上海科学会堂的老房子
沪语朗读：邵名和
朗读者
来源：新民晚报
作者：薛理勇
上海话改写：郭莉
诵读：邵名和
上海科学会堂搭仔上海复兴公园，侪是上海个地标建筑。最近，上海科学会堂老洋房又公布为全国重点文物保护单位，乃末名气越来越大了。
顶顶老早上海法租界个西边路界，勒勒一条叫做“周泾”个小河浜东岸，迭个地方差勿多就是现在个西藏南路北端。1900年，法租界扩张，西边界延伸到现在重庆中路搿搭。迭个一年，爆发了义和团运动，战火蔓延到长江流域，英、美、法等国家以“保护侨民利益”为理由，准备派遣兵舰进入长江，当时个上海道台余联沅只好跟列强签订了《东南互保条约》搭仔《保护上海城乡内外章程》，明确了上海及长江流域各自负责保护个区域以及责权，规定租界由“各国巡防保护”，其实就是允许外国增派驻军，保护租界。当时，上海租界面积勿大，乃末外国人趁机申请，勒勒原来租界外头个地方建立兵营。
法国兵营勒勒“八仙桥外国坟山”西面，原来是一个叫做“顾家宅”个自然村落，所以也叫“顾家宅兵营”。法国军官陶尔斐司还指挥修了连接兵营到卢家湾路，也就是现在重庆南路个一条小路，搿条路就叫做“军官路”或者“陶尔斐司路”，也就是现在雁荡路以东个南昌路。
1901年，《辛丑条约》规定，外国驻军必须遣散、撤离，法租界公董局就向上海道台申请，想买下搿块土地，造一只法国公园。上海道台认为，废弃个兵营也派勿上用场，所以邪气爽快个同意了。公董局就开始大兴土木建造公园，到1909年造好对侨民开放，外国人叫伊“FrenchPark”，中国人叫伊“顾家宅花园”“法国花园”。1943年，改名叫“复兴公园”。
1911年，有一个叫做“环龙”个法国飞行家，到上海来做商业性飞行表演。啥人晓得飞机勒勒跑马厅上空机毁人亡。一年之后，法租界公董局就勒勒法国花园里建立了“环龙纪念碑”。还填脱一条小河浜筑路，路名叫“环龙路”，迭个就是现在雁荡路以西个南昌路一段。
勒勒建设法国花园辰光，公董局预留了花园北面一块24亩大小个土地，1904年，以公董局董事会成员为主，联合上海法国商会以及社会名流组织了一个社会团体，中文名字是“法国球场总会”或“法商球场总会”，也叫“法国总会”。法国总会主建筑坐北朝南，大门开勒环龙路浪向，建筑个南立面，正好面对大草坪，草坪又分割出几只网球场，大家可以勒勒房子阳台浪看网球比赛，南面还有竹篱笆齐巧跟花园分割，当然，是有小门相通个。
1907年3月，外滩22号德国总会揭幕；1910年，外滩2号个英商上海总会新楼落成。伊拉美轮美奂个建筑，典雅豪华个装修，精益求精个设施，侪让法国人望尘莫及。1917年，公董局法国建筑师万茨、博尔舍伦主持了对法国总会建筑个扩建。扩建工程原则浪保留了原来个建筑，东西两侧又加建了新建筑，整个建筑东西长度达到了130多米。主楼中轴线个两翼对称，中轴线加建了钟楼，还有朝前伸出去个露台，两边屋面盔式折坡，也就是所谓“孟莎式屋顶”。搿能比原来个建筑立面就更加气派、更加豪华了。
法国总会大门勒勒环龙路，进门就有宽敞个扶梯通到左右两侧，扶梯个铸铁栏杆，是用字母C.S.F.组成个图案，也就是“法国球场总会”个缩写；大门面对朝南个彩绘玻璃大窗，彩绘玻璃浪向还可以寻到法文标记，写个是“土山湾工艺局”，看来，是跟土山湾工艺局定做个。迭个大概是上海唯一已知个、有标记搭仔制造年份个土山湾工艺局生产个彩绘玻璃，伊个文物价值自然就特别高。
中轴线两边个底层、二层，有宽敞个走廊，分别设置了法式桌球、英式桌球、大弹子房、酒吧间、舞池、击剑房、更衣室、大餐厅咾啥。搿能一来，法国总会规模、设施以及建筑样式，就完全可以跟外滩个英商上海总会、德国总会媲美了，所以改造以后个法国总会，就成了上海法国侨民个骄傲。
1949年以后，法国总会先是做了上海市文化局个办公用房，1957年改成科技工作者活动场所，陈毅市长题写个“科学会堂”四个大字，镌刻勒大门口，1958年，上海成立了上海市科学技术协会，“科学会堂”顺理成章成了科技协会会所，知名度越来越高。
科学会堂经过多次修缮。特别是2010-2012年，由上海建筑设计大师唐玉恩，带领历史建筑保护设计院，担当了保护修缮个设计工作。唐大师先后主持过交关老房子个修缮设计，包括外滩个英商上海总会、沙逊大厦，侪是勒勒伊支持下完成个。法国总会老房子修缮，经过无数次讨论、评审、修改，勒勒尊重建筑原结构形式个基础浪，拆脱了后来加建个一眼建筑，参照历史图纸，又根据实际使用需求，恢复了宽敞个大空间格局，针对科学会堂实际使用，整个建筑划分出对外会务、展示、接待等等公共空间，以及内部办公空间，使历史建筑保护搭仔合理利用有了完美结合。科学会堂个迭个保护修缮，获得了上海以及全国个交关奖项。2019年，“科学会堂”个老房子又公布为全国重点文物保护单位。从迭个里向，大家也可以清爽看到，善待历史建筑、保护历史建筑、合理使用历史建筑，是现在邪气重要、邪气必要个一项工作。
图片来自网络
上海言话叙身边事体
往期回顾：
“上海言话讲起来”旨在传播沪语，若有不当之处，敬请留言指正。
感谢您的支持转发，欢迎关注本公众号