一文读懂广府人嘅亲属关系，以后唔好叫错喇。
粤语（广东话）文化，有非常悠久嘅历史，系传统嘅广东三大语言文化之一。广东嘅语方言主要由广府话、潮汕话、同客家话组成。喺香港通行嘅系（粤语）广州话，广府人通常叫佢做“白话”，而香港人、澳门人就多数称呼佢做“广东话”，喺外国嘅华人就叫佢做“唐话”。粤语（广东话）主要使用喺广东、香港、澳门、广西、海南等地方。喺东南亚嘅新加坡、马来西亚、越南、印尼等，同北美嘅美国、加拿大，欧洲同澳洲、纽西兰、圣诞岛等等嘅华人社区使用最多嘅一种汉语，估计全球使用粤语来做母语嘅人口约有 1.2 亿人。
粤语呢个名，系起源于秦朝人赵陀喺古代岭南地域所建立嘅第一个国家（南越国）。《汉书》写做“南粤国”；简称“南越”或者“南粤”；古代嘅“粤”同“越”系互通字，有资料表示当时佢哋系以“广信”嚟做岭南地区嘅政治、经济同文化嘅中心，系岭南文化同粤语嘅最早发扬地。
喺华人嘅传统文化入面，亲戚或者亲属，系指因为有婚姻或者血缘同人类个体连成嘅社会关系，父母、兄弟姐妹等等嘅亲属又叫“亲人”或者“家人”，其他嘅就叫做“亲戚”。
亲属关系嘅记录最早系先秦嘅典籍《尔雅》第四章嘅“释亲”。古代唐朝学者孔颖达对亲戚嘅注解系“亲指族内，戚言族外”，所谓“族内”系指父系同宗嘅人，以男性为中心，包括宗族内嘅男性同佢哋嘅配偶，但系唔包括已经出嫁咗嘅女性同佢哋嘅配偶。
到咗现代，有专家就将依家嘅人嘅亲戚或亲属关系分为“血亲”、“姻亲”同“配偶”。
血亲
直系血亲：父系
鼻祖－始祖始创人。
－係祖宗十八代嘅嘅第一代。
远祖－始祖接班人。
太祖－系指曾祖嘅曾祖嘅父母。
列祖－列祖列宗，就系呢一个喇！
天祖－系指阿爷嘅阿爷嘅父母。
高祖－（父系）太太爷，太太嫲（高祖父母）。（母系）太太公，太太婆（外高祖父母）。
太爷（曾祖）－（父系）太爷，太嫲（曾祖父母）。（母系）太公，太婆（外曾祖父母）。
阿爷（ 祖）－（父系）阿爷／爷爷，阿嫲／嫲嫲（祖父母）。（母系）阿公／公公，阿婆／婆婆（外祖父母）。
阿爸（父亲）－老窦，老头子，爸爸，爹哋。
阿妈（母亲）－老母，老妈子，妈妈，妈咪。
阿仔（儿子）－父母之下男性嘅第一代。又叫“仔”。
阿女（女儿）－父母之下女性嘅第一代。又叫“女”。
孙（孙儿）－父母之下男女嘅第二代。依性别又分孙仔、孙女。有时候（孙）系一种唔分性别嘅称呼。
息
（曾孙）－父母之下嘅第三代，又叫“重孙”。广东话通常读“塞”或“室”。
（玄孙）－父母之下嘅第四代。
（来孙）－父母之下嘅第五代。
（昆孙）－父母之下嘅第六代，又叫“晜孙”。
（仍孙）－父母之下嘅第七代。
（云孙）－父母之下嘅第八代。
（耳孙）－父母之下嘅第九代。
旁系血亲：父系长辈
阿伯（伯父）－仔女对阿爸嘅阿哥嘅称呼。大哥叫大伯，二哥叫二伯，三哥叫三伯...
阿姆（伯母）－仔女对阿伯嘅老婆嘅称呼。通常叫“伯娘”，又有分大伯娘，二伯娘，三伯娘...
阿叔（叔父）－仔女对阿爸嘅细佬嘅称呼。通常叫“叔叔”，又有分二叔，三叔...细叔。
阿婶（婶母）－仔女对阿叔嘅老婆嘅称呼。通常叫“婶婶”，又有分二婶，三婶...细婶。
阿姑（姑姑）－仔女对阿爸嘅姐妹嘅称呼。姐姐叫“姑妈”，妹妹叫“姑姐”。
姑丈（姑父）－仔女对姑妈同姑姐嘅老公嘅称呼，都系一样咁叫法。
旁系血亲：母系长辈
舅父（舅舅）－仔女对阿妈嘅兄弟嘅称呼。又有分大舅父、二舅父、三舅父...细舅父。如果佢嘅年纪比自己细嘅就叫“舅父仔”。
妗母（舅母）－仔女对舅父嘅老婆嘅称呼。有啲人会叫“舅妈”。
阿姨（姨姨）－仔女对阿妈嘅姐妹嘅称呼。姐姐叫“姨妈”，妹妹叫“阿姨”或者“姨姨”。
姨丈（姨父）－仔女对姨妈同阿姨嘅老公嘅称呼。都系一样咁叫法。
旁系血亲：自己同辈
亲（兄弟姐妹）－仔女对父母嘅仔女嘅称呼。又叫“兄弟姊妹”。系指有相同（父亲）同（母亲）嘅人。
堂（兄弟姐妹）－仔女对父系旁系血亲长辈（伯、姆、叔、婶）仔女嘅称呼。有啲地方喺讲嘢同介绍嘅时候系唔讲个“堂”字。
表（兄弟姐妹）－仔女对父系旁系血亲长辈（姑）仔女嘅称呼。对母系旁系血亲长辈（舅、妗、姨）仔女嘅称呼。
旁系血亲：自己晚辈
侄 （仔女）－兄弟对兄弟嘅仔女嘅称呼。男嘅叫“侄仔”，女嘅叫“侄女”。
姪 （仔女）－姐妹对兄弟嘅仔女嘅称呼。男嘅叫“姪仔”，女嘅叫“姪女”。
外甥（仔女）－兄弟对姐妹嘅仔女嘅称呼。男嘅叫“外甥”，女嘅叫“外甥女”。
姨甥（仔女）－姐妹对姐妹嘅仔女嘅称呼。男嘅叫“姨甥”，女嘅叫“姨甥女”。
姻亲
家公（公公）－老婆对老公嘅阿爸嘅称呼。又叫“家翁”，有时直叫“阿爸”，有啲地区又叫“老爷”。
家婆（婆婆）－老婆对老公嘅阿妈嘅称呼。又叫“家姑”，有时直叫“阿妈”，广东地区又叫“奶奶”。
外父（岳父）－老公对老婆嘅阿爸嘅称呼。有时直叫“阿爸”。
外母（岳母）－老公对老婆嘅阿妈嘅称呼。有时直叫“阿妈”。
新妇（媳妇）－父母对阿仔嘅老婆嘅称呼。广东话通常系读“新抱”或者“心抱”。
女婿（女婿）－父母对阿女嘅老公嘅称呼。
阿嫂（兄嫂）－细佬细妹对阿哥嘅老婆嘅称呼。大哥嘅叫“大嫂”，二哥嘅叫“二嫂”，三哥嘅叫“三嫂”...
弟妇（弟媳）－阿哥、家姐对细佬嘅老婆嘅称呼。
姐夫（姊夫）－细佬细妹对姐姐嘅老公嘅称呼。大姐嘅叫“大姐夫”，二姐嘅叫“二姐夫”，三姐嘅叫“三姐夫”...
妹夫（妹婿）－阿哥、家姐对妹妹嘅老公嘅称呼。
姻亲：妯娌
妯娌，系兄弟嘅老婆之间嘅互相称呼或者合称。辈份大嘅妯娌会直接叫细嘅妯娌嘅名，对外人介绍就讲：佢系我嘅“细婶”；辈份细嘅妯娌会称呼大嘅妯娌做“阿嫂”或“大嫂”，对外人介绍就讲：佢系我嘅阿嫂。
姻亲：连襟
连襟，系姐妹嘅老公之间嘅互相称呼或合称。连襟又叫“襟兄弟”、“连桥”，广东人多数合称叫“老襟”。
大伯（大伯）－对老公嘅哥哥嘅称呼；
叔仔（小叔）－对老公嘅弟弟嘅称呼；
姑奶（大姑）－对老公嘅姐姐嘅称呼；
姑仔（小姑）－对老公嘅妹妹嘅称呼；
大舅（内兄）－对老婆嘅哥哥嘅称呼；
舅仔（内弟）－对老婆嘅弟弟嘅称呼；
大姨（姨姐）－对老婆嘅姐姐嘅称呼；
姨仔（小姨）－对老婆嘅妹妹嘅称呼。
祖宗十八代
传统“十八代”嘅意思，一般系指父系之中“上九代”同“下九代”嘅宗族成员。之后，亦畀人引伸加入闹人嘅用语入面，将人哋嘅家族成员都牵涉当中，用语嘅起源都已经无从稽考。
上九代依序系：
鼻祖－子女以上嘅上九代。（祖宗十八代嘅第一代）
远祖－子女以上嘅上八代。
太祖－子女以上嘅上七代。
列祖－子女以上嘅上六代。
天祖－子女以上嘅上五代。
高祖－子女以上嘅上四代。
曾祖－子女以上嘅上三代。
祖－子女以上嘅上二代。
父－子女以上嘅上一代。
下九代依序系：
儿－父母之下嘅第一代。
孙－父母之下嘅第二代。
曾孙－父母之下嘅第三代。
玄孙－父母之下嘅第四代。
来孙－父母之下嘅第五代。
晜孙－父母之下嘅第六代。
仍孙－父母之下嘅第七代。
云孙－父母之下嘅第八代。
耳孙－父母之下嘅第九代。（祖宗十八代嘅第十八代）
中文亲属称呼同英文亲属称呼
中文嘅亲属称谓比较细緻，英文嘅称呼就好简单，举个例嚟讲：
Aunt 可以表示“婶婶”、“伯母”、“舅母”、“姑组”、“姨妈”，Uncle 可以表示“叔叔”、“阿伯”、“舅父”、“姨丈”、“姑丈”。
中文嘅亲属称谓系为咗区分内外同表里，比如系：
堂亲，例如：堂兄、堂弟，系同姓家属，系近亲，系家族里面嘅人；
表亲，例如：表哥、表弟，系异姓亲属，系远亲，系家族外面嘅人；
内亲，例如：爷爷、嫲嫲，系同族近亲，你阿爸呢边嘅人，系家族里面嘅人；
外亲，例如：外公、外婆，系异族远亲，系阿妈嗰边嘅人，系家族外面嘅人。
喺古代嘅家族入面，通过称谓，就可以确定一个人喺家族里头嘅地位同身份，所享有嘅权利同要尽嘅义务，呢样要各人守好自己嘅本分，有利于家族嘅管理，有利于儒家等级制度嘅实施。而西方人嘅等级观念同等级制度就冇东方人咁复杂，所以表现喺称呼上面亦都冇咁复杂同细緻。