大隐书局沪语诵读会
沪语朗读：冯济民
作者、诵读：冯济民
8月24日夜里，《"梦回老上海"沪语诵读会(二)》勒大隐书局举行。诵读会是由黄浦区文化馆搭大隐书局主办，嘉宾是上海大学副教授、沪语专家丁迪蒙。近百名沪语爱好者从上海个四面八方赶来参加，远个甚至是从闵行、松江来个。伊拉当中勿少是丁教授个粉丝，好朋友、学生、校友，还有一眼新上海人，甚至是外地人。有帅哥美女，也有老头老太，年龄最大个已经有73岁了。会场里向座无虚席，有些人呒没座位只好立勒海听。
我生勒上海，长勒上海，巳经讲了71年个上海闲话了，对上海闲话情有独钟。早勒2012年，我就报名参加了由长宁区文化馆搭上海人民广播电台"阿富根"节目举办个首届上海言话大奖赛，通过预赛、初赛、复赛、决赛，从四百多人中脱颖而出，杀进最后十五强，获得优胜奖。我还用上海闲话写文章，勒《新民晚报》沪语版浪登过6篇。我还写了10篇沪语文章，并诵读录音，再制作成音频上网，点击数已经有得一万八千多人次了，还有勿少热情个留言。我还为街道搭静安区行政执法局举办了上海话讲座。搿趟，我也应丁教授之邀参加了诵读会。
诵读会开始，丁教授先举办了一个小讲座，生动风趣个讲解了上海闲话个各种发音及其演变过程，指出了平常讲上海闲话存在个问题。大家侪获益匪浅，讲座深入浅出，引得大家笑声勿断。
接下来，共有16位沪语爱好者先后登台，诵读了內容丰富、具有上海风情个各种文章。有弄堂里向个木拖板，上海个点心、小吃，上海男人、女人、少女，上海小菜场、饭馆，石库门，马路风景咾啥。纯正个吴浓软语让人听了感到邪气亲切，会场掌声勿断。
我也读了一篇自家写个《拎了篮头拷酱油》。丁教授对大家个诵读作了指导搭点评，鼓励大家继续努力，勿断提高。
诵读会结束以后还进行了抽奖。一共有6份奖品，六十几个人通过手机发红包形式来抽。我眼快手快抢到了红包，得到了一本有丁教授写个并签名盖章个《听听说说上海话》。我老开心个。
第三次诵读会将勒9月14号举行，我还会得去参加个。
图片来自现场
往期回顾：
“上海言话讲起来”旨在传播沪语，若有不当之处，恳请留言指正。
感谢您的支持转发，欢迎关注本公众号