上海闲话面临生存危机（下）
沪语朗读：宋宝权
上海闲话面临生存危机（下）
作者：宋宝权
文字修正：丁迪蒙
朗读：宋宝权
伤脑筋个勿仅是新上海人勿肯学，顶顶要命个是小上海人勿肯讲。普通话勒学堂搭工作场所、公共场所个强势地位，明显个压缩了上海闲话个生存空间。现在，迭种情况已经普遍延伸到了年轻一代个家庭，上海闲话也已经明显个被边缘化了。小朋友回到屋里，勿欢喜讲上海闲话，搭爷娘也开国语。慢慢叫末，干脆屋里向就侪讲普通话了，迭能就等于拿上海闲话扫地出门了。现实生活当中，上海闲话就迭能样子拨一家一家人家无声无息个勒勒“扫地出门”。照迭能下去，结局就是上海闲话无家可归。而现在勒勒关心上海闲话走下坡里搿桩事体个，主要就是迭些老人，顶顶起劲，但伊拉自己也已经勒勒走下坡路了，想想是勿是有眼吓佬佬个？
照搿样子下去，上海闲话个生存危机就会越来越逼近，虽然听起来吓人倒怪，实际浪危机已经勒勒眼面前。只要再过个十廿年，现在搿批小囡做爷娘了，伊拉就勿大会讲上海闲话了，也没本事再去教伊拉个下一代了，伊拉个下一代连得学习上海闲话个家庭语言环境也勿存在了。到了迭个辰光，上海闲话就变仔老年人个专用语言，也可以一道进养老院了。搿种事体快来西个。再朝后去，就勿需要一代人个辰光了，上海闲话个历史使命就可以宣告结束了。搿辰光个上海会变得是啥个样子，啥个味道啊? 唉，真个是勿大敢去想。啥地方还会得有啥沪剧啊，上海说唱啊，滑稽戏啊。啥物事啊？侬还想听海派清口？帮帮忙噢，还有几个人能够听得懂啊？
照道理讲，只要呆想想，像上海经济文化迭能发达个乓乓响个国际大都市，世界上也拣勿出几个，对国家个贡献又介大，哪能可能呆瞪瞪地看牢上海闲话勒阿拉搿代人手里走向萧条没落呢？据语言方面个专家个调查，由历史形成个最有影响力个城市方言。全中国一塌刮子只有三家人家，北京闲话，上海闲话，第三种末大概猜也猜得出来，就是广州闲话。三大城市方言当中，北京闲话笃定，广州闲话太平，上海闲话，勿是我讲句触霉头个闲话，现在看起来，汗毛凛凛。
好得有一部分眼光比较远个热心人，看勿下去了，伊拉借助学术组织也好，群众团体也好，网络平台也好，开展振兴上海闲话个活动，最近也蛮闹猛。伊拉侪是无名英雄，侬勿好讲搿排侪是毛毛雨。但是，光靠少数热心人单线作战，还只能够勒勒讲上海闲话个人个圈子里向有眼影响，对小上海人搭仔新上海人，可以讲基本上勿产生啥个影响。当然弄点声势出来也有必要，但勿怕伊拉动气，侬要真个扭转上海闲话滑坡个趋势，力道还远远叫搭勿够。侬叫迭眼热心人哪能介从小囡开始培养？勿要讲幼儿园搭仔学堂里向根本勿会买侬个账，家长也勿会领侬个盆。弄得勿好，只当㑚侪吃饱了饭勒勒瞎起劲白起劲。
我觉着应该大家一道来呼吁上海市个各级领导。目前老百姓里向普遍是有一种担心，觉着市里个领导当中，已经看大勿着上海人了。我个想法末，当然也勿一定对，搿就是：勿管伊拉是勿是上海人，会屋会讲上海闲话，对上海闲话有勿有特殊个感情，要相信伊拉应该侪是有眼光有水平有历史担当个。伊拉肯定晓得，上海闲话到今朝已经活了六七百年了，见证了搿座城市经历个全部个历史沧桑，具有极其鲜明个地方文化传统特色，生动个反映黄浦江两岸特有个风土人情，外加，还蕴含勒丰富个人文故事搭仔生动活泼个表现力。讲得杀根一眼，上海闲话是享誉全球个海派文化个命脉之一，同时还是散布勒勒全中国，一直到全世界千千万万个上海人搭仔迭座城市之间个精神纽带。勿是搭侬打朋，会勿会讲上海闲话本来还是看侬算勿算正宗上海人个一个重要标准。即使现在，也是老上海一张通用名片……搿排道理啥地方还用得着侬来搭领导上课？我想，介大介重要个事体，要相信市里向个领导，哪能会得就推勒了一批志愿者、热心人身上向呢？啥辰光看见过抗震救灾个辰光，老百姓冲勒了前头献爱心，政府反而迓勒后头个事体呢？
写搿篇作文之前、心里向就老清爽，自家又没搿方面个专长，完全是心里一急，脑子发热，做趟冲头，跑到网浪抛砖引玉来讲两句：
第一，当务之急是对上海闲话正面临着生存危机搿一点要达成广泛共识，并着手组织队伍开展专题调研搭仔对策研究；
第二，全社会侪应该关心保护振兴上海闲话，但要明确，政府是责任主体，领导一定要有紧迫感。
也有人劝过我，讲侬写搿排文章有啥断命用场？我也勿是勿晓得可能派勿着啥用场，但闲话又要讲转来：假使阿拉搿批还能够讲一口上海闲话个上海人，侪勿来关心上海闲话个前途搭仔将来，葛末侬讲讲看，要等啥人啥辰光再来关心呢？到迭个辰光还来得及伐？
精彩回顾：
图片来自网络