小飞鱼搭仔水手长（二）
沪语朗读：疯疯兔
来源：童星艺苑
作者：毕健民
沪语改写：徐蔚华
朗读：疯疯兔
配乐：沉默是金
（二）水手长发现小飞鱼受困
小飞鱼拉飞呀飞呀，飞得邪气起劲唻，突然之间发现，前头情况勿大对头，一只大轮船朝牢伊拉呼啊呼啊个冲过来了，搿眼小飞鱼眼看就要撞到船浪去了。搿个辰光再想到要刹车末，已经是来不及了呀。一记头，伊拉侪“哇、哇、哇、哇”个尖叫起来：“轮船撞过来了，要撞到阿拉头浪了呀！”刚刚搿眼飞鱼个勇气，侪勿晓得拨掼到啥地方去了。
伊拉一只一只落勒轮船个甲板浪向，浑身是一点力气也没了。伊拉张大嘴巴，“哈、哈、哈、哈”个喘粗气，骨头是拨掼勒痛煞脱了呀。小飞鱼拉勒甲板浪，浑淘淘个，也勿晓得自家到底落勒啥个地方了。于是就拼仔命个喊啊叫个，不过呢，伊拉个声音再响末，大海里向个妈妈是根本听勿到个，也勿可能来帮伊拉个呀。搿个辰光，大家懊恼是懊恼得勿得了……，伊拉想到自家老是拿妈妈个叮嘱，当作耳边风，乃末苦唻！
海风一阵一阵个吹过来，发热个脑子冷静下来以后，飞鱼妈妈老底子讲过个闲话又勒勒耳朵边浪响起来了：“聪明又活络个小宝宝啊，娜勒空中飞个辰光，一定要眼观六路，耳听八方，海浪向个安全再是最最重要个，否则个闲话，出了事体就麻烦大了。”小飞鱼伊拉想到妈妈以前讲过个的闲话，顿时立刻眼泪水就嗒嗒渧呀，懊恼也来勿及了。只有一歇歇个功夫，伊拉就勒甲板浪向迷迷糊糊个睏着了。
大轮船装了小飞鱼继续勒勒“轰隆，轰隆”个朝前头开，天已经蒙蒙亮了。船浪个大胡子水手长，像平常一样老清老早个就碌起来了，介许多年数以来，伊已经养成了习惯，起来以后个第一桩事体旧是绕牢仔甲板兜一圈，一边走一边检查检查船浪个设备是否有异常个情况。伊搿搭看看，伊面瞄瞄，对甲板浪向个设备熟悉得就像屋里向任何一样宝贝，只要有一眼眼个问题也逃勿过伊个眼睛。
检查好甲板以后，伊一般会得哼勒伊首老个《水手歌》，去叫水手兄弟拉起来吃早饭。伊走啊走啊，突然看到有交交关关个小飞鱼躺勒甲板个一个角落头里，鳞光勒勒一闪一闪。“哇！介许多飞鱼啊，是啥个风拿鱼送到船浪向来个啦？”水手长想，心里邪气开心。伊虽然勒船浪工作了几十年，走南闯北，见多识广，但是阿，介许多飞鱼一记头落勒甲板浪还是第一趟看到唻。看样子，搿些小飞鱼已经蛮衰瘏了，嘴巴勒勒一动、一动、有气无力个样子。
超敏个眼睛是特别尖呀，伊看到水手长走过来了末，一记头就来了精神，伊用足了力道，拼仔命个扭身体，想让水手长能够明显个看到伊。
看看小飞鱼邪气狼狈个样子，水手长又好气咾又好笑，心里想，勿好马上放伊拉回转去，今朝要搭伊拉上一堂海上安全知识教育课以后再好放伊拉走。
图片来自网络
吴侬细语吟诗词歌赋
往期回顾：
“上海言话讲起来”旨在传播沪语，若有不当之处，恳请留言指正。
感谢您的支持转发，欢迎关注本公众号