小馄饨、菜肉馄饨搭仔素馄饨（一）
沪语朗读：千杯不醉
朗读者
小馄饨、菜肉馄饨搭仔素馄饨（一）
作者：千杯不醉
改编：郭 莉
朗读：千杯不醉
推荐：丁迪蒙
说冷就冷个美国东部个深秋，早浪向勒勒热彤彤个被头筒里，懒洋洋睁开眼睛，微信有同学传来一篇“中国顶级馄饨大赏”，各地风味特色个馄饨大全，配了五彩缤纷个精美图片，邪气详尽，也实在是让我顿时精神头上来了。一面看，一面肚皮里向叽哩哇啦造反，涎唾水是嗒嗒渧！馋啊！
要讲馄饨，其实也并勿是啥高大上个物事，一般老百姓侪欢喜，又是比较容易办到个吃食。从前，迭个应该是老早老早个从前了，有人会得挑仔馄饨担穿弄堂叫卖个，也有人从楼浪向吊只竹篮头下来，买一碗馄饨当宵夜。不过公私合营以后一直到我来到迭个世界，搿能个场景也只好勒嘞老电影里、或者现在蛮时髦个怀旧小文章里看到了。江南人过日脚邪气细致，尤其文革十年，物资紧缺，样啥侪要凭票购买，呒没多少肉，又想吃眼像样个入味个物事，哪能办呢？就像搿歇辰光个红烧肉，肉呒没几块，搭头倒是交交关关，号称红烧肉其实是红烧罗卜、红烧洋山芋、红烧百页结咾啥，搭着眼肉味道罢了。葛末馄饨呢？呒没肉勿好吃，但是只有一眼眼肉个说话，哪能办呢？就做小馄饨呀！拿肉糜个味道调好，眼泪水一样个用竹篾刮勒薄如蝉翼个皮子浪，摊勒手心里，四只指头一挽一握，大姆指再一捏，一只文绉绉个小馄饨就裹好了。等镬子里水一滚，一把小馄饨撩下去，只看见伊拉勒嘞镬子里翻了几记，马上就熟了。金黄色个皮子裹了粉红色个肉馅，简直像着仔条裙子个精灵，对侬舞动招魂。拿一只青花瓷白底小碗，撒眼盐或者滴几滴酱油，一撮切得细细叫个蛋皮丝，一撮紫菜，一撮虾皮，一点点榨菜末，一小调羹猪油或者几滴麻油，乃末大汤小馄饨盛到碗里，竹筷一搅，上上下下馄饨雨露均沾，再来一把切得细细叫个葱花，搿是热气腾腾，香气扑鼻，要是再有眼胡椒粉，葛末一碗色、香、味俱全个小馄饨，就是到了嘴巴边头个美食啦！
我小辰光总归病怏怏个，特别会得伤风发寒热，要是寒热高，越加是啥物事也勿想吃了。有一趟生肺炎，发寒热难过得勿得了，眯眯糊糊拨阿姐推醒：小妹小妹！起来吃饭了！可怜我一眼眼精神也呒没，更覅讲食欲了。阿姐讲，尔奶问侬，荷包蛋要吃伐？我摇摇头；奶油切片面包要吃伐？我摇摇头；糖醋小排骨呢？我还是摇头。搿眼侪是平常辰光勿会得轻易答应个好物事，但是生病人既呒没精神也呒没胃口。列数仔几样好物事之后，阿姐讲，小馄饨要吃伐？我迷迷糊糊觉着阿姐已经勒嘞咽涎唾水了！大概我点了头，反正只听到阿姐一路小跑到厨房间告诉：“尔奶尔奶！小妹讲伊要吃小馄饨，我去买！”记勿清是一角还是一角二分一客小馄饨，不过就是十来只小物事，也并勿考究，既呒没蛋丝、榨菜，也呒没紫菜、虾皮，只有淡淡叫漂勒嗨几丝葱花个味精汤。但是热气腾腾，看得见红隐隐肉心个小馄饨，终归是病人可以乐胃消化，可以接纳个安慰餐啊！尽管迭碗小馄饨其实最后大多数侪是进了阿姐个嘴巴，不过生毛病个小囡想要吃个食品，犯难个尔奶总归还是爽爽快快满足阿拉个。
相比起小馄饨个简单便当，做大馄饨就要好好叫麻烦了。首先要确定做青菜肉馅还是荠菜肉馅？因为荠菜是时令菜，即使当令，侬也未必会买到，再讲挑脱烂叶去脱根，也是邪气费时费功夫个。所以上海人当年要吃碗荠菜馄饨，真个勿是一桩简单个事体，弄勿好还要一家门“倾巢出动”买汰烧，侬覅忘记，裹馄饨个肉馅子，也是要靠手工斩出来个。大多数人家侪情愿自己挑肥拣瘦买好肉，再自家一刀一刀斩成肉酱，搿种实实在在，心里踏实，叫做“过日脚个本份”。
点以下文字即有精彩回放：
图片来自网络