竹雪纷批桃花红
作者：林筱瑾
沪语改写：丁迪蒙
夹竹桃，勒我小辰光个记忆里向像煞是只吓人个妖怪。大人千叮嘱万关照，讲伊个花搭仔叶子侪老老毒个，一碰到嘴巴就会得中毒，拿人弄得半死勿活。伊拉常庄开勒弄堂人家底楼院子个角落头里，暗黜黜个叶子里向有得一种莫名奇妙个恐惧，花瓣里向还有得交关个蚂蚁勒爬，味道邪气刺鼻头个，我每趟路过伊下面侪吓得来逃得个快。
搿歇，已经人到中年，我住勒高楼大厦个小区里向，朝夕相伴个侪是眼大个乔木，像桂树、香樟、广玉兰、梧桐咾啥，交关辰光呒没看到夹竹桃了。原来，伊拉侪拨转到绿化带里厢，变成了低成本、防病害个最好个树种，起到减少二氧化碳搭仔净化空气个作用。
有一趟，我到荷兰去旅游，偶然发现伊面搭个交关人家勒勒进门个地方对称摆勒夹竹桃个盆景，哦哟，拨精心打理过之后，让人刮目相看，一个个侪是“竹外桃花三两枝”个好身段。更加想勿到个是，勒勒皇家园林里向，也可以看到伊拉堂而皇之个勒勒中心个位置，搭国内只好蹲勒高速公路、公园围墙旁边个待遇，真个是有天壤之别啊。
到百度浪向去一查，再晓得搿种妖搭搭个植物老底子是勒勒伊朗、印度、尼泊尔个，目前勒世界温带广泛种植。热天介到了，一树一树红白相间个夹竹桃花装点仔阿拉个城市，我又熬勿牢自家个好奇心，折下来一枝，带回来汏脱叶子浪向个灰尘，头一趟仔仔细细个看伊个花：团团花瓣是逐渐变色个，层叠个花型好像比单瓣花更加有味道，还有像鸟嘴巴一样个暗红色个花瓣，深深浅浅个过渡，老老经看个。叶子又尖又长，比竹叶还稍微修长一眼，表面浪向好像蒙勒一层蜡，一丝丝个叶脉也是清清爽爽个，有得一种几何个美感。勿得勿佩服夹竹桃花是天生丽质，唉，原来是介漂亮个一种花啊……
我突然之间好像懂了，为啥老底子人家种“妖怪”个夹竹桃个原因了。
夹竹桃个花期蛮长个，可以到三个号头，白个夹竹桃交关招摇、红个又含蓄内敛，常常成双成对像煞是要好个闺蜜。邪气欢喜勒勒中外环个路浪向开车子，看伊拉迎面飞奔过来个感觉，像一条条新娘子晒出来个红点子个绿被头，勒勒太阳下头开开心心个炫耀自家，又像交关个雪姑娘咯咯咯咯笑得来花枝乱颤。
搿群花姑娘个阵容搭仔气场侪忒大了，夏天里，压得来香喷喷得广玉兰侪迓迓叫个勿响了呀。
往期回顾：
图：网络 / 编辑：渺渺