南昌路的铭牌记牢了春眠， 却也遗忘和误读了秋愁（下）
沪语朗读：牛美华
南昌路的铭牌记牢了春眠，
作者：马尚龙
推荐：丁迪蒙
南昌路，有一些历史人物，被一块块铭牌证明着，还有些历史人物，只是存在勒辣历史资料里。还有些人搭事，或者有名而无铭，或者有铭而无名。历史个记载搭历史个本身，总是勒勿同个时代，按照勿同个价值观，寻找着勿同个契合。
走到马路对面，南昌路雁荡路口，有一座六层楼个建筑，南昌路80号，中华职业教育社旧址，是当年环龙路个最高建筑了，有桥头堡个感觉。
中华职教社及其创始人黄炎培个历史功勋，勒所有媒体浪侪可以看到，此地就勿多讲。
对于上世纪八十年代心怀“四个现代化”理想个一代卢湾区青年，搿里寄托了伊拉个人奋斗个欲求。彼时此地勿再是中华职教社，而是卢湾区业余大学。来读业余大学个学生，侪已经有了工作，或者没考上大学，或者没去考过大学，来业余大学“曲线救国”。当年个社会，维系着“惟有读书高”价值观。夜里天暗下来辰光，上夜校个青年男女夹了书或者背了包来了。马路黑戳戳，只有搿幢楼里个教室锃锃亮，一只只日光灯就像现在个泛光照明。据我晓得，卢湾区业余大学，后来也是培养了些知名人物个。
再往前推朔，此地是建庆中学。一幢楼就是一所学校，楼顶，还有楼外个雁荡路，侪当做广播操个操场。随着上山下乡个结束，搿所中学也消逝了，以至当年个学生，再也品尝勿到校友会个“乡愁”。
向西走，可以看到了一条大弄堂，弄堂口牌楼有“上海别墅”字样。搿是南昌路浪最“高调”个民宅，因为伊是以“上海”自居个。别墅勒上海，勿一定是有花园个小楼，也没一定个标准，只要是有独用抽水马桶甚至浴缸、钢窗、地板个楼房，也就是比较好个新式里弄，想叫别墅就是别墅了，假使勿是以别墅自称，“坊”也合情合理。
上海别墅勒科学会堂个正对面。沿牢搿一群1916年建造个民宅走进去，几乎每一个门牌号侪可以挂一块铭牌。100弄2号，是陈独秀旧居及《新青年》上海共产主义小组旧址。100弄5号，陈其美故居及中华革命党上海总机关部；100弄7号，民权人士杨杏佛故居；100弄8号，国民党元老叶楚伦旧居；110弄25号2楼亭子间，江-青和唐纳（1935---1937年）旧居。
我读到了一段没经证实个野史，据说是当年在110弄25号做佣人的老人回忆，交关有逻辑性，更无伤大雅：“伊个辰光，我喊蓝-苹为‘蓝小姐’。我跟伊同岁，老讲得来，一有空就到伊个房间里闲坐……蓝小姐因为觉得那个亭子间的房租便宜，就租下来了。来个伊天，只带着一只黑皮箱搭一个铺盖卷。房间里放一张铁丝床，一张写字桌。”1938年，江-青别了唐纳，去了延安。
据说，25号亭子间一直老好出租个。
假使讲，上海别墅个“上海”桂冠，多多少少还是大了眼，葛末，与上海别墅西侧为邻个另一个民宅建筑，倒是正好搭上海别墅倒过来个，有实无名，以至连得一块铭牌个文字记载也滑稽个。“优秀历史建筑”是伊个定性，地址是，南昌路124-134号，138-146号，136弄1-16号；对建筑的描述是：原为花园别墅，1912年-1936年建，新式里弄建筑。所有个元素侪有了，唯独没名字。沿马路一长排三层高个法式民宅，看上去交关典雅，因为没名号，只能称其南昌路几弄几号，没名号实在也是遗憾。
我勒猜想没名号个原因。营造辰光跨24年，营造者一开始没有想好名号，24年后，名号也勿重要了。也或者，营造者可能勿是同一人，造了房子，侪没想过要有个名号。这个民宅群落，既有弄个深度，又有街面个长度，是开放式个，造勒136弄里，还夹杂了其他类型个房子，要起名字也就难了。还算好，上海有一个习俗，可以直接将某某弄当作一个地标或者地址，讲某先生是住南昌路124弄个，听个人就明白了，弄就有了名号个性质。
在迭个有实无名个民宅里，住过名头邪气大个人物。136弄11号，徐志摩陆小曼婚后就住勒此地，为租下这栋三层花园别墅，陆小曼每月要用脱100大洋个租金；136弄39号，傅雷在任美专学校办公室主任辰光（1931年），搬了进来；136弄48号一幢房子里，是中国戏剧、电影节三位极其重要人物住过个地方，底楼是魏鹤龄旧居；2楼住了电影导演搭戏剧活动家应云卫；3楼住个是白杨……
一记头发现，白杨搭江-青住来老近个。勿知道白杨是啥辰光搬过来个，伊比江-青小六岁，或许，没勒南昌路浪比邻过。
伊个辰光搬进搬出是常庄个事体，除了房东，啥人侪是房客。不过，人以类聚，或许可以改为人以类“居”，某一类房子总是只适合某一类人，因为地段，因为租金，因为气场。
可以搿能讲，还有勿少房客，辣后来中国社会发展当中，扮演过各种角色，但是，中国个市井社会发展史，是好人好事与坏人坏事战斗个历史。有种人邪气有名，甚至勒某一个领域有突出个成就，但是勿可能列入正册了。
讲到这一段南昌路个气场，像一把扇子。两个民宅建筑群落是扇面，南昌路是扇骨，至于扇芯，就是昔日个法国总会，后来个科学会堂了。科学会堂，是需要另外文章专写个。伊勒两个民宅群落个马路对面，看上去勿显山露水，却是聚拢了南昌路个文气。文气邪气奇特，伊勿靠任何人为个手段，只是慢慢自然聚拢，且绵延勿散。人勿勒辣了，一块铭牌，像是文气个一根小小导管，传递出来当年主人个气韵。当下个南昌路，还勒享受着搿笔“非物质”个文气遗产。
凡是有文气个马路侪勿宽，行道树总是邪气茂盛，像一顶帽子收藏着文气，好像马路一宽，行道树就无力遮盖，文气就挥发了。
文气还有特别之处，它勿排斥市井气。文人墨客清高但也是要过俗常个日脚。我记忆中个南昌路，有散散落落个小店，牙刷牙膏油盐酱醋，辣南昌路浪侪买得到个，所以，我从来没拿南昌路当作神秘个所在。
当然南昌路个市井气当中，还有高级个市井气，比如近在咫尺个川菜名店“洁而精”。伊个辰光进饭店吃饭个，侪是有钞票人，没普通老百姓个。可以想象，勒洁而精个店堂，啥人经常脱啥人一起吃饭。
现在也会经过南昌路。伊些曾经勒此地居住过个社会闻达，只留下了一块块铭牌，或者啥侪没留下。小店一家连着一家，咖啡馆茶座，勿是应对市井生活，只是为了慕名而来个游客。科学会堂搭两个民宅群落，像一把扇子一样打开着。啥人勒白相搿把扇子？难板经过辰光，我也只是搿能想想。
本文首发于《上海航空》杂志，在此鸣谢。
马尚龙
中国作家协会会员，上海作家协会理事、散文报告文学专业创作委员会副主任；编审。
上海黄浦区明复图书馆理事长。
上海评弹团艺委会顾问。
马尚龙海派文化工作室总监。
著作主要分为三个系列，分别是《幽默应笑我》《与名人同窗》等杂文系列，《上海制造》《为什么是上海》《上海女人》等上海系列，《卷手语》《有些意思你从来不懂》等随笔系列。
2019年出版的新书：《上海路数》——文汇出版社2019年4月出版，网上和实体书店都有售。
图片来自网络
往期回顾：
“上海言话讲起来”旨在传播沪语，若有不当之处，敬请留言指正。
感谢您的支持转发，欢迎关注本公众号