刻花样（下）
作者：张国淼
改写：周红缨
讲述：王幼兰
刻花样是一桩细心个生活，哪能让“花样”刻得好？细节地方哪能处理是关键。具体讲，就是刻花样个辰光，心一定要细，要专注。特别是勒转弯抹角个地方，刻个速度一定要放慢，要刻得清爽，勿好留“毛头”。假使一张“花样”个角角落落地方侪是“毛头”，迭个就是勿清爽，“粗糙”了。当然咾，刀片个也是老老重要个，但是关键还是功夫要到位。
要想拿花样刻好，多看，多比较，邪气重要。
人家刻得好，好勒啥地方？自家勿足，勿足勒啥地方？搿些问题侪要弄清爽。功夫是多思、多想、多练、多多实践个结果，只有勤学苦练再能够掌握迭门技能。要拿“花样”刻好，一定要有自家个物事，要有自家个特色。
前头我讲过，我刻过张“孙悟空三打白骨精”个“花样”，惊动了勿少同学。为了拿搿张图片画得像，我用了把放大尺，放大尺是四根木尺组成个平行四边形，可以伸缩个。一头有只大头钉，用来固定；一头有只圆孔，比铅笔稍微小一眼，削好个铅笔插到圆孔里；平行四边交汇个角有根木钉。
操作辰光，先拿大头钉固定勒台子浪，平形四边形木钉对准小人书“三打白骨精”个图片，勒圆孔下头摆张白纸头。
放大辰光，一面看图个线条，用木钉跟踪，一面控制铅笔。迭能随勒木钉走，铅笔下头就会得画出比实际样图大一眼个图。
初稿画好之后，拿有眼线条加加粗：比方云彩、毛发个线条，勿相连个地方想办法连接起来。当然咾，连接也有技巧个，要连得自然，讨巧，让人家看起来自然，迭个，又搭画图个基本功有关了。
上头个事体做好，就可以刻了。搿张花样，主要是拿“孙悟空”个眼睛刻得“炯炯有神”，猴毛也要刻得“一丝不苟”“毛发毕现”，“金箍棒”刻得笔笔直，“白骨精”个神态也逼真……搿张“花样”我完成以后自家也蛮满意个。
为了刻好花样，勿光铁皮垫板刻得侪是刀痕，斜过来看垫板“银光闪闪”，像煞是满天星星。铅笔盒子浪向原来图案也看勿大见了，上头也是交关刀痕，摸上去“毛拉拉”个，像锉刀……
埃个辰光个刀片侪是长方形个，上头厚眼，刀口勒下头。刻花样只好用刀片下头两头个尖角。
刻花样要勒刀个端口用力，一般刀片两端老快就秃脱了，也就勿好再刻了。同学一般就去买新个再刻。我会拿老虎钳夹牢刀口，掰脱一只角，秃脱个刀口旁边会有新个刀口，就又好刻花样了。迭能，同样个刀片，我就可以多用交关辰光。搿虽然是桩小事体，但延长刀片寿命要动脑筋，再好想出办法来个。
小学后期“刻花样”勿大流行了，学堂要求学生仔侪投入文革当中去。
小学毕业，就近分配我分到图们中学去读书。
记得有日天，我勒操场浪搭个同学讲白相，讲到小辰光刻花样。伊讲伊拉十一班个班主任“刻花样”个技术邪气高个。用红颜色蜡光纸刻了“马恩列斯毛”个画像。伊讲去过班主任屋里。勒老师屋里向贴当中个墙壁浪，挂了只横过来摆个金边镜框，里向就是搿个“花样”。我呒没想到，学生仔欢喜刻花样，介大个老师也欢喜刻个？
从此，我对迭个老师比较关注起来了。迭个老师教语文。听讲伊个语文水平老高个，虽然“文革”期间，外部环境勿好，但伊尽可能让学生多掌握一眼语文知识，所以同学对伊蛮佩服、蛮尊敬个。
隔仔介许多年数，过去几十年、遥远个搿些往事，现在想起来，就像勒眼门前一样。
往期回顾：
图：网络 | 编辑：渺渺