贺卡有故事
作者：吴翼民
来源：新民晚报
推荐指导：丁迪梦
每趟到新年个辰光，单位收到个贺卡是应啊应付勿过来。覅看阿拉迭只单位小，真个是人气兴旺，人缘侪老好个，假使理一理，每个人侪可以收到一沓子贺卡。
单位里向比阿拉大个七八岁甚至十几岁个一眼离退休老人，伊拉收到个贺卡一年要比一年少，有个几乎是“颗粒无收”。迭个也合情理，自然规律末。必过，也有例外个，我发现八十几岁个老徐连续好几年收到个贺卡竟然呒没减少，反而增多了，甚至比在职个还要多，真个让阿拉觉着有眼奇怪。
只好搿能介理解伐，老徐呢是一位老作曲家，解放前就从事文艺工作，勒部队文工团服务过，老战友多，手下头个学生也多，还有伊曾经为交关戏曲剧团作过曲，人家侪想着伊，更加主要个是伊本人有才气、潇洒、有高修养，性格邪气个开朗乐观，交往个朋友自然也勿少，新年里向收到个贺卡哪能会得勿丰厚呢？但是，其中也有只疑点：老徐老早就离休勒屋里安享晚年了，平时辰光个信函侪勿经过单位个，哪能会得有介许多个贺卡往单位投送呢？迭个谜底勒伊年年底终于被拆穿了——伊年将近春节个辰光，单位请离退休老同志吃年夜饭，老徐满面春风到办公室来拿伊个贺卡，邪气确定个问：“我个贺卡，十五张，㑚侪看到了伐？”办公室同志一点，的确是十五张，阿拉一记头觉着奇怪，问伊哪能晓得是十五张个，伊笑笑，勿作解释。阿拉就仔细看伊个贺卡，侪是明信片贺卡，字迹有所变化，祝福语也是勿一样个，落款搭仔地址也勿一样，但是贺卡个号头竟然是连勒一道个，迭个辰光，伊“勿打自招”了：“哈哈，自家拨自家恭贺新禧，真个是又猛闹又有趣啊……”
看到老徐笑嘻嘻个表情，我心里有眼讲勿出个味道，心里想伊阿是忒厌气啦，再出搿能介个花头？必过回头一想，老徐有迭能介个情趣，倒也是一桩好事体，至少伊勒买贺卡、写贺卡、寄贺卡搭收贺卡个辰光，是一种享受。其实日常生活当中，老徐搿能介个言行还有得交关，呶，譬如讲，伊常庄会得买一眼蜜饯零食送拨人家，让人家搭伊一道品味享用；伊常庄还会得背仔只照相机，帮认得或者勿认得个人拍照片，然后呢，拿照片送到人家手里，勿求任何回报；伊还常庄帮卖蔬菜搭水果个外来妹咾啥拍照片，假使对方要拿蔬菜水果便宜卖拨伊，伊反而勿拿照片送拨伊拉……老徐个举止好像有眼异常，但是，搿能介个异常并勿是荒唐，用北方闲话来讲，叫做是“找乐子”，用吴方言来讲，叫做是“会白相”，或者“寻开心”。
今朝，快乐个老徐离开阿拉已经交关年数了，只要提到或者看到贺卡，我就会得自然而然个想起伊，怀念伊。
往期回顾：
图：网络 / 编辑：渺渺