现代“钟点工”起源老上海
作者：王建运
沪语改写：冯济民
朗读：冯蓉
上趟讲了旧上海女佣个来龙去脉。其实，女佣群体当中有一个老大个分枝，叫做"走做"，也就是现在讲个"钟点工"。搿是到现在一直流行勒上海个保姆用工方式。搿种灵活个帮佣做法起源于啥辰光、啥个地方？恐怕交关人一时头浪也蛮难讲清爽。但是我可以告诉侬，现在"钟点工"个一套做法，起源于老底子个旧上海。
首先，要讲讲旧上海女佣个原籍地域分布。抗战胜利以后，上海女佣大部分来自江南搭皖南地区，以浙江个南浔、绍兴、宁波一带农村为多，特别是南浔搭湖州一带。至今一眼旧上海世家个后代，仍旧习惯雇佣搿一带个中年妇女。湖州、南浔是江南首富个集中之地，上海交关有钞票人个老家大多勒搿一带。此地个人生活细节讲究精致，特别是女性，对美肴个烹饪邪气熟，手也巧，言谈举止又比较斯文清雅。伊拉到上海做女佣，最受上海公馆人家欢迎。勤劳壮实个女人假使能够成为上海人家个女佣，或许便是今后最好个生计。
安徽女佣，大部分是皖南地区个歙县、休宁等地个人，搿可能是抗战时期上海一批商人富贾、工厂老板、文化人士咾啥，为避战乱而暂时移居到此地，带来了暂时个繁荣。像屯溪老街当时就有“小上海”之称。当地山区地少人多、物质条件比较贫乏，所以上海有钞票人家就勒此地雇佣了大量本地人做女佣。抗战结束之后，伊拉又随牢东家一道到上海，继续服侍主人了。辰光长了，又拿同村个亲朋好友一个个介绍到上海来做女佣，最终勒上海形成了“安徽帮女佣”，一直到现在。安徽女佣勤劳朴实，任劳任怨，能够吃苦耐劳，生活饮食习惯兼顾南北方，只有卫生习惯以及文化谈吐方面比浙江女佣稍微推板一眼。
苏北农村个劳动妇女刻苦耐劳，身体壮实，本来是最合适做女佣个。但是，上海老少有人家雇苏北女佣个。除脱仔对苏北人有偏见之外，更多个原因是苏北妇女比较豪爽，直肚肠，勿合适低声下气勒人家屋檐下头做保姆。伊拉宁可当工人、做倒马桶个清洁工，甚至到外国人屋里向去做“走做”。
搿就引伸出来了“走做”个形式。“走做”，就是现在个"钟点工"。曾有种讲法，讲"钟点工"是改革开放之后，生活节奏加快了，讲究务实再出现个新生事物。搿是错了个！上海有"钟点工"，起源于19世纪初。随牢仔租界里个外国商人越来越多，外国东家雇佣中国女佣也就越来越多了。西方人讲究个人隐私，讲究简单实在，勿像上海个有钞票人家，样样侪要掼派头。伊拉是能够简单就简单，能够节省就节省。所以，西方人勿习惯屋里向有一个搭伊拉呒没血缘关系、完全勿搭界个陌生人，因此，就出现了女佣每日天只做几个钟头个"走做”。搿种灵活实惠个做法，邪气快就勒上海，包括中国个白领人家流行开来了。
外国人对女佣做生活邪气挑剔，尤其是对地毯、银器、玻璃咾啥个清洁，侪邪气苛刻，所以劳动量老大个，一般体力个保姆根本勿能承受，只有身体壮实个苏北妇女能够胜任。从事“走做”个女佣只求工作保质保量，呒没介许多繁琐个主仆关系要平衡，再讲，外国东家也听勿懂侬洋腔八调个中国地方闲话，侬好话讲得再多，人家也是一头个雾水，只求侬做生活质量高，做好之后拿仔钞票就走人，干脆利落。搿种形式虽然辛苦，却也是邪气爽气个，交关适合苏北妇女直来直去个个性。所以，伊拉搭绍兴帮、湖州帮、安徽帮等女佣虽然同行业，但大家各做各个生活，互相勿来往，倒也相安无事。
因为勿包食宿，所以“走做”个工钿是按钟头计算个，往往比住家女佣要高一眼，搿也使得后首来“走做”个形式邪气有市场生命力，最终勒上海成为越来越受雇佣双方侪钟意个一种帮佣形式，并且一直沿用到现在。
往期回顾：
图：网络 / 编辑：渺渺如胭