙司搭仔奶酪生焗。鲜美滑嫩，别有风味。
天鹅阁勒上个世纪90年代消失，我还记得伊伊个辰光个电话号头：4374284。还有伊1958年为人民服务、每天晚到8到12点到淮海路摆摊卖西菜；供应面包、罗宋汤、炸猪排搭仔火腿蛋等十多个品种，价钿5分到三角半。
……当年，夹在金光钟表店和百花缝纫用品商店间的江夏，店铺勿大；但是“三鲜豆皮”个名气乓乓响。讲毛泽东吃过几趟，并且还有最高指示：你们为湖北创造了名小吃，人民感谢你们。
搿黄灿灿个 " 三鲜豆皮 " 像春卷，摆勒搪瓷盘子里向。搭春卷勿同个是两头勿封闭，馅头比春卷更加丰富，有猪肉、猪肚、猪心、猪舌头、鸡蛋、冬菇搭仔虾仁，再加上猪油拌炒个糯米饭菜。外头个豆皮是绿豆搭仔大米浸泡以后磨粉摊个饼，再铺上一层鸡蛋糊。一口下去，外头脆里向软，滋味鲜美。再配一碗八卦汤，“八卦”汤实际是龟肉汤。勿晓得搿个名字是否出自以龟壳卜卦之意，真个是碗有文化个汤。
淮海路餐饮业个规模搭仔数量，自然是勿能搭老黄浦相比。黄浦勒没没拿南市、卢湾并脱个辰光就有两家饮食公司。有意思个是，集体个是一饮，国营倒是二饮。勒做记者跑财贸个上世纪 80 年代，上海个特级厨师几乎侪勒南京路。俗话讲得好，各村自有各村个高招；老人和个糟钵头就是一列，举世无双。
我最初到老人和是勒八仙桥菜场对面个金陵中路79号。有个传说。当年勒金陵中路，住勒附近个海上名人黄金荣也常庄来吃饭。有一次，几个小流氓到店里吃白食捣蛋，正巧拨黄金荣碰着；吓得勿敢再来。1993年建金钟广场，四年以后搬到瑞金二路418号重新开门营业。搿已经是老人和馆有史以来个第三迁了。
创建于1800年（清嘉庆五年）个老人和，上海经营本帮菜个历史是最为悠久个。开创之地勒老城厢里馆驿街。抗战爆发，老人和先关门歇业，于1938年迁到法租界金陵中路（凯自迩路）。搿第一迁竟然牵涉到了店名。老人和馆原名人和馆，搬到金陵中路以后，九江路也冒出了一个人和馆。一场官司打下来，九江路伊家叫“新记人和馆”，金陵中路搿家改成“老人和馆”。
老人和最有名个就是糟货。品种邪气多，我觉着糟鸡、糟钵头搭仔糟溜鱼片是其中个佼佼者。店里向个糟鸡还可以连钵头外卖，22 块洋钿一只；吃光可以退回钵头，二元洋钿一只。曾经勒《明报》浪向读到，有位客人带了糟钵头乘机返回香港，香了一只机舱，钩出了一路浪个馋唠虫。
有眼外省人对糟货有眼茫然不解。看到商店广告：糟货上市。于是邪气很奇怪，为啥要宣传糟货而勿去宣传好货呢？而且，迭个糟货卖得比好货还要贵？
我拿老人和个糟货做法称作湿糟，伊是用糟卤浸制而成个。我更加欢喜家乡浙江嵊县个干糟做法，伊勿用糟卤浸，而是用酒糟包裹白斩鸡搭仔白切肉，鲜而清香浓郁。
点以下文字即有精彩回放：
评弹票友写个淮海路（上）
我听“无线电”
我是海洋
微信群和咖啡馆
我是土地
我是花
我是水
潘家姆妈
图片来自网络