笑中有泪唱“逃难”
沪语朗读：俞颖
作者：周力
沪语改写、朗读：俞颖
昨日搭几个朋友戴勒口罩勒外面碰头，聊到今年春节以来个生活，大家侪有交关感受。其中有一条是所有人侪有个：每日天勒屋里烧三顿饭，米面粮油个消耗忒快了。二十斤大米看上去有一大包，老快就吃光了。有朋友拍拍自家个肚皮：呒没想到搿几日我吃下去介许多碳水。自疫情开始到现在，几乎每日天侪有人提醒我：多买眼米，多买眼油，勿要让冰箱空勒海。前两日股市勿大好，但粮食股逆势大涨。又有朋友焦虑了：哦哟，快点囤粮，侬看看大家侪勒勒抢粮食了。听到搿闲话，我想起了我屋里老人活勒海个辰光，屋里向个柴米油盐必须有备份，一包备用个米、一瓶备用个酱油、一刀备用个草纸……好像只有搿眼囥勒海个物事，再能让伊拉寻着安全感。
小辰光去读书，假使衣裳呒没拉好、书包斜背，老人就会老严肃个讲：“人挺起来，勿要像逃难一样！”当朋友提醒我囤粮食个辰光，我突然想起了老人个搿句闲话，是个呀，逃难，搿是上海人与生俱来个本领，也是上海人挥之勿去个噩梦，深入骨髓、潜入神经，虽然过了几代人，生活已经富足了，但只要有一眼眼风吹草动，“逃难”个意象就会勒心灵深处弥漫开来，让人勿由自主地去看一看自家个存款、查一查柴米油盐……因为忒多忒多个上海人搭阿拉屋里一样，是近代以来历次战争以后，从江浙两省“逃难”过来个呀。
最近一直勒听一眼民国时代录制个老节目，评弹啊，苏滩啊，上海说唱老啥。齐巧听到江笑笑、鲍乐乐个一只节目：闸北逃难。邪气有意思。搿是伊拉1933年录制个，讲个是1932年“一二八”淞沪抗战之后上海个世相。当年个闸北是国民政府重点建设个新城，伊个繁华勿亚于租界。经过两次战争，化为一片焦土。现在闸北地名消失，变成了“新静安”，原来个“西区歹土”倒因为有越界筑路个庇护，成为上海个高尚地区。从吴淞到江湾，宝山路下去叫啥天通庵……江笑笑、鲍乐乐个迭只老说唱，至少有两项价值：一，是日寇侵华活生生个见证。二，是上海人勒战乱中逃生个活历史。
搿只“闸北逃难”，江笑笑、鲍乐乐用个是江南特有个“宣卷”调，是佛教讲经说法用个。上手勒唱个辰光，下手配合一句“南无”。正所谓喜剧最高明个境界是悲剧，“社会滑稽”勿简单，真正勿简单啊。
往期回顾：
图：网络 / 编辑：渺渺