上海服务好，好在不流于表面
沪语朗读：刘时医
朗读者
上海服务好，好在不流于表面
原创：夜光杯
作者：沈轶伦
改编：郭莉
朗读：刘时医
推荐：丁迪蒙
我到福州路古籍书店去买书。柜台边头立勒一位顾客，原来伊刚刚买了交关书，拎勿动，准备邮寄回去，店员就过来帮伊捆扎。捆好扎好，乃末拿出笔墨砚台，只看见迭位店员毛笔在手，悬空手腕，端端正正勒勒外包装浪向写邮寄地址。知识分子腔调个买书人，一边看一边勿好意思讲，“师傅，侬个字真好看，比我写个好看交关。”店员头也勿抬，一边提笔回锋，一边讲，“迭个嘛，阿拉是勒书店工作个呀。”
我到陕西北路新开个哈尔滨食品厂买西点。夜快头，店里向生意蛮好个，几个上年纪个营业员阿姨忙得转起来了。柜台后头个一个小伙子就走过来招呼客人。伊邪气年轻，时髦发型，还戴了流苏耳钉，一副腔调跟迭家老派店家倒是有眼勿大相称。但是，我报出啥西点名字，伊马上快手快脚从冷柜里拿出来，人还没转过身，嘴巴里向已经报出总金额了。我付账，接过袋袋回转去，路浪向一阵阵香味道让我熬勿牢了，想要拿一只出来尝尝。但是手一摸，发现马夹袋里向个小包装侪是打勿大开个，再低头一看，原来小包装纸袋口是细心折成了三角形，然后再顺势收边封口个。记得小辰光，食品店个店员，侪是用搿种特殊个手法来封纸头袋袋个，自从透明胶带流行起来，搿种可贵个手艺好像已经失传了。有眼新开个面包店、西点商店，装点心个辰光，就是套只小塑料袋算数。要是买个人一路浪向公交车颠回去，可能是奶油饼屑已经散了一袋袋。真没想到，勒搿一个介年轻个店员手里，我又一次看到了搿种封口手法。过去叫人怀念个细节，原来还保留勒此地。
侪讲上海个服务好。但是上海个服务勿是好勒表面个。有常时，上海店员个服务态度倒是勿好个。譬如讲，侬走进一家店里，三三两两立勒海个店员冷冷淡淡对侬上下打量，勿像是欢迎，倒像是勒审查侬，搭侬打分。有常时，伊拉互相聊天，也好像勒存心冷落侬。
勒勒德大西餐社搿种地方点菜，阿姨级个店员一边听侬报菜名，一边会用笔勒台子敲，讲：“好了好了，介许多㑚是吃勿脱个，少点眼好伐？够了呀。”好像完全呒没推销菜品个意识。又譬如，勒真丝大王里向买料作，店员会得拍拍侬肩胛浪向个奘肉讲：“好去锻炼锻炼了，侬勿来事个，阿姨！搭侬讲，侬着迭个真是勿好看个，搿只颜色勿适合侬个！”也完全呒没一眼恭维上帝个意识。不过，言话讲回来，搿种待客之道，好像勿是介符合职业操守，偏偏倒是又有一种拿侬当自家人个派头。
搿种上海式服务，跟我勒伦敦看到个，露出六粒牙齿微笑个店员服务勿一样，跟我勒大阪看到个，一式势齐鞠九十度弓个服务也勿一样。迭个里向，有一种上海特有个市井烟火气，是一种上海文化语境下头，让侬心领神会个好服务。
再来讲只例子。我到南京西路茂昌眼镜店修一副太阳眼镜。眼镜螺丝松动，所以镜片落下来了。一位中年店员搭我维修，事体勿难，捻紧螺丝就可以了。但是呢，店员捻好螺丝并勿马上还拨我，还搭我仔细检查，登记型号，过脱几日伊打电话来告诉我，特意为我个眼镜配了胶水，可以滴勒螺丝浪，免得下趟又松动了。又过了几个月，伊提醒我路过辰光，去免费清洗一趟镜片。我问伊：“每个客人侪搿能拿自家眼镜维护得好好叫个，㑚还做点啥个生意啊？”伊笑起来讲：“大家眼镜用得适意，再是阿拉店家服务个初衷嘛。”
上海个服务，勿讲表面个虚头巴脑，就是搿能个实实在在，勒细节浪渗透到侬个心里去。
点以下文字即可听到精彩回放：
图片来自网络