我听“无线电”
沪语朗读：冯济民
朗读者
我听“无线电”
作者: 冯济民
朗读: 冯济民
推荐: 丁迪蒙
收音机，老底子上海人侪叫伊“无线电”个。伊勒我个生活里一直有得邪气重要个地位。伊搭我带来了蛮多快乐。
小辰光屋里个搿只“无线电”是我最欢喜、也是最搞勿懂个物事。交关辰光我一直以为“无线电”里真个有小人勒海唱戏。小辰光一个人勒屋里向，除脱仔看连环画，也叫小人书个，就是听“无线电”了。听里向搿眼听得懂或者听勿懂个节目。其中印象特别深刻个是少年儿童节目，觉着老好白相个，听得邪气开心。中央电台个“小喇叭”节目搭仔上海电台个少年儿童节目几乎是每日天必听个。从节目里向我了解了交关知识，懂得了勿少个道理，也受到了老多个传统教育。大人个节目呢，听了是似懂非懂个。不过大人喜欢听个苏州评弹咾啥从小就勒我个脑子里留下了深刻个印象。还有，上海滑稽、“说说唱唱”节目咾啥我侪老欢喜听个。一直到现在老了，我还是经常要听个。
长大以后，搭爸爸、姆妈分房间睏了。我个房间里向呒没“无线电”个，所以呢，我就自己动手，装了只“矿石收音机”。我爬到屋顶浪去装天线，勒自来水龙头浪接好地线，戴好耳机收听，用一根针从固定矿石个小洞洞里向伸进去，来调节音质。还有一种活动矿石，有只小柄可以调节音质个。自从有了矿石收音机，夜里向我就可以睏勒床浪向收听电台节目了。记得有掰能一段辰光，夜里10点钟有档“文学戏剧”个节目，经常会得播放一眼电影个录音剪辑，搿个是我最欢喜听个了，就好像勒看电影一样。
后首来又发明了晶体管收音机，大家侪叫伊半导体收音机个。勿但小巧，而且还可以勿要电线连接，收听节目个辰光可以拿勒手里向，可以走来走去。记得搿个辰光，单管个半导体收音机大概是10块洋钿左右一只，用一只耳机塞勒耳朵里向听个。我买过了一只，是我个“宠物”。后来，我又买了四管、用喇叭播放节目个半导体收音机。勒崇明农场工作了3年，半导体收音机成为了我个好朋友。收听广播节目也成为了农场邪气枯燥个文化生活当中个邪气美好个享受。当时尽管只有样板戏咾啥邪气少几只节目，但也弥补了勿少个寂寞。勒农场个宿舍里听收音机侪是公开个，从来勿是一个人单独听。而且，收音机侪是要勿带短波频率个，搿侪是为了避免有得“收听敌台”个嫌疑。要晓得，当时搿是一个勿得了个罪名啊！
退休以后，只要人勒屋里向，听广播节目成为了我生活当中个一个重要内容。我个主要安排是：清早6点钟，睏勒床浪听早新闻，一日天个天气情况、重要个新闻就侪晓得了。8点钟，听“说说唱唱”节目，搿是前一日天个节目重播，主要是上海滑稽搭说唱。9点钟，听“笑声与歌声”节目，主要听传统相声。10点钟，听“粉墨春秋故事会”节目。中浪向12点钟，有“吴曲乡音”节目搭“阿富根”对农村广播节目，搿是标准个上海闲话节目。我是一边听一边吃中饭个。下半日个3点钟，是“‘杨戏迷’与‘马大嫂’”节目，搿只节目真叫是妙趣横生。夜快头个5点钟，是“说说唱唱”节目首播，只要我人勒屋里，基本浪向也是每日天必定要听个。礼拜六个“滑稽档案”节目搭礼拜天个“老里八早”节目也邪气吸引我。
我不但听广播，还积极参与节目个互动。有辰光运道好，打电话进去回答问题，答对了有得奖励个。我曾经好几次得到过电台个奖励。奖品有兰心大戏院个星期广播戏曲会戏票，还有电台制作个精美笔记本。电台也邀请我去做嘉宾，接受电话采访，到目前为止我已经做过五次嘉宾了。主持人还为我制作了录音光盘，我可以听听自家勒广播里向个声音。我个亲朋好友听到了侪打电话过来祝贺，我邪气开心个。
自从应邀担任广播电视监听、监视员，我收听节目个辰光侪看好钟表，准备好纸头、笔，发现问题了就随时记录下来，再写稿子拨勒电台个总编室。我写个节目评论稿经常拨总编室办个“监听监视周报”转发，还曾经拨评为先进。
收音机也寄托了我对姆妈个爱。姆妈活勒海个辰光欢喜听收音机里个节目，特别是夜里向睏勿着，经常会得收听“相伴到黎明”搿只节目。爸爸、姆妈金婚搿一年，我搭弟弟送拨姆妈个礼物，就是一只进口个高级半导体收音机。我第一次出国到日本，花了1万多日元，相当7百多元人民币搭姆妈买了一只原装SONY高级半导体收音机，姆妈邪气欢喜个，一直用到伊去世。现在，我送拨姆妈个礼物成了姆妈留拨我个纪念品。我看到掰只半导体收音机，就会想起亲爱个姆妈！
点以下文字即有精彩回放：
我是海洋
微信群和咖啡馆
我是土地
我是花
我是水
潘家姆妈
图片来自网络