故里春秋（七）
作者：朱海洪
沪语改写：边秦翌
沪语讲述：顾天虹
新昌路浪最风光个人是张昌楣。
每日天大清老早，张昌楣就拿伊个搪瓷茶缸捧勒海从自家屋里向走出来，晃晃悠悠个从“三德里”来到新昌路浪。伊一边踱勒方步，一边嘴巴里勒哼《空城计》：
“我今在城楼观山景，耳听得城外乱纷纷……”
刚刚开了只个头，屁股后头立马跟得来一群小囡，朝牢仔张昌楣个背影一道哇啦哇啦个叫起来：“张昌楣、杨燕秋；张昌楣、神经病！”
搿歇想想真个是邪气勿好意思，我常庄也混勒搿帮子小囡里向瞎起哄。
张昌楣呢，像煞是啥也呒没听到一样，继续笃悠悠、慢吞吞个踱方步。伊走发走发，突然之间一只急转身、扑过来，吓得来搿眼小囡侪来煞勿及个逃。伊就回转身体照样摇头晃脑个踱方步。等到伊开始得意忘形个辰光，搿眼小囡又邪气小心个围拢起来，有开始哇啦啦啦叫了：“张昌楣、杨燕秋；张昌楣、神经病”。
张昌楣回过头来，朝伊拉笑笑，还是笃悠悠介个朝前头走。小囡是越跟越多勒呀，乃末，张昌楣又勒末生头转过身来，手臂把一伸，拨伊捉牢了一个，顶顶要命个是，呆呆叫拨伊捉牢个就是我个手。
“侬，叫啥个名字啊？”伊拿只嘻皮塌脸个面孔贴过来，我是吓得魂灵头也呒没了。想用力拿只手抽回来，但是，就像是拨老虎钳夹牢了一样，随便哪能也动勿了。
“伊叫啥个名字啊？”看到我要哭出来个样子，伊就问旁边个人了。
“伊啊，伊叫海洪。”有人回答伊。
“海洪？噢，海～洪，海～呃洪！哈哈哈哈哈哈！”张昌楣头往上抬起来，穷笑八笑。突然，伊又压低声音问我：“杨燕秋，是侬个班主任伐？”
“勿是，勿是个。”我快点摇摇头。
“勿是个？噢！”伊拿我个手松开来，眼神就像只蜡烛一样，亮了一记又暗下去了。
“嘀-铃-铃-铃-铃”！学堂里向个上课铃声一记头响起来了，张昌楣屁股后头个“小尾巴”呼一记，好像侪拨铃声吸进去了，周围一个人也呒没了。
路旁边个学堂是我小辰光个母校——新昌路第一小学，跟勒张昌楣屁股后头个小囡侪是“一小”个学生仔。小朋友乱叫八叫，是因为伊拉实在气勿过，张昌楣，迭个像告花子一样个人居然看上杨燕秋老师了，葛哪能来三呢？
杨燕秋，是“一小”个老师，邪气漂亮个，长得蛮长个，高挑玉立，走起路来呢，就像风吹柳条，张昌楣哪能可以看上杨燕秋个呢？小朋友拉实在是想勿通呀。所以呢，只要一看到张昌楣，搿眼“一小”个学生仔侪必定要跟勒伊个屁股后头乱叫八叫。
张昌楣，一个三十几岁个男人，看上去有眼邋里邋遢，但是其实仔细看看伊，相貌还是相当勿错个。一张四方个国字面孔，大背头，头发又黑又浓，油光光个，浓眉毛，鼻梁浪向戴副黄渣渣个近视眼镜，鼻头有眼勾，嘴唇皮薄薄个，下巴阔中收尖，有眼大知识分子个腔调。只可惜伊个面色是青白个，一年到头穿仔双后跟也烂脱个布鞋，指掐呢，是又长又黄，走起路来，有点呴背，昂好仔头一伸一伸，一副穷酸个文人相。
张昌楣书读到高中毕业，假使勒科举时代，就算是个举人了。本来应该有蛮好个前程个，可惜勒勒读书辰光失恋，发神经了，就开始混日脚，最后混到只好靠救济，伊整天勒勒新昌路浪向东荡荡西荡荡。
荡来荡去，伊勒勒学堂门口看到了杨燕秋了，哦呦，乃末眼睛看花脱唻，神智无知唻，拿伊久违个原始情感挑动起来了呀。但是啊，因为自家介潦倒，实在觉着惭愧，只好勒勒心里向单相思。伊只要看到“一小”个学生，就常庄要屏勿牢，要拉牢仔伊拉问问杨燕秋个事体，搿能介，再引起搿眼小囡个大呼小叫。
小囡拨学堂个铃声吸走了，张昌楣就捧牢仔茶缸朝“广泰”走过去。过马路个辰光，伊从地浪向捡起一截还烊勒海个香烟屁股，叼到嘴巴浪，“吱”猛吸一口。“广泰”前头有得烟客看到伊，就喊：“张昌楣，香烟屁股勿要了，来支飞马，讲故事好伐”。
朗读者
往期回顾：
图：网络 / 编辑：渺渺