冬天个风铃 / 四六文摘

沪语朗读：孙维陵

朗读者

冬天个风铃

作者：林建明

改写、朗读：孙维陵

推荐：丁迪蒙

坐勒了姆妈个房间里，从大门朝南面望过去，尽管门前头还有一栋两层个小楼房，但是越过屋顶，仍旧可以看到伊棵梧桐树个枝杈。曾经像大人手掌一样个叶子，熬过了秋风苦雨，却敌勿过冬霜，似乎勒某个冬夜，实在是忍受勿了风霜个欺凌，统统从树丫子浪向飘落下来，只留下来了一点点稀稀拉拉个果子挂勒了勒空中，像是一只只风铃，哼唱了一首我听也听勿懂个曲子。

我随便哪能也想勿起来搿搭还有一棵介大个梧桐树。

但是，我还记得勒伊个北面是我一个同族大伯伯个房子：三间邪气低矮个平房，泥墙灰瓦，进出搿扇旧个木门个，是矮端端个大娘，搭仔伊个三个小囡。大伯伯当过兵个，复员退伍以后拨安排勒铜陵个有色金属公司工作，是队里向个人侪邪气羡慕个、拿工资个人。土地到户后，伊拉屋里勿种地，也勿种菜，也呒没跟隔壁人家打声招呼，一家门突然之间就搬脱了，像树丫子浪突然落光个叶子，只剩下来低低矮矮个房子，勿声勿响个拨时光勿停个埋怨。

我记得大伯伯一家人家个样子，也记得房间个样子，还记得东面，就是阿拉经常偷偷叫跳下去汏冷水浴个大河浜个样子，但是，就是实在也记勿起搿棵梧桐树个样子了。大概，伊个辰光伊还呒没出生，也可能像一棵类似蒿草个幼苗，混勒草丛里向。呒没人种，呒没人修理，也呒没人爱伊，廿多年个风风雨雨里，伊拼仔命个长大了。

我结婚搿年去到铜陵去进货，顺带便去看看勒扫把沟做生活个弟阿弟伊拉，碰到过大爷爷个，还勒伊个屋里吃过一次饭。记得伊住个也是平房，还是没屋面个搿种，吃饭个厅老老小个，一只小小个八仙桌，旁边几只矮凳，再要想走人就呒没办法了。大娘伊个辰光还勒“待业”，有辰光做做各种零零碎碎个生活。好像过得勿哪能，呒听到抱怨声，却也呒看见伊拉到村子里来过。过脱两年，住勒伊拉房间西面隔壁个二爷爷也搬脫了，两份人家个大门上侪挂好了锁，出入门缝个鸟，是麻雀，勿再是燕子了。

出去个人是越来越多了，到我走个辰光，大爷爷屋里个一排房子已经倒塌了，一眼一眼个，可能是先落下来几块瓦爿，一根行条，再到屋面，后首来整片墙牵连到二爷爷屋里个房子也全部塌脫了。像一条被打到七寸，瘫勒地浪向个蛇。房子倒脱了，草啊，藤唉啊就老快个吞没了搿片房子个基地。

大概是伊个辰光有了搿棵梧桐树伐，或者是已经蛮高了，但我又勿大回转来，即使回来了也没注意到。从此，每年个冷天，就有了风铃一介头勒空中哼唱，唱一眼路过个人侪听勿懂个曲子。

“凤凰鸣矣，于彼高冈。梧桐生矣，于彼朝阳。菶菶萋萋，雍雍喈喈。一叶而知秋”等等，等等，搿些侪是赞美梧桐树个。

勒我老家，所有个树种侪像是天生个，并呒没人刻意去栽培伊拉：桦树，柳树，梓树，椿树还有楝树，桑树占据了村庄个空间，直到现在连棵香樟树也呒没，勿要讲银杏，白果咾啥贵重个树种了。梧桐树勒伊面更加勿受欢迎，梧桐树枝散冠大叶密，好看但是勿中用，材质脆容易发翘走型，轧出来个板容易断裂，当柴爿烧也呒没火焰，还有，伊老大个树冠虽然可以拨人带来阴凉，但也遮挡了阳光，农民啥人屋里勿收点农作物，勿需要摊勒门前个场地浪去晒晒干再收藏呢？所以，即使卖也是勿值铜钿个。

我相信大爷爷假使勿搬脱肯定也是容勿得让伊勒屋子个基地浪长大个。

容勿得个事体多来唻！村庄好像是越来越大了，像一个虚胖个人。村边头周围以前侪是小菜地，交关人搬脫了，走个辰光，家俱可以带走，搿片土地却是没办法带走个，勿知勿觉当中就拨树啊、草啊占据了，邻居屋里个地就长勿出菜了，因为肥料侪暗暗叫拨地里个树根吸脱了，树也就长得越来越茂盛。侬可以修剪伊伸出来个树丫子，却挖勿脱搿棵树，再讲勿是一棵、两棵，而是密密麻麻，杂乱无章。村庄越来越大，房子越来越高，人却是越来越少了。

年轻人向往钢筋混凝土筑成个城市森林，回到屋里就像候鸟还巢，蛮多小人，户口簿浪写了搿搭，却侪是养勒城市个温床浪，连乡下头个空气也呒没吸过一口。

土地呢，大部分转拨种粮大户了，曾经拿土地看得像性命一样，走路也要顺手拨把草个一辈人，头发已经侪白了，腰也弯了，但仍旧会得屋前屋后，地头、沟边开点荒，种点小菜地；年纪轻点个妇女是勒屋里带小人，勿能外出个，邪气空，用勿着忙农田里个生活，也勿会做针线生活，送好小人回来，就坐到牌桌上了。村庄里日里向看勿到扛勒锄头，挑勒类桶，牵仔老牛个农民，夜头也来得蛮早，七八点就看勿见灯光了，村庄老早八早就睏着了，狗也睏着了，村里向显得特别个宁静。

“蒹葭苍苍，白露为霜”。村里呒没芦苇，只有野草，以前村子里连得树叶也拨竹耙，扫帚收作得干干净净，变成功烧锅炉、火粪堆里个柴火，灰还是会得撒到农田里去个，“质本洁来还洁去”。唉，现在个村庄还有啥人去收作呢！

最近看到过一篇网络文章，“有人讲中国现在最大个危机是房地产泡沫，一旦中国个房地产泡沫破裂，中国个经济将会受损个！但是，现在个中国最大个危机并勿勒房地产，而是勒一个侬看勿到，甚至意识勿到个地方，搿就是农业、农民、农村”。勿晓得迭个观点是勿是正确，但我晓得勿少村庄真个是慢慢叫空脱了，多年以后，村庄是勿是会得越来越寂寞呢。

冬季越深风越硬，梧桐树浪个风铃也越沉闷了，像煞是勒为冬天唱一曲挽歌，但愿勿是勒为乡村唱挽歌伐。

冬个后头就是春呀！