一吃就胖
沪语朗读：高仁
朗读者
一吃就胖
原创：李大伟
来源：夜光杯
沪语改写：郭莉
朗读：高仁
推荐：丁迪蒙
要讲胖个内涵，实在是邪气单一好：就是一身噗肉呀！
骨质增生，勿是吃出来个，而是磨损过度。吃得再多，骨头勿会得增加；吃得再少，骨头也勿会得减轻，虽然骨密度可能流失，骨头个分量还是勒勒个。
骨头也蛮有眼君子之风个——“不以物喜，不以己悲”，四季守恒，所以拨人家用来形容品质。面对权贵而勿媚：硬骨头！面对富贵而勿涎：有气节！节，就是竹节，呒没肉个。
肉呢，齐巧相反，一副贱腔，还勿如“易涨易退山溪水，易反易复小人心”呢，肉一旦沾到了侬身浪末，搿就只增难减了。
十五岁长骨，廿五岁长肉，三十五岁长膘，过脱仔五十，肚腩就要凸出来了。走起路来从此是摇发摇发，连得生活习性也跟牢变脱了：原来是弯腰缚鞋带，慢慢叫想要坐勒海缚了，最后呢，终于讨厌需要缚带子个鞋子，偏爱“一脚蹬”了，因为一只大肚皮横搁勒身体当中，人蹲得下去，弯勿下去了。从此各种警告，煞煞博博个扑面而来，啥个糖尿病咾、高血脂咾一类陌生名词赛过是节目预告，频频出现，整天绕牢勒耳朵边浪，频率简直是胜过枕边风。同时，还有一个特征唻：所有个预告侪属于警告，所有个警告又侪像是勒恐吓，所有个恐吓呢，又侪是高举了敌敌畏商标个！哪能办？一咬牙齿：减肥！
哪能减肥呢？首先，是夜里勿再应酬。不过迭个属于“坏朋友”行为。“坏”勒搿搭是动词，拿朋友侪去“坏脱”，相当于“断六亲”个“断”。我个生日是狗尾猪头，自然就是酒肉朋友多。酒肉朋友现在应该重新解释。过去是妻妾成群，陪啥人睏觉是关键；现在吃喝勿愁，陪啥人吃喝再是关键。眼前社会，啥人来比啥人请更加关键。寸金难买寸光阴，浪费自家辰光，陪人家讲笑话，陪人家解厌气，还要陪人家吃，吃下去交关排泄勿脱个油腻，身体里向积累了交关高血糖、高血脂个风险。陪人家吃老酒，勿断硬化自家个肝脏，还让自家个毛细血管塑化、变脆，中风猝死个风险是越来越高呀。陪人家吃饭、吃酒，相当于冒勒枪林弹雨去冲锋陷阵，就是勿断积累中风个风险，结局又是邪气个凶险：要末一了百了，要末没完没了。所以现在，酒肉宴赛过是鸿门宴，酒肉朋友赛过是刎颈之交，酒肉两个字，真个是试金石。
为了减肥，乃末请客吃酒改成吃茶了，清水光汤，从此酒肉朋友就变成了和尚。屋里向也坚壁清野，勿许零食进门，一家门陪绑，侪去做“居士”了。
对于减肥，我是下了狠心搭仔血本个。我买了踏秤，简直是像用来磅猪猡个落地磅一样。我拿伊摆勒卫生间，每日天起来，排空体内个一切，勿管是勿是大冷天，脱罩衫、脱绒线衫，甚至脱脱短裤，剥得比冬泳还要清爽：一丝勿挂，像只冻鸡，然后去过磅秤，分量精确到净重，一眼勿是毛重。
同时，还要:做到一“早上皮包水”，侪晓得茶是刮油水个；二“晚上水包皮”：勒自家屋里搭了一只木笼子，叫汗蒸房，像蒸鱼一样来蒸自家；还有三“皮搭皮”：大力士按摩，像揉面团一样翻过来揉过去，就差呒没举起来甩上去，像做拉面能介。后首来又听讲茶里向个茶碱，理论上是刮油个，但勒实践当中个作用是微乎其微，相当于“掸脱眼灰尘”“呵人家痒嘻嘻”，只不过是勿会长膘而已。汗蒸让侬失去个只是水分，勿是肉膘；大力士搭侬按摩，力气大得可能压断侬个脊梁骨，但是抮勿出油膘。乃末，减肥只好首先去戒荤腥，但是，戒荤腥最明显个效果是啥个呢？是上半日九点钟以后就开始倦搭搭了，夜里向一过十点就打瞌（目+充）。迭个就叫副作用。
至于聚焦严厉打击个肉膘，就像手机段子里讲个：世界浪最忠心个是啥？是膘！随便侬哪能甩也甩勿脱。搿则段子充满了苦大仇深，又是无可奈何。
我从85公斤跌到80公斤后，就再也下勿去了。因为每趟侪是齐巧要跌穿80公斤个辰光，板会得有一档一定是推勿脱个宴请。想想也嚇煞了：一碟搛一筷子，十只碟子就是十筷子。请客点菜，一人一只菜，一桌往往十五六位，就是十五六只菜，葛末至少要吃十五六筷子，搿是几化大个量呀？筷筷又侪是沾满了油脂！
饭店里个烹饪，素菜也要荤炒，还要配酒，粮食液化，饭后一肚皮个“五粮液”包裹勒鱼肉，等于一包肉馄饨。回到屋里勿敢睏觉，勒河浜边头来回个走，路过个电动车朋友纷纷别过面孔来看我，大概侪以为我是有啥想勿通了呢。减肥辛苦一周，一顿酒水就拿武功侪废脱了！
上了酒桌，就等于是上了贼船，酒气熏人，菜色馋人，勿吃嘛，久旱逢甘霖，止勿牢个馋唾水；吃伐，实在是后怕。上到酒水台浪，好比暗室里向光棍碰着了裸体女人，干柴烈火，金刚燃烧，真真是灵与肉个煎熬。减肥，简直就是勒反人类！
作为人，我是“等外品”：一吃就胖。一顿饭局，小肚皮就下垂，一连三天饭局，肚皮就从胸口开始凸出了。我对朋友摇头：“假使作为猪猡，我一定是优良品种，吃得少，长得快。”但是，我是人呀！所以减肥对我来讲，真个是特别个辛苦。当然也是有眼进步个，现在吃肉呢改成吃鱼了，不饱和脂肪替代了饱和脂肪。不过，我个体重还是呒没减下来，人还是像条胖头鱼，因为吃来吃去，最后吃进去个，还是脂肪！
啊呀，勿谈了！
往期回顾：
图片来自网络