一片梧桐叶 / 四六文摘

沪语朗读：渺渺如胭

朗读者

一片梧桐叶

作者:林建明

沪语改写：俞镝

指导推荐：丁迪蒙

朗读：丁曙立

停车等红绿灯个辰光，一片落叶慢悠悠，慢悠悠个从车窗门个缝隙里向飘进来，越过我个手臂把，紧紧个贴勒方向盘上头个平板浪向，变成功了一幅画，黑颜色个塑料板变成了伊个底色。

红灯邪气快个跳成了绿灯。

我来勿及多看伊一眼，就像来勿及送伊到应该落下去个地方。伊就静静叫个趴勒我个眼门前，陪牢仔我开了老长个一段路，像模像样个开进了村委会个院子里向，面对门卫个举手示意竟然睬也勿睬。

停好车子，我细细叫个看看伊：搿是一片梧桐个叶子，宽宽大大像把扇子，正好对牢我个是伊个叶柄，落叶个疤痕邪气新鲜清晰，好像能够闻到伊流出来个青汁个涩嘴巴个味道，连接叶柄个是蜘蛛网个脉络，由粗逐渐变细，伊有像枫叶一样好看个身姿，却呒没枫叶深红个外衣。

我想，伊原本可以勒勒树枝浪向多挂几天再飘落个。

尽管看上去已经有眼发黄了，四周还有眼枯焦，但靠近叶柄个地方仍旧有一眼绿颜色，生命个迹象仍旧呒没完全消失，岁月个风尘伴牢仔昨日夜到个露水，涂满了叶面，大概是因为忒多个重负，也可能是立得高，看淡看空了，想得也就更加透彻，大概是勿能忍受深夜个寒冷，伊离开了自家个生命之树，却匆匆忙忙个钻进了我个窗户，落勒车子浪向，搿大概就是一种缘份伐。

勒春天里向，伊青涩过，葱茏过，阳光雨露对伊百般个宠爱过。

勒村子里向，我接到了儿子个电话，讲508号勒造房子个房东，伊个老父亲过世了，问我要勿要去看看，我也勿懂搿些规矩，只好回答伊，等我问问别人看。

搿个老人今年已经九十三岁，属于高寿了。四月份房子开工个辰光，我没看到搿家人家有老人个，造到第三层，有天跑过去看看，再发现底层靠西边个窗洞拨彩条布封起来了，走进客厅里向，也可以看到房间个门洞浪装了临时个简易木门，透过歪歪扭扭个门缝，我看到了一个面色灰黜黜，看上去身形枯萎了个老人，蜷成一团睏勒木床浪向。房东是后招个女婿，伊讲老头子恐怕活勿了多少辰光了，让我抓紧眼。

搿螚算起来，伊勒床浪向也已经睏了半年辰光了。生命之叶已经枯萎，大概，离开人世对自家、对屋里向个人侪是一种解脱。

想一想，人个一生又有点啥呢？整天好强好胜，争天夺地、争到归途末路个辰光，大概也像一片树叶子差勿多，飘然逝去。

今朝早浪向开车出门，伊片叶子还勒面前，风干了个叶子已经勿再舒展，卷成功喇叭个样子，经勿起碰了。

车子路过一块荒地旁边，枯草萋萋，搿搭应该是伊个归宿。我伸出手用力一挥，伊却再也勿能潇洒个飘扬，闷闷个落勒车子个边浪想，一阵风吹过来，耳朵边浪听到了伊翻滚个叹息声。