石库门过街楼的风景
沪语朗读：施扣柱
朗读者
石库门过街楼的风景
作者：陈建兴
来源：夜光杯
改编：郭莉
朗读：施扣柱
推荐：丁迪蒙
过街楼是上海石库门弄堂里向个一道特别个风景线。
过街楼一般侪是弄堂口个标志性建筑，上头有半圆拱圈个花枝缠绕浮雕，下头是一方匾额大小个空白，用水泥砌出立体个字。仔细看看，迭眼颜体、欧体个字写得是邪气典雅个，交关还刻了弄堂建造个年份。迭个呢，总归是嵌勒勒过街楼个正当中个。
过街楼一般侪是跨勒弄堂口，楼浪向住人，底下头照样好通行个。得天独厚个位置，赛过一座瞭望塔，一排窗门对牢弄堂里向，对过一排窗门又正好对牢外头个马路，两边各有风景。特定个居住环境形成了特有个风情。
一清老早，勤劳持家个家庭主妇已经买好了小菜，逼煞人个热气还勿曾发出来，过街楼下头个穿堂风，既凉爽又清新，大家侪各自搬只小矮凳出来，拎了菜篮头聚勒一道，谈家常嘎山湖，一边又剥毛豆又拣菜，削洋山芋刨丝瓜，扚好豆芽再扚豇豆。勿晓得哪能一来，话题转到了勒边头低头修套鞋个小皮匠身浪向，有人讲要帮伊介绍女朋友，小皮匠开心得两只眼睛眯成功了一条缝。伊勒过街楼下头摆摊头已经是交关年数了，开头是跟仔伊个师傅从苏北农村到上海个，后首来呢，独立“门户”，勒搿搭自摆摊头。伊大约莫三十多岁，搭弄堂里人侪混得老熟个，进进出出，大家侪会得搭伊打声招呼。有常时人家屋里下馄饨，也会得端一碗让伊尝尝；有人家过生日烧了排骨面，也会送一碗拨伊吃吃。小皮匠帮弄堂里人修鞋子个收费，也是邪气便宜个，问伊讨眼补套鞋个胶水，要么讨几只“钉掌子”个鞋钉，拿伊一块车胎皮，小皮匠从来侪是爽爽快快拨人家个。
大热天个下半日，太阳顶顶猛，热浪滚滚，弄堂里总归有几个老人搬只躺椅过来，摆勒过街楼下头，再拿只骨牌凳，又拿只印了厂名个搪瓷杯，泡好一大杯大麦茶放勒凳子浪，人横下来，咪一口茶，摇一记芭蕉扇，迷迷糊糊睏着了，边浪向一只半导体收音机还勒唱沪剧《鸡毛飞上天》。夜快头，背阴通风个过街楼又成了一帮小囡个避暑胜地，有个摆只小台子算廿四点，有个搁好架子打起康乐球，有个欢喜勒搿搭斗二尾子（音同：腻眉子）三尾子（音同：三眉子），更多个小囡勒勒白相跳棋、飞行棋，还有军旗四国大战咾啥。
有勿少过街楼个房子年久失修，楼浪人家地板缝大得吓人，扑勒地板浪好看到楼下头进进出出弄堂个各种人。碰着落雨天，弄堂里个人家只好跑到过街楼下头生炉子，升腾起来个烟雾，一丝丝个也侪钻进了楼浪人家屋里，熏得老人是咳嗽穷，只好去拿席子铺勒地板浪向挡烟。有辰光，楼浪人家拖地板，楼下头呢，正好是一桌牌摊头，水滴滴嗒嗒渧勒打牌个人个头浪向，“哎哎！楼浪向撒尿出啦？”打牌人呴得要死，哇啦哇啦个骂起来，手里向还是紧紧捏牢一副牌勿肯放。楼浪夫妻寻相骂，家生掼得“乓乓响”，楼下头正好是一筑堆看人家走象棋个朋友，有种人勿耐烦了，就拿起一把丫杈头，对准头顶浪楼板一阵乱戳，“覅吵唻，烦煞脱了，吃仔眼泡饭，哪能有介大力气啦？歇歇好伐？”话音一落末，楼浪寻相骂个夫妻好像得到了“休战令”，一记头啥个动静也呒没了。
我老欢喜到万航渡路一个住勒过街楼浪个同学屋里去，特别欢喜拿头伸到窗口外头去，看看马路浪车水马龙个景象，再回过头到搿面，靠勒窗门看看弄堂里向忙忙碌碌个一家家人家。阿拉勒迭个同学屋里放纸头鹞子，掼纸头飞机，用弹皮弓弹老近个电线杆浪向个麻雀、鸽子。麻雀飞脱了，“子弹”倒飞到对过人家个玻璃窗浪，“叭”一记，玻璃变成了放射花纹。我吓煞脱，要紧拿头缩回去，蹲勒窗门下头，等牢对过人家“骂山门”。过脱交关辰光，一眼动静也呒没，我迓迓叫抬起头来看，对过人家居然呒没人哦！我快点关好窗门，拉好窗帘，轻轻叫下楼去，一路小跑逃到自家个屋里向。
过脱几天，我又到迭个同学屋里向去，敲碎人家玻璃窗个事体并呒没人讲起，我个心终于好放下来了。乃末又扑勒地板缝浪看风景。楼下个剃头摊、水果摊、裁剪摊一只挨牢一只，招揽生意个，讨价还价个，构成了独特个弄堂生活交响曲。
现在，过街楼勒城市里向已经看大勿见了，搿种色彩斑驳个市井画面，也慢慢叫个拨尘封勒一日日老下去个记忆当中了。但是，伊到底也是城市温度个一只侧面、一种风情，对我迭个一代人来讲，还是常庄要怀想，要回忆个。
点以下文字即有精彩回放：
泡饭
泡饭（二）
泡饭（一）
听自己讲那过去的事情
游踪：七分游伴三分景
搿一碗热气腾腾个羊肉汤
坚持做好自己
忆王孙
大自然母亲
解放前个石库门天井
图片来自网络