拎了篮头拷酱油
沪语朗读：冯济民
朗读者
拎了篮头拷酱油
作者:冯济民
朗读:冯济民
推荐:丁迪蒙
现在人老了，常常会回忆起交关老早底个事体，搿就是怀旧。最近勿晓得哪能了，忽然想起当年拎了篮头去拷酱油个情景来了。
当年，勒各条弄堂附近侪有一家油酱店，专门卖油盐酱醋老啥个。搿个辰光勿像现在，搿眼物事侪是勒超市里买瓶装、桶装、袋装个，而是要零拷。记得当年拷酱油、老酒勿是秤份量，而是用竹筒做个提桶拷。搿种提桶有半斤、一两、二两等勿同个规格。伙计用提桶到酱油瓫或老酒瓫里捺酱油、老酒拷出来，再勒瓶口摆一只漏斗慢慢倒到瓶里去。盐也是秤分量卖个，分为粗盐搭细盐两种，侪是散装个。油分为生油（就是花生油）、豆油（就是黄豆油）两种，也是零拷。原来也侪是用提桶拷个。后来发明了半自动油泵，伙计倷拉柄拉到指定个刻度再压下去，一定份量个油就通过漏斗流到瓶里去了。酱油分为白酱油（其实就是鲜酱油）、红酱油两种，也侪是零拷个。另外还有零拷酸醋、甜面酱、辣火酱、花生酱佬啥个。
记得搿个辰光每个礼拜天，到油酱店商里去买油盐酱醋是姆妈交拨我个任务。一只大篮头里摆勒各种瓶子。我拎了篮头去买，回来满满一篮头，老重个。搿个辰光是计划经济，还要带好各种票证去买。
记得前几年，我曾经勒报纸浪看到一篇报道，题目是《最后的"零拷"油酱店面临关门》。讲个是勒虹口区溧阳路个一家油酱商店，过去经营十多种零拷商品，现在只剩下4种了。据资料显示，1951年是上海零拷油酱商店个鼎盛时期，当时一共有1869家。后来，随着市场经济个勿断发展，零拷油酱商店越来越少。1964年减为1016家。到1995年就只有646家了。现在，还保留零拷个油酱商店就更是凤毛麟角了。根据相关登记，记者致电了十多家油酱店，结果勿是电话呒没人接，就是已经改为其他经营了。勒江西路浪个“大不同油酱店”表示，现在还有“零拷”个花生酱供应，但零拷个醋搭油、盐等佬啥侪已勿再销售了。
时代勒进步，经济勒发展。阿拉个生活水平也勒勿断提高。拎了篮头去拷酱油个日脚已一去勿复返了。但勿晓得哪能个，我还是蛮怀念搿歇辰光个。
点以下文字可以听到精彩回放：