解放前个石库门天井

沪语朗读：顾天虹

解放前个石库门天井

作者：申涛

改编、推荐：丁迪蒙

朗读：顾天虹

天井，住过石库门个人或许侪搭我一样，对小小个天井有挥之勿去个深刻记忆。

天井四周墙壁浪粘了厚厚个青苔，有常时会有只小蜗牛勒上头悠闲个爬动。地浪向，四四方方、整整齐齐个石板个缝隙当中钻出几棵青嫩个小草。墙落头勿晓得啥人家个花盆里有几朵小红花静悄悄个勒开。记忆当中个天井别有情趣，幽幽叫透出一股老上海个弄堂风情。

侬立勒天井里，有常时辣末生头会有冷嗖嗖个水滴勒头颈骨里向，抬头朝上望，原来是楼浪厢房间个张家好婆老清早起来晒衣裳，风一吹末，水就滴下来了。灶披间个老克勒搭客堂间个阿七头正巧勒天井旁边摆仔棋盘，杀得是难解难分呀。一群小姑娘勒拉天井当中跳橡皮筋，阿六头搭仔只“小戆大”呢，勒拉边上侬推我，我推侬，存心搭伊拉捣蛋。害得一帮仔小囡勒拉哇哇叫：“寻死啊？侬只戆大！”

天，突然之间暗下来了，辣生头里闪过了一道霍险，一阵雷声勒天井个上空炸开来，暴雨“哗啦、哗啦”像倒下来了一样。楼浪厢房间里有人靠勒窗门栏杆静悄悄个朝天井里个积水望。突然之间，又是一道闪电从天井个上空划过，又是一声拿人个耳朵也要震聋脱个霹雳，哇，介大个雨啊！

慢慢叫，天浪向个雨停脱了。哟，太阳也出来了呀！天井里响起了小囡个欢笑，哦哟！原来，天井个上空横勒一道斜气好看个彩虹唻！

住勒石库门里用勿着出门，抬起头就可以看到搿能介漂亮个风景，勿得勿说搿个是天井个功劳。要是书生气一点个来形容，天井真是只天人合一个平台。

一歇歇功夫，天井又开始闹猛了。

“张家，电报！”“爷叔，是啥地方打来个？”“香港！”

“后厢房沈家敲图章！”“啥个事体啊？”“㑚儿子个汇款单来了。”“噢，来了，来了，侬等脱一歇哦！”

要是豁胖一点，天井就是“街道办事处”；要是讲勒小一点抹，天井是只“传达室。”

“金锁，银锁，格勒勒勒一锁，摸着算数，就是侬做……”

“报告大队长，外头有个小姑娘，面孔好像那额娘……”

“冬瓜皮，西瓜皮，小姑娘赤膊老面皮。”

“小弟弟小妹妹跑开点，敲碎玻璃么老价钿……”

侬听听看，搿能一来，天井是啥呢？天井又是只小囡嬉笑、打闹个游乐场。

吃夜饭个辰光到了，灶披间个王夹里已经勒勒天井里向摆好了小台子，台子浪向个红烧肉香味道一阵阵飘出来，邪气馋人个。亭子间个老宁波脚浪向拖仔双木拖板，一路浪“踢踏……踢踏……”走过来，一只手拎仔瓶老酒，一只手托仔包熟食。伊个儿子叫起来了：“阿拉也要吃老酒！”老宁波眼乌子一弹，“小鬼，冒搞，介小小顽吃啥老酒。诺，拿八分洋钿去，自家去买瓶桔子水吃吃！”乃末，摇身一变，天井又成为众人个吃饭间了。

吃过夜饭，前楼个老李还是老规矩，到辰光板定要搬只椅子坐勒天井个角落头里，翘起伊个二郎腿拉起二胡来。悲悲切切个曲调勒天井里响起来了。慢慢叫传到了整个弄堂里，伊拉个，是瞎子阿炳个《二泉映月》。

年夜头到快了，天井门口翁进来一群叫花子，一边“噼里叭喇”头浪脚浪打莲湘，一边唱小调：“正月里来呀，梅呀梅花开，老板呀祖上积德，元宝滚呀滚进来……”假使侬勿是爽爽气气摸出两钿来，下头个唱段就勿好听了，㑚祖宗八代侪要拨伊骂一遍了。总算用铜钿哄走了叫花子，门口头又来了个游方和尚，上身赤膊，胸口个奶头肉里穿了根老老粗个铁杠，上头连牢一根又长又粗个铁链条。走起路来，磬灵哐啷乱响，吓煞脱人！一群小囡侪吓得迓勒大人个背后头。大人一看，吓得豪扫摸袋袋“诺诺，快点拿去，多跑一家……”

顶顶触霉头个，是大年初一，天井里开门炮一放，大门一开，只看见地浪向有只蜡烛包——一个死脱个小毛头。哦呦，乃末真正是作孽呀！

搿个，就是解放前个石库门天井。天井，春花秋月、饮食男女，喜怒爱乐，悲欢离合……天井，迭个小小个天地里向，有得多少个人情冷暖，包罗勒多少回味无穷个人间万象。

天井，难忘个老底子个石库门天井！

点以下文字即有精彩回放：

我有一个梦想
告化子吃死蟹——只只好
评弹票友写个淮海路（下）
评弹票友写个淮海路（中）
评弹票友写个淮海路（上）
我听“无线电”
我是海洋
微信群和咖啡馆
我是土地
我是花
我是水

图片来自网络