早集
沪语朗读：友好
朗读者
早集
作者：陈广德
来源：当代精英文学
沪语改写：郭莉
朗读: 友好
推荐：丁迪蒙
适适意意个一夜天，勒甜梦做得开心个三更天结束了。从临街个窗口头，又听见了若有若无个一阵阵“踏踏踏踏”。哦，长远勿听见了，搿是故乡赶早集个脚步声呀！
搿搭叫做“窑”湾，是苏北个小镇。京杭大运河从此地流过去。古代辰光，运河里向有船家，船浪有纤，纤夫经过，常庄勒此地个几座砖窑，旁边歇歇脚、避避风。船家问纤夫，船要停靠勒啥地方，讲出来就是:“船，湾勒啥地方？”纤夫回答:“窑上湾！”乃末，“窑湾”迭个名字就搿能出来了。
船侪是夜里停靠，凌晨启程个。停搭仔开之间，卖吃个物事个、卖青菜个就侪借机会过来了，所以呢，就形成了早集，其实是俗称“夜猫集”个。再讲窑湾又有“东望大海，西顾彭城，南瞰淮泗，北瞻泰岱”个方位，正好勒南北水路个重要关口，当然就成为了搿个辰光少有个水、旱两用码头，引得伊歇辰光大大小小个商人老板侪朝搿搭跑，早集也就常年兴旺了下来，一直延续到了现在。
天还呒没亮，人老早就侪出来了，习惯成了自然。鸡叫声伴牢仔脚步声，脚步踏落了天浪个七星。勒灯火顶辉煌个地方，一声“来喽！粉条鸡蛋皮豆腐干！”，搿声音悠然而响亮，苍劲又亲切。多年个习俗是别有韵味个，一般人倒是也学勿像个。迭位老人姓马，双目失明，小镇却偏生就是勒伊个吆喝声里打只呵欠，睁开了眼睛。
人侪从四邻八乡来了。拎篮头个、挑担子个、推车子个、搭车乘船个……三个五个成群，连续勿断。落脚下来，板要到搿只摊头来喝一碗特有个皇家遗风——
相传，明太祖朱元璋小辰光家境贫寒。伊是大孝子，勿肯让老娘饿肚皮，就偷了大户人家个一只铁镬子，勿敢勒白天个集市浪向出卖，只好趁半夜里出门，扛了镬子到搿搭窑湾个早集浪向来，卖拨了一只烧辣汤个摊头，自家呢，也趁热吃了两碗辣汤。现在，此地块个小吃生意一直邪气兴旺，是勿是跟当年朱元璋曾经亲临小摊头有关？现在，搿种小吃叫做“麻糊”，是勿是因为搿只物事顶早个摊头就是姓马个摆出来个，一代一代传到了现在个？老人侪已经作古了，但是“麻糊”还勒海。一边回忆一边吃，细细叫个品品味道，还真就是当年个滋味。
靠近“麻糊”摊个旁边，一埭路里侪是小吃：烧饼、油条、小脆子，豆汁、热粥、豆腐脑，麻花、馓子、面蚕豆……侪各具地方特色，伊拉各挂一盏灯，各占一方地。杂乱但又偏生有秩序，杂乱偏生却是又有情致。
东方将白未白。古屋老檐浪个瓦松隐隐约约，抖抖豁豁，侪像煞要搭侬讲一讲小镇久远个故事。
人越来越多了，讨价还价个也多起来了。“几钿一斤啊？”“四角”，“再便宜眼嘛！”“好个呀，称点拨侬，反正是自家园子里种个……”老太太勿再还价，爽爽气气付了钞票就走。青菜是刚刚从田头摘下来个，清新鲜嫩，露珠晶莹；言话也侪是质朴淳厚，呒没一眼瞎三话四。就是勒几十年前个“文革”辰光，有人戴了红袖章，围、堵、拦、截，也勿曾改变此地个早集，迭个，就是跟文化个淳朴清新有关了。
童年辰光，我是顶欢喜到搿搭来荡荡，听听，看看个，常庄因为迭个，耽搁了自家个早读课。侬晓得伐，阿拉搿歇辰光读书，是要先去早读，做操，乃末再回转来吃早饭。早饭台子浪，就有从早集浪向端回来个一碗淳厚个“麻糊”，一碟清新鲜嫩个蔬菜。
卖鱼个开张要比蔬菜个晏一眼，必过倒是早集个高潮。此地依傍大运河，背靠骆马湖，水产鲜货是得天独厚。一声“鱼来喽”，引得多少脚步跟过来！从运河岸边小船浪卸下来鲫鱼、鲤鱼、青虾咾啥，侪是活蹦乱跳个，看搿眼鱼、虾新鲜个样子，简直相信，就是拨端上吃饭台子了，伊拉也一定还会得摇头摆尾。
早集高潮过脱，赶集个人也就侪散了，赛过退了潮。我慢慢叫沿牢鱼市场走到了运河大堤浪，一河浜个水，无风无浪，宁静安然。竟然觉着自家胸舒怀畅。勒万道霞光当中，河面浪向起一股雾气，朦朦胧胧个，好像是运河个心里有一股讲勿出个情绪勒勒荡漾。
哪能觉着有眼嘴巴干了？大概是刚刚吃“麻糊”个辰光，摊头主人忒热情，作料摆多了。乃末走到临街个茶摊头，要了杯热茶吃，问伊价钿，主人竟然讲伊认得我，自家人，勿肯收钞票。迭杯茶，真个是清香温热，实在是勿作兴一口头灌下去，板要慢慢叫、细细叫个品个。
要走了，心里倒是还想回头。恋乡、思乡个情潮越涨越高，终于是熬勿牢，有两篤眼泪水流下来了……
往期回顾：
图片来自网络