回力牌运动鞋及鞋垫 / 四六文摘

沪语朗读：晓闻

朗读者

回力牌运动鞋及鞋垫

原创：老周望野眼

改编：郭莉

推荐：丁迪蒙

朗读：上海人民广播电台，晓闻

人侪欢喜回忆，希望勒勒回忆当中寻到现实生活里向呒没个、落脱个物事。但是回忆交关辰光侪勿是老真实个。搿歇呒没个，勿见得回忆里向就有勒海。

我欢喜运动，跑跑跳跳个水平末还可以，搭小辰光个朋友一道讲闲账个辰光，听伊拉常庄要讲起“回力牌运动鞋”。但是我心里明明记得，回力牌运动鞋是专业运动队员再可能拥有个，阿拉搿种业余爱好者，着个顶多是呒没任何标记个“白跑鞋”，啥个牌子已经记勿得了。大概好一眼个是飞跃牌运动鞋，推板眼个是解放牌军用跑鞋，咸菜色个。要讲回力牌？迭个绝对是高高在上个哦！

所以过脱多少年之后，回力运动鞋专卖店开得到处侪是，连80、90后个后生，侪勒勒以脚浪向有双回力鞋为时尚个辰光，我是毫勿犹豫个买仔一双，为啥？“回忆青春”呀！侬要晓得，当年搿种鞋子是着勿起个。每趟看到回力运动鞋广告写啥“当年中国的校园、工厂和田间地头，满是红底白边的回力鞋……”，我只好对牢伊笑一记。搿个辰光一双回力运动鞋个价钿，相当于工人小半个号头个工钿，搿个就是中国球鞋里向个“爱马仕”啊！

回力运动鞋历史，可以追溯到1927年。江苏江阴人刘永康，原来是个杂货店伙计，他勒唐山路开出了义昌橡皮制物厂，生产“八吉”牌胶鞋。1930年，刘永康个厂改组为正泰橡皮制物厂，1934年又勒“正泰”后头加了“信记”两个字，注册了中文名字“回力”搭仔英文名字“Warrior”。

今朝来看“回力”商标个诞生，倒是充分利用了传媒。1934年10月7号，《申报》浪向登了则消息讲，回力球鞋更名成功、商标揭晓，迭则消息是头版头条。回力个意思是“回天之力”，英文名“warrior”，正好对应中文“勇士”个涵义，回力商标用个是后羿射日个典故，正好也包含了抗日元素。上世纪三十年代，中国积贫积弱，正勒抗战个前夕，射日、回力，自然就马上成为当时青年人个时尚。

1948年，最后一届民国全运会勒上海江湾体育场举行，回力运动鞋用飞机撒传单搿能个办法，进行广告宣传，还联络了当时交关体育界、新闻界人士为自家站台宣传，一时浪向，回力运动鞋风头出足，再也呒没第二家好搭伊竞争。全运会结束，辽宁篮球队因为辽沈战役倒是回勿去了，勒体育界人士钱旭沧先生个介绍下头，回力收留了搿批球员，组建了“回力篮球队”，后来搿支球队个勿少球员成为新中国篮球运动个骨干。

1949年以后，经过公私合营咾啥多次改组，回力始终是中国运动鞋个老大、头牌。中国国家男子篮球队着个“五六五”高帮篮球鞋是中国几代篮球人个御用装备。1979年五六五推出低帮款式，就是著名个“WB-1”，阿拉小辰光心心念念想要个好物事，就是搿个WB-1了。还有中国乒乓球队、中国女排、中国女篮……直到上世纪八十年代末，回力牌运动鞋勒世界赛场浪向，仍旧是呼风唤雨、驰骋千里个，1984年中国女排拼得洛杉矶奥运会金牌，着个也就是回力运动鞋。

九十年代洋品牌搭仔福建生产个国产品牌开始大量进入市场，回力运动鞋终于风头落下来了。我当年也是伊个叛徒，九十年代刚刚开始实习，赚了一眼稿费，自家买个侪是耐克、阿迪达斯，还有Asics、美津浓、彪马、Diadora、Kappa、le coq……咾啥。上海生产好像已经拨大家忘记得干干净净了。一直到搿两年，回力、飞跃牌运动鞋终于是“出口转内销”了，先打开欧美市场以后，再回转头重新成为中国年轻人个时尚了。

我有个习惯，就是运动鞋着坏脱以后，鞋子厾脱了，鞋垫倒是舍勿得掼脱，勿关是皮鞋也好，布鞋也好，我欢喜垫一双运动鞋个老鞋垫，搿能勿关着啥个鞋子，脚底侪是适适意意个。我买了一双复刻版个回力WB-1，登时立刻就有了少年时代篮球运动员个错觉，好像又恢复了青春。但是鞋子着了呒没多少辰光，脚底就提抗议了。鞋子外观是老漂亮个，鞋底偏偏是薄得来要命，也呒没啥特殊设计。我只好用一副外国品牌运动鞋个鞋垫去垫勒海，乃末总算重新有了运动活力。看来国产老牌子，只有阿拉个情怀还是勿来事，啥辰光阿拉自家个鞋垫也可以做得老好，让欢喜着国产运动鞋个各位，觉着实在适意得勿得了，葛末再好讲是真正个“回天有力”了。