故里春秋（九）
作者：朱海洪
沪语改写：边秦翌
沪语讲述：王幼兰
老底子，茶馆可以分广帮、苏帮、本帮。广帮个特点是早茶，就是“一盅两件”。一盅当然就是茶咾，两件么，就是两只小点心：叉烧包、蒸凤爪；
苏帮茶馆妙勒有得评弹好听。“当嗰哩嗰当，哩嗰哩嗰当”， 二郎腿翘翘，瓜子吃吃，茶吃吃，，邪气适意个；
本帮茶馆呢，特别实惠。天一亮就开门，老板只管自家生火烧水，茶客只管坐勒海谈山海经。开张了，堂倌潇洒个拿水灌到杯子里去，考究眼个，茶泡勒有盖头个杯子里，高头摆只橄榄；到了新年新岁，还摆只金橘，搿是店家个一番好意。
勿同个茶馆，规模大小也是勿一样个。
大个，像四马路“青莲阁”，三层楼，五、六开间门面；南京路“五云日升楼”，两层楼，四、五开间门面。
中等茶馆，一个层面，一般两三开间门面；假使是单开间门面，葛末楼浪楼下个也勿少。
小茶馆可以小到“老虎灶”样子，肯定是最最实惠个，一杯茶几分洋钿，随便侬坐。茶客呢，基本浪侪是街坊邻舍，瓜子吃吃、八卦聊聊、新闻讲讲、玩笑开开，直到野狐禅个乱说大书。老虎灶茶馆遍布上海滩个角角落落。
最最勿起眼个袖珍老虎灶，呒没茶馆可以孵，只好泡泡开水、汏汏盆汤。五、六十年代，新昌路“广泰”烟纸店边浪就有得一家。面对马路个灶台浪砌一只炮筒水箱供应开水，边浪拉块帘子，后头摆只脚盆，供浴客汏浴，俗称“卖盆汤”。
我小辰光去泡过开水，一分洋钿一热水瓶。老板蛮瘦个，一直笑眯眯个，只要冷风吹起来，伊个头浪向肯定会得戴顶碗型个绒线帽。看到张昌楣捧牢仔茶缸晃发晃发过来了，老板还常庄会得搭伊开两句玩笑，张昌楣就趁机借光接眼开水。假使搿家老虎灶还兼营茶馆，张昌楣也就勿至于跑到其他地方去孵茶馆了。
听人家讲张昌楣常庄勒勒茶馆说大书，我邪气好奇，特特为为到“长兴馆”书场去寻伊。“长兴馆”勒勒黄河路明星大戏院笡对过，只有一开间门面，说书勒楼浪。有日夜到，趁看门个勿注意我溜上去，想看看张昌楣是勿是勒勒搿搭说书。从路梯上到二楼，朝里向望过去，只看到靠墙说书个台子边头，一个长衫先生正好勒拍惊堂木、手舞足蹈讲得起劲，下头摆勒几排长凳，大家朝老老认真个听书，并呒没张昌楣个影子。
后首来我再晓得，张昌楣是从“三德里”穿过去个，伊其实是到成都北路去孵茶馆、说大书个。
成都北路，有眼特别个，伊是条区界线。路东属于黄浦区，路西就是静安区了，老底子还叫新成区。成都北路横穿山海关路菜场，所以来来往往人是邪气多个。
成都北路浪最叫得响个，是勒勒北京西路转弯角子浪个 “新长发”。迭是一家老字号，发源于上个世纪三十年代。
1931年，上海人钱富生夫妻勒北京路浪开了爿“新发兴果品店”，因为经营勿善倒闭脱了。伊拉勿甘心，就开始研制桂花糖炒栗子。到了1935年，钱富生拿“新发兴”改名叫“新长发”，除脱仔水果，还卖桂花糖炒栗子。伊个栗子因“规整、甜美”而一炮打响了。后首来，钱富生为独生囡儿搭仔女婿勒成都北路、延安中路浪又开出了“新长发”分店。“青出于蓝胜于蓝”，分店个桂花糖炒栗子外观溜溜圆个，色、香、味样样侪好，因此吸引了勿少顾客，伊拉侪是到附近光华大戏院、九星戏院、金门大戏院、巴黎大戏院、国泰电影院以及舞厅咾啥去看戏、白相个。秋冬时节，交交关关个人勒看戏或者散步个辰光，随手买袋热乎乎个糖炒栗子剥来吃吃。甜美香糯，口口相传，“新长发”栗子大王从此名扬上海滩了。
“新长发”附近还有眼名气个就是“富春茶楼”搭仔“富春书场”了。看上去是同名个“富春”，但实际浪，茶楼是茶楼，书场是书场，“桥归桥路归路”，吃茶、说书两勿干扰，是比较正规个。勿象张昌楣，孵勒老虎灶里吃吃茶、吹吹牛、说说书，侪混勒一道，搞勿清爽。
往期回顾：
图：网络 / 编辑：渺渺