够得着个幸福再是侬个！
沪语朗读：冯蓉
朗读者
来源：禅是禅非
沪语改写、朗读：冯蓉
有辰光阿拉勿开心、勿幸福，是因为能力跟勿上野心，欲望超过了需求。每个人侪会得有搿能一种错觉，老是觉得欸些得勿到个物事再是最好个，欸些够勿着个物事再是最想要个。
拨搿能一种错觉左右勒海，阿拉老是勒勿停个仰望，勿停个寻找。
仰望欸些看上去离阿拉老近个，但实际浪并勿是随手可得个物事。寻找欸些可望而勿可及个物事，就像镜中花，水中月。
仰望欸些够勿着个物事，实际浪是一种煎熬。
假使讲侬想要个物事，是一只高高挂勒树梢浪个果子，就算侬踮起了脚尖，搬来了扶梯，寻了根老长个竹竿，还是够勿着欸只挂勒树梢上个果子，侬会做啥个打算呢？
是选择放弃还是选择继续？
生活勒红尘当中个人，侪会碰到欸只高高挂勒树梢浪向个果子。聪明个人会绕树三圈，够得着就摘下来，够勿着就再想想办法，实在够勿着就选择离开。
欸些贪心个戆大会得勒树下头左三圈、右三圈勿停个转，够又够勿着，走又勿舍得走，拨折磨得精疲力竭，最后倒勒树下头伤心欲绝。
人生就像一次长途旅行，勒勒搿场旅行当中，阿拉会碰到交关人搭事，会看到美丽个风景，会碰到交关想要或者勿想要个物事。譬如鲜花美酒搭掌声，譬如沮丧压抑搭绝望。
贪心个人老是想拿所有个物事侪占为己有，从来勿会想到，物事忒多自家拿得动伐？豁达个人会选择自家最需要个物事，简单快乐再有好味道。
或许侬会讲，搿个人勿求上进，勿思进取，像阿Q一样，呒没救了。
其实，勿是搿能个，与其触摸欸些够勿着个幸福，拨折磨得死去活来、精神分裂，还勿如守牢搭仔搭珍惜手里向已经有个幸福。
触摸欸些看得见够得着个，实实在在个幸福，抬头可以看得见蓝天，低头可以闻到花香，亲人安好，朋友快乐，身体健康，搿侪是够得着个幸福呀
行走红尘，覅拨欲望左右迷失了方向，覅拨物质打败做了生活个奴隶。让心灵腾出一方空间，让欸些够得着个幸福安全抵达。
捏勒自家手里个，再是实实在在个幸福！
图片来自网络
往期回顾：
“上海言话讲起来”旨在传播沪语，若有不当之处，敬请留言指正。
感谢您的支持转发，欢迎关注本公众号