故里春秋（十三）
作者：朱海洪
沪语改写：边秦翌
沪语讲述：牛美华
6年之后，文学家袁宏道偶然看到徐渭个文字 ，惊为“明朝第一”。勒袁宏道个推动下，徐渭文集拨重新编辑出版，名声大噪。
漫漫历史长河中，徐渭以极其悲苦个方式，拿伊对艺术个感知，伊个孤傲搭寂寞，以及伊个人生感悟留拨了后世，就像伊个墓园高头个对联所讲个：
一腔肝胆忧天下
满腹经纬传古今
想勿起来勒勒啥个地方看到过搿能一句闲话：大部分个天才侪是“神经病”！搿句闲话邪气有道理。假使讲天才个神经搭仔普通人一样，还算啥个天才啊？
张昌楣还够勿上天才档次，只能讲有眼徐渭痴狂个影子。
我一直想搞清爽张昌楣痴狂个原因。
有一日，张昌楣勒勒自家屋里门口头拨一帮小朋友盯牢了，伊只好搭小朋友讲讲“野狐禅”。张昌楣就有迭种本事，可以勒勒茶馆禅，也可以勒勒马路浪禅；看到老人禅古书，碰上小人禅童话。为了甩脱小朋友个纠缠，伊就拨伊拉禅徐文长个故事《猜帽子》：
徐文长小辰光邪气聪明，5、6岁就会得猜帽子。
有一天，隔壁阿公拿出两顶蓝帽子，三顶黑帽子，对徐家三位堂兄弟讲：“我来试试啥人聪明。此地有得五顶帽子，只有两种颜色。㑚侪闭好眼睛，我拨㑚每个人头浪向戴一顶帽子，另外留下来两顶。㑚可以看到人家头浪向个帽子，但是勿可以讲出来帽子个颜色，也不好拿自家个帽子脱下看。㑚猜猜看，留下来个帽子到底是啥个颜色。
三兄弟眼睛侪闭好，等阿公拨伊拉戴好帽子，再叫伊拉张开眼睛来猜。三兄弟看看别人个帽子，又摸摸自家个帽子。想了一歇，大阿哥讲：“我猜勿出”，二阿哥讲：“我也猜勿出”。年龄最小个徐文长讲：“哈哈！我猜出来了，剩下来个两顶帽子是一蓝一黑”。
阿公问伊：“侬是哪能介猜出来个？”
徐文长回答：“要晓得剩下来两顶帽子个颜色，一定先要晓得另外三顶帽子个颜色。两个阿哥帽子搿颜色我看得到，要弄清爽个是自家帽子个颜色。但自家帽子个颜色看勿到。葛末，我就要从伊拉两顶帽子颜色来猜。”
徐文长说到此地，停了一歇。看到大家听得认真，挨下去伊再讲：“我看到大阿哥戴个是黑帽子，二阿哥戴个是蓝帽子。本来我也猜勿出自家帽子个颜色。但是后首来大阿哥讲伊猜勿出，二阿哥也猜勿出。乃末我从此地就想出答案了呀。”
“侬是哪能想个呢？”
徐文长回答：“我想，假使我搭二阿哥一样戴个是蓝帽子，大阿哥肯定猜得出剩下来两顶是黑帽子。因为黑个有三顶，蓝个一共只有两顶。大阿哥猜勿出，葛末我勿会戴蓝帽子个。搿歇，大阿哥二阿哥侪讲勿晓得，葛末我戴个肯定是黑帽子了。所以，我就晓得已经戴勒海个是两顶黑帽子，一顶蓝帽子。剩下来个一黑一蓝，绝对勿会错了。”
阿公听了，捋捋白胡子，邪气开心，讲：“对呀！文长齐巧是勒㑚两个人讲勿晓得当中寻到了线索，猜中了。”
大阿哥二阿哥快点拨阿公放帽子个盒子打开来一看，勿错：就是一顶黑帽子，一顶蓝帽子。
故事讲好，张昌楣问小朋友：“㑚猜得出来伐？”小朋友想了一想，侪摇摇头。
我屏勿牢问身边个小朋友：“伊肚皮里向为啥有得介许多个故事啊？”
“侪是从书浪向看得来个”。迭个小朋友是张昌楣个邻居。
“伊有介许多书啊？”
“哎呦，伊房间里向个书，多得来一天世界！”
我真个邪气想去见识见识张昌楣个“一天世界”。
有一日，迭个小朋友来通风报信了：快点快点，张昌楣屋里个房门开勒海，人勿晓得跑到啥个地方去了。
机会难得啊，张昌楣个“一天世界”勒勒三德里一幢石库门个二楼。我搭仔小伙伴偷偷摸摸个上了路梯，趴勒“一天世界”个门槛边头朝里向看。搿是一间空空荡荡个亭子间，呒没啥个家生，墙壁浪连得一根钉子也呒没，地浪向到处侪是书，掼得乱七八糟个，厚厚个一层，连得落脚个地方也呒没。
难道，对张昌楣来讲，书就是伊个药啊？伊是想用文字来拯救自家个魂灵啊？
我搞勿清爽，心里觉着有眼空落落个。
朗读者
往期回顾：
图：网络 / 编辑：渺渺