【沪语悦读】泡饭长，泡饭短
上海老底子每天呈送精彩文章一组
打开尘封的记忆，寻觅往昔的岁月
叙上海老底子事 忆上海老底子人
诉上海老底子情
泡饭长，泡饭短
来源：夜光杯
作者：石磊
沪语改写：边秦翌
沪语讲述：高仁
指导：丁迪蒙
制作：沉默是金
点击下方收听音频，时长12分45秒。
沈宏非召集吃饭。细雨繁花天，一只泡饭局。
黄昏中，暮色里，到茂名南路个沈公屋里，电梯门一开，只看到沈宏非邪气客气、邪气正式个立勒门旁边等勒海，花衬衫外头，披仔一只烧饭用个围裙，春彦一看吓得来跳起来了，要死要死，罪过罪过，一垯路里是走也走勿动了。
一进门，灯火阑珊啊，只听到有细细个女高音勒勒讲闲话，讲得慢吞吞个，有哀怨个，也有明媚个，一半一半伐。勒勒比较黯淡个地方，摆勒一盆婷婷玉立个荷花，半开一朵，看到伊娇羞勿胜风个样子，真个是叫人个心啊，稍微要抖豁一记。啧啧啧，介热个天气，看到迭只版本个醉生梦死，像煞是阿拉小辰光个客堂间。迭个沈宏非哦，真个是最亮晶晶个处女星座，伊好像还觉着味道勿大够，人家一个侧转身，拿仔一只拉丝玻璃杯，里向是冰个冷饮，时勿时个吃一口。乃末好唻，进门五分钟，眼耳鼻舌身，统统跌到伊个陷阱里向去了。
大家落座，沈宏非轻轻叫个拿两只竹罩拿脱，像煞是勒勒防止苍蝇样个，其实侪是戏呀，啧啧啧，一台子个精洁小菜，侪露出来了呀。搪瓷盆里向，勿是食堂个红烧大排，是一人一只酱蟹，人家外婆亲手做个，人人侪勒勒“哦哟哦哟”。沈宏非个身材么还是有眼眼结棍个，但是人家做起事体来，动作是轻灵袅娜得来，一眼眼声音也呒没个。迭个辰光伊两只手抱仔一只钵斗，一个闪身就过来了，来了来了，糟钵头糟钵头。啧啧啧，埃个样子，像煞是春彦个一幅画《伏虎》，达摩抱牢仔一只猫咪，叫做软也勿是，硬也勿对，哪怕是全副精神对牢伊，照样勿大好处理，一个勿当心，好像就要跳出来一样。哦呦，搿只糟钵头，赞是赞得来，呒没闲话唻。一层一层慢慢叫吃下去，鲜虾门腔毛豆白肚猪尾巴，一层层么一叠叠，所有个味道侪刚刚好，所有个软或者硬个程度也刚刚好，齐巧侪勒勒伊拉各自最最恰当范围里向；勒勒同一只钵斗里向，口感介丰富，真正是深得钵迭个字个真趣。吃到一半，沈宏非讲，下头还有豆芽唻，哦呦哦呦，真正是一句闲话讲到我心里去了。上海个糟菜，最典雅个就是糟豆芽，鲜脆轻灵。沈宏非问我，吃得出来伐？糟露里向，加了一眼眼物事。我猜是桂花，勿对。正确答案，是花椒油哦。快点勿断个点头，灵个灵个灵个。第二天特为去问沈宏非，再晓得，迭只糟钵头，是从肆拾陆宴私房菜来个。
一道吃饭个各位，头一桩大事体，先要解决一人一只宁波酱蟹。我比较怪，头盘勿欢喜吃蟹，蟹个味道忒鲜忒浓唻，味道有眼狠，头盘吃伊个闲话，后首来个物事，基本浪侪呒没啥个味道了。最最好个吃法，是饭吃到一半，上眼温个黄酒或者清酒咾啥，讲点轻松好白相个话题，一边吃蟹，一边笑到颠倒，搿能介再最称心。
大家侪勒勒忙勒吃蟹，人家沈宏非也勒勒忙，忙点啥个呢？伊勒勒忙火腿冬瓜汤，忙得来春彦也吃勿消了，屏勿牢个问伊，沈公，侬阿好坐下来一道吃泡饭啊？沈宏非拿仔碗盏过来了，是万字蓝花碗，碗底有两块透明个冬瓜，三片绝绝薄个西班牙火腿，然后手里拿仔一只竹壳热水瓶，从迭只热水瓶里向，倒出来一碗盏个火腿汤，一小撮细细个芦蒿碎，再加浪一句贴心个闲话，来来来，暖暖胃。哦呦哦呦，迭个火腿汤真个是汤水清爽，味道浓厚，极有分寸，洽到好处。火腿汤最忌喧宾夺主，火腿么，伊个本职就是帮衬，假使讲火腿摆勒忒多，实在就是戆搭搭了。吃了半碗，马上晓得迭碗汤看上去邪气平常，其实啊，实在是好。快点问沈宏非，人家是用西班牙火腿个骨头，剔清爽之后，火里向燎过，再炖出来个清汤。味道忒好，连吃两碗，沈宏非看我胃口邪气好，勿声勿响个往我碗盏里又添了一轮西班牙火腿。亏得春彦坐勒对过埋仔头拆蟹呒没看到，假使拨春彦看到，肯定屏勿牢要骂我哪能介馋个啦。
泡饭端上来个辰光，真正是一清二白啊，勿是上海当地人，是勿会得眼泪水溚溚渧个。沈宏非讲，饭是早浪向刚刚烧个，晾了一日天了。泡饭个饭，是勿应该进冰箱个。水是滚水，开水淘淘，淘迭个动词，真真是稳准狠，老底子上海人家个普通早饭，搿歇已经拨辰光提炼成了经典款了。迭个一款，叫做硬泡饭，比较偏宁波风格，宁波人么，勒勒上海人里向比例蛮高个，迭个硬泡饭是上海泡饭里向个一朵名花。另外一路个泡饭，是勒勒早浪向刚刚生出来煤球炉浪，用迭只死样怪气个小火，稍微烧个小滚，就是软泡饭了。欢喜硬泡饭个人比较多，软泡饭呢，有眼黏搭搭个勿清爽，勿欢喜个人比较多。侬看侬看，泡饭也可以写出流派来了。
泡饭小菜，碟碟精洁，天南海北个，就勿要一只一只讲过来了。饭后甜品，先是上宁波汤团，挨下来再上冰蜜桃搭仔粉荔枝，还有一道冰倒牙齿个甜酒，是沈宏非勒勒匈牙利私人订制个甜酒。真个邪气欢喜饭后甜品搿能介一道、一道、又一道。伊天夜到，奕青举仔纤纤个小手，勒暖暖个灯光下头，剥水蜜桃个样子，看得我已经呆脱了。春彦吃到迭个辰光，开始活络起来了，伊原地起立，手舞足蹈个模仿别人，大家看得来又是拍台子又是拍大腿，笑煞脱了。
吃好笑好，准备要跑了，沈宏非送每个人一只袋袋，里向是手信。别人家个袋袋我看勿到，我自家个，是一只玻璃花瓶，像林风眠个画中物；一盒子过泡饭个草头干，鹿园个师傅过年辰光从崇明收得来个；再有，一把细嫩个芦蒿。
夜快头搭仔沈宏非致谢，达令啊，又是泡又是拿，真正是良宵啊。
来源：“吳越小豬”公众号