老上海的茶馆（上）
沪语朗读：渺渺
老上海的茶馆（上）
来源：老有上海味道
作者：沈嘉禄
改编：郭莉
推荐：丁迪蒙
丰子恺先生有一幅好画。画面浪，靠窗一只台子，台子浪一壶茶，几只杯子，竹帘卷到一半，看得到窗外一轮新月。题了一行宋人名句：人散后，一钩新月天如水。但是搿幅画清净得空荡荡，倒是让我想到，如今，上海老茶馆里向个故事搭仔人情，包括老茶馆店堂个样子，还有多少人记勒心里？想起迭个，我心里泛起一阵惆怅。
进入互联网时代，传统意义浪个茶馆退出历史舞台是一种必然，但勒勒老百姓生活中留下丰富回忆个物事总归叫人觉着依依勿舍，迭个就是历史发展。对一般人来讲，常庄侪有说勿清道勿明个地方。
上海茶馆店勒清朝同治年间开始出现，当时有三茅桥河浜边头个丽水台、南京路浪个一洞天，福州路浪向有家叫青莲阁个茶馆也差勿多是伊个辰光建起来个。上海“旧闻作家”杨忠明考证后认为，丽水台是顶早个。伊还讲，当年店堂里向还有“绕楼四面花如海，倚遍栏杆任品题”搿能一副对联，可见是当时文人雅士、阔少富绅流连之地。“茶馆先推丽水台，三层楼阁面河开，日逢两点钟声后，男女纷纷杂坐来。”侬想想当年个闹猛！
欸个辰光，茶馆里还可以堂而皇之吃鸦片烟个。到了光绪年间，有个广东人勒河南中路一带开了同芳茶居，除了茶水还供应茶食糖果，早浪向还有鱼生粥，中浪向又有各种点心，到了夜里向，伊拉还卖莲子羹跟杏仁酪。后首来，同芳茶居对过又开了一家怡珍茶居，除了吃点心还卖烟、酒。广东人总归是蛮会得开一时风气个。
不过也有一眼老上海认为：上海个茶馆，应该从南市开始。除了年代久远个湖心亭，一直蛮有名气个茶馆还有“也有轩”、群玉楼、乐圃阆、船舫厅、鹤亭、四美轩、春风得意楼咾啥。
春风得意楼个名字大概是从唐诗“春风得意马蹄疾，一日看遍长安花”里向来个，蛮有讨彩头个用意，其实，伊本来叫“宛在轩”。因为伊立勒荷花池当中，周边景色怡人，所以从《诗经》“宛在水中央”得到了迭恁个美名。搿家老茶馆是光绪年间开个，因为屋宇敞亮，又好凭栏看景，到城隍庙个香客，还有来许愿个妓女，也要到此地吃茶休息，搿副腔调放勒四马路浪个青莲阁当然勿足为奇，但是，勒相对保守个老城厢就引起了交关讲争，再加老茶客哄传，结果城里个保甲总巡大人就勒光绪廿四年元宵节前头一天，以茶馆男女混杂，有伤风化为名，派仔一帮团丁，拿春风得意楼查封了。乃末精明个老板要紧花费三百两纹银打通关节，总算几天后又恢复营业。不过茶馆从此改变经营方向，想尽办法招徕各种客商到茶馆来谈生意，茶馆赛过演变成交易所或者公所了。每天从大清老早开始，头戴瓜皮小帽个布业、豆业、钱业、糖业咾啥各色各样生意人进进出出，络绎勿绝。
老茶客到茶馆，落座也是要有功架个。要茶勿开口，用手势表示：食指伸直是绿茶，食指弯曲是红茶，五只指头骨（指，音同节）一道弯一弯是菊花，握拳头是玳玳花，伸只小指头，就是白开水了。茶馆里向还有一套行业切口，譬如：茶叶叫“淋枝子”，客人叫“年子”，一般人也是完全听勿懂个。伊歇辰光个茶馆跟帮会侪有老深个渊源，搿种切口大概也是帮会文化个体现。
从前，上海各行各业侪欢喜勒茶楼谈生意，从晚清到民国，商界先后勒青莲阁、长乐茶园、一乐天、品芳楼、四美轩搿眼地方聚集。一洞天就是传媒行业个中心。混勒茶客里向个，还有一批大家叫伊拉“白蚂蚁”个人，伊拉就是专做房屋租赁生意个掮客，只要介绍成功一笔业务，就可以抽取租金个十分之一做自家佣金。看来伊拉好算是现在房产中介个“祖师爷”了，但欸个辰光上海市民叫伊拉“白蚂蚁”，多少是有眼看勿起个。当然市场经济条件下，每一种存在侪有合理性，“白蚂蚁”多了，春风得意楼也就有了“顶屋市场”的别称。（顶屋就是房屋租赁）
清末民初，城隍庙市场拨了一条东西走向个豫园路划为南北两片，南片包括湖心亭、九曲桥、乐圃阆，跟内园一道合称庙园，北片沿路有得萃秀堂、点春堂、春风得意楼咾啥，是城里顶顶闹热个地方。一直到20世纪三、四十年代，春风得意楼生意一点点清淡下来，城隍庙茶馆里向个优势地位，慢慢叫拨湖心亭取代了。
本公众号最近发布的原创：