讲讲“三棵树”（上）
沪语朗读：陆漫真
作者：李榕樟
沪语改写：边秦翌
诵读：陆漫真
我个名字里向有三种树，所以微信名就叫“三棵树”。黑龙江有个地名也叫“三棵树”，我个名字搭伊勿搭界个。我个名字搭老家温州有关，也搭部队有眼关系。
因为辰光忒长了,我已经勿大记得小辰光个事体了，只晓得阿拉屋里是勒温岭部队大院里向，砖木结构个房子，有长长个走廊，隔壁院子里有口井，好像还跟牢仔屋里人到伊面去打过水仗个。
我问姆妈小辰光个事体，姆妈讲，我出生个医院老底子是教会医院，规模勿小，后首来再改成工人保健院个。我个名字是为了纪念出生地温州，勒温州江心屿浪向有棵1300多岁个樟树，还有棵800多岁个榕树，樟抱榕而生，成为奇观，瓯剧《高机搭仔吴三春》也讲到搿只故事个。
温州人个商业嗅觉邪气灵敏，从南到北，从国内到国外，到处有伊拉个影子。上世纪八十年代还有讲温州人个段子——走遍千山万水，历尽千辛万苦，讲千言万语，想千方百计，以千家万户个生产经营，适应千变万化个社会需求，看到伐，“六千六万”唻。实际浪，“敢为人先，民本和谐”就是温州个城市精神，搭榕树个特色邪气一致，也跟阿拉客家人四海为家个秉性一式势样个。
温州古树老老多个，单单市区里百年以上个古树就有113棵，其中榕树有一半以上，1985年榕树拨评为温州市树，实在是当之无愧。榕树搭仔樟树，一个胸怀宏大，气根绵延，像美髯公；一个伟岸高大，芬芳扑鼻，是蛀虫个克星。我个爷告诉我，姆妈生我个辰光，伊拉部队正好勒浙江东南个青田，伊面雨水多，榕树樟树也生长茂密，触景生情，所以搭我以“榕樟”命名。
父亲是抗战老兵，我阿哥16岁勿到也当兵了。我出生搿年是自然灾害，各种供应侪邪气紧张。亏得父亲当兵20多年，姆妈也曾经是军人，再加上我阿哥阿姐侪当兵，屋里享受优军优属政策，还好买到奶粉、鱼肉咾啥，我算蛮健康个。
我小辰光，阿哥阿姐侪穿军装。到了中学毕业，我还拿勒父亲写个字条，搭同学阿丁一道去寻父亲个老战友张伯伯，要求参军。
开开影集，好看到屋里向人个各种着军装个照片，饮水思源，每年建军节，阿拉一家门总归要庆祝个。2017年是建军九十周年，阿拉去了趟温州江心屿。想起北魏《张黑女志》有联句曰：“叶映霄衢，根通海翰”，讲叶子长到天街浪，树根伸到海底里，寓意根深叶茂。
交关人晓得，黑龙江有个地方叫“三棵树屯”，据说是一个姓陆个人发现个，有三棵大榆树个地方；“三棵树屯”站，就是哈尔滨火车站东站，1934年建成个。因为我个名字齐巧是三棵树，所以一直想到伊面去拍张照，可惜到搿歇还呒没去过。2009年到贵州黔东苗寨，发现伊面有个镇叫三棵树，勒通往搿个镇个公路浪向，看到有只牌坊，古色古香个，高头有“三棵树镇”，我快点下来拍照片，以作“同名”个纪念。
我参加过、也组织主持过蛮多趟联欢会，印象深个有两趟：一趟是小学四年级开新春晚会，还有一趟是大学毕业告别联欢会，猜谜谜子，谜面侪是“三木”，要打一同学名，谜底当然就是我咾。一个小学同学猜出了谜底，奖品是一本塑料封面个日记本，邪气开心，一直勿舍得用，后首来专门记名人名言。漂亮个大学同学得到个是床上“三件套”，伊讲是我拨伊带来好运，以后睏觉也要想起我，大家侪哄堂大笑。
三棵树——“三木”，实际浪是个普通来西个名字，日本人用比较多，上网搜搜看，也有眼名人个，譬如三木武夫，是日本邪气有名个政治家，勒东京明治大学读过书，后首来到美国读法律，还当到日本议员。伊公开反对日本搭美国打仗，所以战后美国占领日本，伊还照样从政。1974年12月田中角荣辞职之后，伊当选为总理大臣。必过还是呒没拉回日本经济个衰退情况，所以只好引咎辞职了。
我还发现，有不少商品用“三木”作品牌，比如三木文具，三木碎纸机，三木高尔夫球套杆咾啥，哦，对了，三木西裤也邪气有名个。有几家广告公司也叫三木，我看到有一家是搿能解释三木个：大拇指（Thumb）英文音译，永远一流，永争“优秀”。风格 ：一个好汉三个帮，团结就是力量。口号：客户第一、公司第二、个人第三。侬看含义丰富、深刻伐？！
朗读者
往期回顾：
图：网络 / 编辑：渺渺