上海人“斗螊绩”
沪语朗读：王浩峰
原创：看懂上海
沪语改写：俞颖
诵读：王浩峰
上海人老欢喜白相蠊绩个，秋风一刮，就是斗蠊绩个好辰光了。
一直以为“斗螊绩”是夏天介个事体，因为只有勒夏天可以听到“螊绩”个叫声，也是勒夏天个夜里拿了手电筒、网罩、竹筒到处去捉蠊绩；小辰光“斗螊绩”，还是勒赤日炎炎像火勒烧个夏天。实际浪，勿单勒从前，就是勒现在，真正个“斗螊绩”，却是勒秋天鸣锣登场以后了。
养虫人当中有“早秋饲养，中秋猛斗，晚秋叹息”个讲法。业内行家讲，热虫之早熟虫，开斗是勒白露前后；热虫之中熟虫搭仔三秋虫，则勒秋分前后；而冷虫之晚熟虫，是勒寒露前后，冷虫之冬熟虫，却是要到霜降前后再打斗了。
据记载，上海地区“秋兴”最盛个辰光，是勒清朝个中叶，最盛行个地方是勒枫泾个北市桥。有竹枝词写：“金风花开玉露中，戏将纤指染深红。郎从北市桥边过，试买新雕蠊绩笼。”但是，当地是勿产蠊绩个，老法师眼睛里向上海出“螊绩”个地方，是勒七宝、三林塘、花木搭仔吴淞。
的确，老底子要去捉“螊绩”有勿少好地方，公园、绿地里、冷僻个马路旁边，甚至小弄堂个角角落落里向。捉牢雄个“螊绩”，上海人称伊为“二尾子”（尾子，读“妹子”），雌个叫做“三尾子”。
“三尾子”捉来只是搭“二尾子”做个伴、结结铃个：“二尾子”决斗个前一个夜里，必须放一只“三妹子”进去服侍，等侬拿“三妹子”放进去以后，假使“二尾子”相亲成功，就直接进行同房；假使相亲勿成功末，就要调一只“三妹子”进去，直到同房成功。到第二天，“二尾子”必定会得斗志大增，奋力搏杀。
“二尾子”的确会斗，一副大牙咬牢对方，胜利了还要追杀，追杀当中还会得振翅鸣叫。“螊绩”生性好斗，一旦落败，就万念俱断，再也勿肯搭人家来厮杀了。失败个“螊绩”上海人叫伊“败鬼螊”。“败鬼螊”邪气作孽个，伊唯一个出路，就是送拨弄堂里向低级别个小囡去养白相。
败过个“螊绩”是呒没用个，碰着“定头货”马上又会露出马脚，掉头就逃。因此，“败鬼螊”又被称作“二先生”。变成了“二先生”个“螊绩”会得有一条生路，小朋友会去寻一片破砖乱瓦、或者草地乱岗去拿伊放生，希望明年仔伊能够生出一堆新个战士出来——所以讲，弄堂里向要是听到蠊绩叫，大家未必有兴趣去捉，为啥呢？弄勿好就是“败鬼螊”。
老底子，上海还有“螊绩”个交易市场，延安路、连云路口子旁边个新城隍庙前头就有一个。勒“螊绩”上市个季节，各路个白相高手，拎了自家精选个“螊绩”，跑来交易，或者是来“斗螊绩”比赛。市场里向还有各式各样养“螊绩”个用品，从盆到缸、从捉虫用个网，到“斗螊绩”用个草，应有尽有。
斗，就有输赢，双方讲定价格，到辰光赢个一方拿走奖金个同时，又可以拿得胜回朝个“螊绩”。而输脱个一方则是既输了钞票，又输了人。
“斗螊绩”通常是勒一个事先准备好个磁罐当中，放入二只事先精心挑选好个“二尾子”。两家头先是退到一边，探望对方，猜测对方个意途，主人用一根长长个猫耳草，用毛茸茸个一端挑起双方个争斗，一方火起，就会得冲向对方，如果对方迎战了，葛末战火就此开始。
迭个“挑斗”绝对是要讲技巧个，尤其是草要弄出须毛来，必须拿草个“辫子”扳下来，然后用老快个速度往上头拉、扯，搿能就会得出现伊种草浪向个须毛。须毛扫过以后，“二尾子”就会张开两只大牙齿，告诉侬，伊准备好搏斗了；要是须毛略过，“螊绩”呒啥反应，乃么完结，要么雄性勿足，要么内分泌失调，要么是侬捉了一只“败鬼螊”。
要“斗螊绩”，当然先要学会哪能介养“螊绩”，通常“螊绩”要放勒泥土制作个陶土罐子里，可惜个是，有段辰光像样一点个罐子勿大寻得着，也有放勒梅林午餐肉铁罐里向个，不过要填一层草纸再能让蠊绩立得比较稳。喂“螊绩”，也是门学问，多了容易得肥胖症，不思进取搏斗，假使吃少了，当然就要营养勿良了啦！
侬看，上海人讲到“螊绩”有多少花头，别个勿讲，只要看看上海闲话里，有多少跟伊有关个就晓得了：做事勿顺叫做“螊绩勿开牙”；经常吃败仗个就是“败鬼螊”；假使有人讲侬像只“螊绩”，搿勿是勒夸侬好斗，而是讲侬欢喜上蹿下跳，惟恐天下勿乱。
上海闲话里个“棺材板”，就是从一种形似“斗螊绩”个昆虫引申而来个，因为伊个头部前方扁平，像一块做棺材个木板，而且搿种蠊绩无法用来斗，所以得此形象而难听个俗称。因此呢，上海人也拿呒没用个、占地方个，类似平板状个物事讲成功“棺材板”；勒骂人个辰光，就有拿脑子勿转弯、立勒勿动或者做事体死板个人，骂成“像棺材板一样”。
图片来自网络
吴侬细语吟诗词歌赋
往期回顾：
“上海言话讲起来”旨在传播沪语，若有不当之处，恳请留言指正。
感谢您的支持转发，欢迎关注本公众号