吃蟹（上）
沪语朗读：江继平
朗读者
吃蟹（上）
作者：周力
来源：老周望野眼
改编：郭 莉
朗读：江继平
推荐：丁迪蒙
秋意正浓蟹脚痒，吃大闸蟹个季节到了。
小辰光我并勿欢喜吃蟹，原因老简单个：肉少。相比起葱烤大排、红烧肉，蟹脚浪向一眼眼肉实在寒酸，再讲迭个辰光，蟹也勿是啥个稀奇物事。所谓“呒没比较就呒没伤害”，第一次体会到大闸蟹个美味，还是勒九十年代中期工作了以后，搿个辰光大闸蟹已经是身价百倍了，勿是寻常随便吃得起个了。有一枪，我个要好同学许大毛勒乌鲁木齐中路上班，公司楼下头就是有名个乌中菜场。有一日天，阿拉约好落班以后去扳扳小老酒，就勒乌中菜场买了几只蟹。为了节约成本，大闸蟹搭仔梭子蟹各两对。回到大毛屋里向，打开炉灶一蒸，镬盖一打开辰光就晓得了：梭子蟹跟大闸蟹根本勿好相提并论，闻闻味道已经相差十万八千里，覅讲吃勒嘴巴里了。从此大闸蟹个地位搭仔葱烤大排、红烧肉就算是等量齐观了，每年秋风一刮，板定要吃几只解解馋个。
葛末大闸蟹究竟有啥来由呢？吃大闸蟹又有啥个讲究呢？倒是值得追根溯源讲一讲个。
“大”“闸”“蟹”三个字，连勒一道是蟹个品种，分开来是蟹个品质，缺一勿可个。
先讲讲伊个“大”。吃蟹当然要大，小个叫螃蜞，腌了下酒倒是蛮好，但是伊勿好上台面。老上海有句俗语：“螃蜞裹馄饨——戳穿了”，可以裹勒馄饨里，可以想象螃蜞到底有几化大。但是，讲大闸蟹要大，也并勿是越大越好，河海之鲜吃个是个鲜字，身胚忒大个言话肉质就必然发木，鲜美度也就下降了。大闸蟹个大，从前讲究是一雌一雄配成一对，加起来正好一斤。老秤一斤十六两，雄蟹九两雌蟹七两，正正好好。换算成现在个分量，雄蟹六两勿到眼，雌蟹四两出头眼。搿能再好叫“大”闸蟹，否则意思总归要推板一眼个。
再讲迭个“闸”字，争议来了。有个老师硬劲要拿“大闸蟹”写成“大煠蟹”，读者看勿懂，还以为写了错别字。其实写成“煠”字当然有道理个。因为从前大闸蟹个加工法，勿是现在搿能蒸出来个，而是摆勒水里向烧个。“煠”，普通话发音类似于“炸酱面”个“炸”，发第二声。我怀疑原来就是一个字，后来放勒油锅里烧叫“炸”，放勒开水里滚叫“煠”，两个字从此就分道扬镳了。阿拉屋里以前加工大闸蟹就是用水煠个，后来也从俗，用蒸个方法了，吃起来口味其实呒啥大个区别。蟹从煠到蒸个工艺转换，我认为是跟大闸蟹个商品化有关。从前吃蟹侪是湖河浜里现捉，呒没人帮你绳捆索绑，一勿当心还会拨蟹个大鳌夹到。所以平常人家煠蟹，就是一塌刮子厾进
点以下文字即可听到精彩回放：
图片来自网络