起蓬头

沪语朗读：王莹

起蓬头

作者：郑自华

沪语改写：丁迪蒙

诵读：王莹

起蓬头，勒上海言话当中常庄用勒商场浪向，表示客流一下子增加，生意好起来了。起蓬头个辰光，就是老板最最开心个辰光。不过，搿个起蓬头里向是有得大学问个。

朋友邹君，文化程度勿高，勉强混个高中毕业，早早就进了商业部门，先是做营业员，每日天拍半身照（上海人叫立柜台为拍半身照），因为伊年纪轻、比较好学，先是做了柜组长，以后又做了段辰光采购，几年以后，就做店经理了。伊勒生意浪向的确是有一套个，公司下头有勿少商店，因为各种原因，侪勿断亏本，拿邹君调过去，勿出半年，就旧貌换新颜了。伊最大个本事就是可以起蓬头。按照邹君个解释，搿个起蓬头，是要人为个去制造个，要勒合理个辰光，合理个地点，运用合理个方式搭仔合理个手段，再加上合理个商品，来制造高潮。

邹君个商店勒一个公交车站个附近，一般到了下半天4点钟以后，伊就要来制造蓬头了。迭个蓬头，勒勿同个季节要有勿同个内容，譬如，中秋节前头，商店拿自家做个月饼推勒前头，邪气大个广告写：“鲜肉月饼，刚出炉”，一边让营业员哇啦哇啦叫，刚刚下班个人，拨月饼个味道吸引，就来排队买月饼了。等到有十几个人排队了，做生意个速度旧明显放慢了，搿能一来，排队个人越来越多，队伍呢，越排越长，排队个人拿头颈伸得老老长。看见已经有几十人了，伊个速度又加快了。邹君讲，搿叫“欲擒故纵”，顾客侪有种期盼心理，对搿种心理，要掌握分寸，辰光忒短，顾客勿过念头，认为勿值得；辰光忒长，失去耐心，就会流失。所以，做生意要耳听八方，眼观四方，掌握上海人个从众心理。搿个蓬头一起，带动其他生意。伊个店是中型个食品店，于是呢，店堂里向就轧满了人。

勒邹君个手里向，可以起蓬头个道具实在是忒多了，除脱仔月饼，水果、饮料、碎饼干老沙侪可以个。关键是，戏法人人会得变，但是各有巧妙。

公司组织大家来取经，回去照搬个有，但就是起勿了蓬头。所以啊，有人讲，三年学得成秀才，三年学勿成生意人。为促销商品而“起哄”，“造声势”，“摆噱头”，用文艺圈子个言话讲就叫做“弄点话题”，吸引眼球，还有“倒蓬头”，倒起哄，喝倒彩，帮倒忙，效果是适得其反呀！

精彩回放：
宋词赏析     如梦令·常记溪亭日暮
少年游         柳永
拎只猪头好过年
同老相怜
青玉案·元夕
春节，上海人勿吃饺子吃年糕
归彼大荒（下）
归彼大荒（上）

图片来自网络