童言无忌笑外孙
沪语朗读：高仁
作者：陈党耀
修改诵读：高仁
推荐：丁迪蒙
外孙今年9月要读小学了，小家伙开口晏，两三岁辰光口齿还勿清，四足岁以后闲话开始多起来，一歇讲上海话，一歇讲普通话，常庄词不达意，只好童言无忌，让侬笑痛肚皮。
中班辰光，伊对家庭成员、老师、同学，会得根据自家个喜好或者亲疏程度分为四大类：好蛋、中好蛋、中坏蛋、坏蛋。祖母排到好蛋；爷娘是中好蛋、中坏蛋呢，要上下波动个；我对伊比较严格，伊到夜里评分，我属于“坏蛋”。有趟，我个丈母娘勒我屋里，我问伊：阿太是啥个？伊想了老半天，一本正经讲，中好蛋！阿太拍拍胸口讲：噢哟，我活了八十多岁，推板一眼落到坏蛋里向去了。
外孙对自家或者对人家常庄采用双重标准。伊要大人拿样物事，或者要调衣裳鞋子出去白相，就急吼吼：快点快点，雷厉风行来三伐！阿拉叫伊吃饭刷牙齿、拿白相干收起来，伊嘴巴里也讲“雷厉风行”，但行动却是笃悠悠慢吞吞，最后还伊来一句：晓得唻，心覅急呀。
外孙还会得一心两用。大人个对话尽管伊好像没听，但伊竟然记牢了。有趟，我搭妻子讲健身房一道锻炼个老搭档，伊个孙囡老乖个，常庄会讲爷爷侬辛苦了。勒旁边白相个外孙，隔忙头里入出一句：呒没搿种人个！
假使有闲话讲勿清爽，外孙就用唱来表达。我有辰光讲：侬做事体哪能老是拖拖拉拉个，侬看，阿拉饭侪吃好了，就等侬一家头；侬总归勿想汏浴，刷牙齿勿认真。伊一听，就唱勿晓得啥地方听得来个歌：我们不一样，不一样，不一样，每个人都有不同的境遇……大壮个流行歌曲让个小囡奶声奶气个唱，让人哭笑勿得。
前两年，伊放暑假到我屋里来，为让伊身体强壮眼，我搭伊捏背脊，每日天十分钟，伊开条件，要我边捏边唱歌。我同意，唱了丁是娥个《鸡毛飞上天》里一段；“从前有一个小姑娘”，我曲调勿变，歌词替换成为伊个言行举止，有眼记日记个味道。从此以后，每日天只要一合扑勒沙发浪，就盯牢我讲，要求歌词勿好重复。我只好搜肠刮肚边唱边想。后来，捏好背脊以后伊一个鲤鱼翻身，也改起歌词来，像模像样个拿兜兜改成外公，拿伊做个事体侪替换成我做个事体来，唱好以后，自家也穷笑八笑了。
外孙每日天早浪向听广播，夜里看电视新闻，雷打勿动，有辰光会得自说自话：“去年末垃圾分类，今年末新冠肺炎”，大人搞勿清爽哪能分，伊总归可以报出准确答案。有趟我问伊侬是啥个垃圾？伊嬉皮塌脸讲，是有毒有害垃圾。问伊为啥，伊讲，我皮呀。
假使自身利益受损，伊个戆脾气就一记头爆发出来，自尊心又老强，人家勿好揭伊伤疤。今年过年以后，因为疫情，伊大部分辰光侪勒我屋里。有日夜里看电视，我开个频道勿配伊胃口，就抢过遥控器关脱了，一歇歇伊又想开开来。我讲勿来三，是侬自家关脱个。伊生气了，拿遥控器掼了地浪。碎成两半爿，伊也呆脱了。我对牢伊屁股打了几记，伊边哭边讨饶。第二天早浪，屋里人搭伊分析吃生活个原因。伊只听了开头，就手一挥，哇啦哇啦讲：过脱了，过脱了，覅再提了。有辰光阿拉搭伊寻开心，拿伊做个推板事体讲，伊头一低，看上去老勿好意思个。讲，伊个辰光我还小，勿懂事体呀！大家哄堂大笑。几年磨合，伊基本晓得自家皮个底线搭大人个忍耐度。常庄讲：好汉勿吃眼前亏。因此就少吃了勿少生活。外婆有辰光问，㑚爸爸打侬痛呢还是外公打痛。伊讲：爸爸结棍，喔哟，要么就是一记麻栗子！
有辰光，我拿手机向伊讨教，伊点开屏幕，邪气快就弄好了，讲：迭个侬也勿懂啊？有辰光，我拿前两年买个玩具出来，提议做眼老底子白相过个游戏，讲只把听到过个故事，伊会得勒么生来句，“侬幼稚伐……”
幼儿园五月底要开园了，要送伊去伐，我想听听伊个意见。以一口回绝！过脱仔一歇歇，伊又来问，吕某某去伐？搿是伊最要好个女小囡。大人回答伊人家去了，伊就讲，葛我也去。
每趟看到伊无忧无虑个样子，我总归想，就让伊快快乐乐、健健康康个长大伐！
往期回顾：
图：网络 / 编辑：渺渺