邪气闹热个吴江路以前叫啥？
沪语朗读：渺渺如胭
作者：薛理勇
要探寻吴江路个过去，葛要从曾经个静安寺路讲起。
历史浪个上海是江南水乡，河流纵横、水渠密布。近代以后，随牢上海城市人口个增长、城市面积勿断扩大，交关河流拨填浜筑路，城市面貌发生了桑田沧海个变化，我伲只好勒历史文献搭仔地图浪寻到伊拉个踪影。
沪西个静安寺是座千年古刹、旅游胜地。勒静安寺个大门外头有一只古井。传说，古井搭江海相通，井水昼夜勿停冒泡，就像一镬子沸腾个汤水，就拨叫做沸井、涌泉。
近代以后，进入上海个外国人拿搿只井叫做“BubblingWell”，意思是“会吹气泡个井”，也就是“沸井”“涌泉”个意思，于是，静安寺拨外国人叫做“BubblingWell Temple”。古井旁边有条东西向个河浜，就拨叫做“沸井浜、涌泉浜”。
据记载，早勒1860年，沿牢涌泉浜开始修筑马路，是跑马使用个马道，英文名BubblingWell Road，也可以译为“沸井路、涌泉路”。由于搿条路直通静安寺，伊个正式中文名称就拨叫做“静安寺路”
20世纪以后，继续填浜筑路，部分残余个涌泉浜填平以后并进了静安寺路，其中有一段残余筑成了LoveLane，勿晓得外国人为啥拿伊叫做“LoveLane”，不过，伊个中文名字叫做“斜桥弄”。搿个斜桥是啥意思，又是哪能来个呢？
《同治上海县志·卷三·水道上》记载：“涌泉浜。以静安寺前沸井得名。有东、西涌泉，通东、西芦浦。”
历史浪个石门路是一条叫做东芦浦个河浜，勒斜桥弄有座跨东芦浦个桥，桥搭仔东芦浦勿是垂直个，是斜个，所以搿座桥拨叫做“斜桥”。
东芦浦勒20世纪初填浜筑路，大致浪相当于现在个石门路搭瑞金路。勒早期个地图浪还可以看到，勒现在个瑞金一路西侧，还有一段“东芦浦”个残段。西芦浦也是苏州河个支流，勒曹家渡引苏州河水向南流，部分河流就是现在个延平路，再往下个河段就难寻伊个踪影了。
涌泉浜以静安寺为界，东面个是东涌泉浜，向东流过现在个石门路；西面个是西涌泉浜，后来拨叫做“永源浜”，现在个“永源路”就是填永源浜修筑个马路。以前勒东芦浦个东面是斜桥总会，西面则是上海著名个“张园”。
于是，沿搿段东芦浦筑了一条小路，连接斜桥总会搭仔张园，勒东芦浦浪建桥，由于道路搭仔东芦浦并勿是垂直个，使得搿座桥看上去就是笡个，“笡”是生僻字，往往拨写作“斜”，于是搿座桥就叫做“斜桥”了；同样，静安寺路勒青海路个地方也有跨涌泉浜个桥，搿座桥也是“斜”个，因此，搿条小路也就拨叫做“斜桥弄”，一直到1943年，再拨改为吴江路个。
“斜桥”勒以后个填浜筑路过程当中消失了，不过“斜桥”作为区片地名一直使用了老长辰光，伊泛指斜桥弄附近一带。盛宣怀个住宅勒现在个南京西路成都北路口，伊个通讯地址就是“斜桥盛公馆”。
图片来自网络
往期回顾：
“上海言话讲起来”旨在传播沪语，若有不当之处，敬请留言指正。
感谢您的支持转发，欢迎关注本公众号