洗澡的记忆
沪语朗读：高仁
朗读者
洗澡的记忆
作者：陈永生（加拿大）
沪语改写：丁迪蒙
诵读：高仁
汏浴，勒现在个上海人看来是桩邪气平常个事体，但是，对象我搿能年纪个人来讲，却有得勿少难忘个记忆。
以前，我搿搭讲个“以前”，勿是指遥远个年代，就是三十年之前，汏浴，对上海人来讲，的确是勿容易个。
热天还可以，勒屋里，一只大个木盆，烧眼水来汏就可以了。
冷天介就勿来三了，必须到浴室里去汏，但是，人多是多得来，要排蛮长个队等。碰到过年了，就更加头痛，尤其是女子去汏浴室，门前头总归是排得像条长龙。
要晓得伊个原因嘛，还是粥少僧多，浴室个数量搭仔居住个人口勿成比例。就我所在个徐汇区，只有数得过来个伊个几家：徐家汇个“汇泉”、东安新村个“东安”、中山南二路浪个“康健”、淮海中路个“钱塘”、安福路浪个“安福”咾啥。
当然咾，除脱仔公共浴室，还有一种单位个浴室，但搿一般侪是一眼规模比较大个工厂或者是特殊个行业，因此，伊个年代单位里向有得汏浴，实在是邪气幸运个。
童年个汏浴，勒我个回忆录《小时候》里已有叙述，摘抄如下：
“小辰光，热天汏浴侪勒屋里，木盆里向，每日天夜饭前头。其他季节就到澡堂子去，尤其是冷天。上海人称澡堂子为‘汏浴间’，正规称法为‘浴室’。
离我屋里最近个是‘沪南浴室’，勒打浦桥，斜徐路浪，门朝北，对牢瑞金二路。记得每趟汏浴侪是父亲帶我去个，伊总归先拿我汏好，着好衣上，再送我到门口，母亲或者是外婆就候勒门口，拿我接回去，父亲接下去再自家汏。后首来，我一点点大起来了，就覅人来接了，汏好以后，就坐勒大厅里向等父亲。
记得有一趟，父亲勒澡堂子里昏过去了，拨人扶出大池，只看见伊眼睛紧闭、面色苍白，我吓煞脱了。搿是因为大池里向忒闷，勿通气，照现在个讲法就是缺氧而造成个。
除脱仔沪南浴室，勒中山南二路日晖港个西侧也有一家，好象叫康健浴室，我只去过一趟，因为比较远。”
以上是回忆录里个内容。
小学五年级以后，我个屋里搬到了裕德路，所以呢，汏浴就到徐家汇，华山路浪个汇泉浴室，勒孝友里个弄堂里向。
汇泉浴室是两层楼个，价格分为三档。楼下西侧是大众厅，每位1角，东侧每位2角，其实，里向个浴池是共用个，只不过1角头个是统铺，而且狭窄，只好坐，2角头个是躺椅，可以睏下来个。至于二楼嘛，档次就更加高了，有单独个大池，环境、服务也好眼，可谓是“雅座，楼上请”，像煞是老底子个饭馆。
顺带便提一句，伊个辰光个汇泉浴室邪气有名，是因为出了一个市级个劳动模范，叫啥名字忘记脱了，扬州人，搭杨富珍、杨怀远、裔式娟咾啥齐名个。是个呀，勒伊个“我为人人，人人为我”个年代里向，服务行业还是邪气显眼个。
除脱汇泉浴室，阿拉也常庄到漕河泾去，伊面也有只浴室，勒老街个中段，街北个一条小巷子里。当然，伊个设施要比徐家汇个差一眼，路也远眼，但是价钱便宜，而且相对空眼。
另外，勒刚刚搬到裕德路个辰光，弄堂口有只“老虎灶”，里向有“盆汤”个。“盆汤”，可能是上海特有个产物了，就是勒“老虎灶”里向专门隔出一块地方，里向摆几只大木盆，有热水侍候，一般是热天个夜快头到夜里向营业，每人一角洋钿。不过，呒沒几年搿只“盆汤”就关脱了，倒底是因为老板屋里个几个小囡侪长大了，要腾出地方住，还是因为老板是小业主，拨“割资本主义尾巴”了？勿得而知。
勒我个记忆当中，汏浴难个局面一直到1983年个春天再有所好转。伊个辰光我大学毕业，分配到上海市人民检察院，大院里向竟然有只职工浴室，勒东北角浪，搭市司法局佮用。搿侪是托原单位建国饭店个福，不过现在仔细想想，堂堂个建国饭店，是大宾馆，也只有一只公用浴室，也是蛮寒碜寒酸相个，同时也可以了解伊个辰光个落后程度。
检察院个浴室开放也有规定，每周只有两个下半天，一次是男个，一次是女个。所以，一到伊个一天，各个科室交关人侪忙勒海汏浴，手里拿好毛巾肥皂、替换个衣裳，有个甚至就着勒塑料拖鞋，来来往往，川流勿息。
呒沒几年，我个汏浴问题就得到了进一步个解决。
八十年代中期，上海实行普及法律知识教育，市检察院附近个大中华橡胶厂聘请阿拉去上课。下了课以后，就可以勒厂里向汏浴，搿爿厂有两只浴室，24个钟头开放。一年多以后，普法结束，我搭厂个教育科、门房间侪熟悉了，所以，有辰光经过门口，进去“蹭”个浴还是可以个。
八十年代下半期，检察院分了一套“沪住2型”个房子拨我，煤卫独用，一下子就提高了我个生活质量，可以勒屋里向汏浴了。即使是冷天介，只要摆只红外线取暖器，烧好几壶开水，就可以了。
当然咾，伊个辰光一旦碰着条件好个汏浴机会也勿会放过，譬如到宾馆去搭海外回转来个朋友见面，除脱吃饭，总归勿会忘记趁机勒房间里向“蹭”浴。
1990年春我出国以后，发现当地个每家每户、每时每刻侪可以勒屋里汏浴个，有暖气、有热水，我一记头呆牢了，勒刚刚到个日脚里，我总归是恍恍惚惚，觉着自家每日天勒住宾馆。
当然咾，伊个辰光一旦碰着条件好个汏浴机会也勿会放过，譬如到宾馆去搭海外回转来个朋友见面，除脱吃饭，总归勿会忘记趁机勒房间里向“蹭”浴。
1990年春我出国以后，发现当地个每家每户、每时每刻侪可以勒屋里汏浴个，有暖气、有热水，我一记头呆牢了，勒刚刚到个日脚里，我总归是恍恍惚惚，觉着自家每日天勒住宾馆。
当然，社会勒发展，生活勒进步，中国同时也勒发生翻天复地个变化，改革开放、搞活经济。所以，九十年代我几趟回国，慢慢叫发现上海居民个汏浴条件有了逐步个提高。
到了本世纪初，几乎每家人家侪装了电取暖、热水器咾啥，舒适、干净、方便。中国个变化实在是忒大了，一滴水可以见大海，从汏浴浪向也可见一斑。
生活好了，阿拉也老了，撫今追昔，邪气感慨，勿晓得哪能，三十年之前勒国内个辰光伊眼汏浴情景常庄出现勒眼门前，而且还是邪气清晰个。
推上海言话叙身边事体
究吴侬细语吟诗词歌赋
往期回顾：
图片来自网络