我的三本“流水账”
沪语朗读：于灵
朗读者
我的三本“流水账”
作者：马蒋荣
来源：夜光杯2019年7月9日
上海话改写：郭莉
诵读：于灵
推荐：丁迪蒙
“流水账”。葛末啥叫“流水账”呢？
《现代汉语词典》里是搿能讲个：①每天记载金钱或货物出入的、不分类别的账目。②比喻不加分析地罗列现象的叙述或记载。
我就有三种搿能个“流水账”，其中最长个已经有得51年了。
记录屋里向收支个流水账是1991年9月12号开始个。搿日天记录了阿拉夫妻两家头工资收入是347块。老实讲，本来我是勿记迭个账个。但是搿日天单位里奖励我一张万宝牌双门电冰箱个购买券，我偏生拿勿出迭个一千四百廿块洋钿。老婆半真半假问我：“哪能当家个？迭个几年阿拉省吃俭用，钞票侪到啥地方去了啦？”老婆喉咙一眼勿响，我倒是实在拨伊吓了一跳。还好我齐巧记了几笔大个支出：1987年动迁，搬场装修买家生用脱了两千多块；1989年买彩电用脱了四千四百块；1990年买录像机用脱三千三百八十块。就搿能，几年里向一万多块支出，屋里向老底侪用光，外加还借了眼债唻！
听我报出迭眼数字，老婆一声也呒没响。从此，我就多了只心眼，开始记录屋里向个收支流水账，搿能既对家庭有个交代，也是我自家个自律！后来勿晓得哪能一弄末，居委会一推荐，我记个流水账居然进入了上海市统计局个法眼，伊拉派专人，每半个号头到阿拉屋里来一次，抄录我个流水账。就搿能，我记个账连续五年作为统计局个一种采样数据。
2003年11月6号，我搭同事一道到厦门去旅游，开始记旅行流水账，一直坚持到现在。旅行流水账记个内容，有每趟旅行出门个辰光，乘啥个交通工具个，以及目的地个酒店地址、入住个辰光、房间号头咾啥。当然咾，到过个所有景点是板定要记个。迭眼流水账配上照片，我经常拿伊拉对照起来看看，重新品味旅行辰光个美景搭仔心情。
我从小就有写作个爱好，总归想勒退休以后，写本关于自家工作个回忆录。因此，从1968年11月12日，我参加工作个第一日天开始，我就每日天记工作流水账。少则几十个字，多则两三百个字。到我2009年退休回来，居然已经有了五十几本，大纸板箱里整整一箱了。
顶顶有意义个，是其中一本流水账曾经证明过一位干部个清白。迭个是1999年，从阿拉厂出去个一位老总，因为勒审计过程当中，发现伊有一笔二十万个资金，勒一段辰光里去向不明，乃末老总涉嫌挪用公款。伊是只记得好像勒勒1993年，跟我负责个一项工作有关，所以纪检人员寻到我来核实。我告诉纪检干部，我所有工作侪有“流水账”个，让我去寻寻看。结果真个勒勒流水账浪记载了搿笔资金是借拨阿拉用个。啥人同意、哪能进账以及还款辰光侪记得清清爽爽。乃末纪检人员马上复印了我个流水账有关内容。过了几个月，老总特地到厂里来，向我表示感谢！
现在，我每天还勒记各种流水账。尽管可能呒啥用场，但是每天夜里动动笔头，也是一种乐趣。有空个辰光，翻出当年伊眼流水账，对照对照从前个日脚，想想今朝个生活，更加觉着现在实在是蛮幸福个！
上海言话叙身边事体
吴侬细语吟诗词歌赋
往期回顾：
图片来自网络
欢迎关注本公众号