侬
沪语诵读：胡运皎
作者：周力
沪语改写、朗读：胡运皎
上海人见了面先要问候一声：“侬好！”，“侬”，就是“你”。侬好、我好、大家好，啥人也呒没想过“侬”搿个字个本意，是你、我、他侪可以表示个。你好、是侬好，我好、是侬好，他好、也可以讲侬好，就是搿能介个乱七八糟。
先来讲讲作为“你”个“侬”。“我叫侬覅去管伊”，搿句上海闲话，翻译成普通话就是“我让你别去管他”，你、我、他，分别对应“侬、我、伊”，邪气明确个。勿少词典引用元代杨维桢《西湖竹枝集》当中个一句：“劝郎莫上南高峰，劝侬莫上北高峰……”，沪剧《碧落黄泉》当中个“志超读信”，王盘声开口一唱：“志超，志超，我来恭喜侬……”就一定要唱“侬”，再加只拖腔，再有味道。假使唱成功“我来恭喜你”，就索然无味了。
“侬”作为“你”个历史勿长，大多数是用勒口语里个。勒书面语态中，“侬”，长期表达个是“我”个意思。唐朝刘禹锡个《竹枝词》：“落花易衰似郎意，水流无限似侬愁”，搿搭个“侬”，表达勒少女本人个惆怅。
《红楼梦》“黛玉葬花”当中搿能写：“侬今葬花人笑痴，他年葬侬知是谁？”，搿搭个“侬”，指个是多愁善感个林黛玉自家。张国荣早年演过部电视剧《侬本多情》，伊演唱个主题歌大红大紫。搿首曲子由黎小田作曲、郑国江作词，所谓“侬”本多情，就是“我”多情个意思。电视剧里商天娥演个女主角叫莫笑侬，取意“多情应笑我”，是勿要笑“我”个意思。假使理解成为勿要笑“你”，就勿对了。
“侬本多情”搿部电视剧个情节，取材于张爱玲个《倾城之恋》、《沉香屑·第一炉香》，名字来自上世纪三、四十年代个上海。加里·格兰特（Gary Grant）搭仔梅·韦斯特（Mae West）有部“She Done Him Wrong”，当年上映辰光就翻译成为“侬本多情”。
1943年，还有部桑弧编剧、屠光启导演，梅熹、顾兰君主演个电影《侬本痴情》。
1947年，上海歌星吴莺音灌录唱片《侬本痴情》，后来经过费玉清翻唱，晓得个人勿少。歌里向有“愿君莫作薄情人，切莫轻易把侬丢”，勒搿搭，“侬”当然也是“我”个意思：是切莫把“我”丢。
除脱仔“你”搭仔“我”，“侬”还可以指代“他”， 搿种用法勿算多，但是，勒古籍当中也有证据个，明朝张自烈编个《正字通》里有搿能介个条目：“侬，又他也”，也就是讲，“侬”也可以解释为“他”。我看，“侬”之所以可以同时表示你、我、他个意思，可能是勒古文当中，伊就是“人”个意思。杨华生唱个“宁波空城计”，京剧里个唱词是“我立勒城楼看风景……”，宁波话唱个是“我奴……”，我怀疑“我奴”写出来应该就是“我侬”。宁波话个“你”叫“N奴”，“他”叫“其奴”。所谓个“吴侬软语”，“吴侬”者，吴地之人也。吴侬软语，就是吴地之人讲个软绵绵个闲话。元朝书画家赵孟頫个夫人管道昇有一首《我侬词》：“你侬我侬，忒煞情多；情多处，热如火；拨一块泥，捻一个你，塑一个我，把阿拉两个一道打碎，用水调和；再捻一个侬，再塑一个我。我泥中有侬，侬泥中有我；我搭侬生同一个衾，死同一个椁”。勒搿里“你侬我侬”，就是“你搭我”，我奴N奴。
为了解释一个“侬”，引用了勿少电影搭仔歌曲，突然想到，“侬”勒法语当中写成“Non”，是“不”个意思。法国“香颂歌后”伊迪特·琵雅芙（Edith Piaf）有首“Non, je ne regrette rien”（不，我不后悔），歌曲开头一句“Non”真个是百转千回，搭“志超读信”里向王盘声个搿句“我来恭喜侬”个“侬”，真是有得异曲同工之妙唻！
往期回顾：
图：网络 / 编辑：渺渺