鸟鸣桑葚紫
沪语朗读：陆海光
朗读者
鸟鸣桑葚紫
作者：陆海光
来源：夜光杯2019.7.12
上海话改写：郭莉
推荐：丁迪蒙
朗读：陆海光
江南梅雨淅淅沥沥落勿停。街头巷尾、地铁站头，总归好看见戴勒斗笠、挑勒水果担叫卖个水果摊贩。里向一眼紫红颜色水灵灵个桑葚，特别馋人。尽管蛮贵，我还是会得买上两盒。对桑葚，我好像是有一种挥之不去个情结个……
记得我3岁搿年，一家门从市中心搬到天山新村。勒勒我印象里，开头辰光老爹尔奶好像呒没跟阿拉住勒一道，后来大概是爸爸拿伊拉从老家接出来了。老爹尔奶来了以后，屋里向院子中央就出现了一棵搭人一样高个小桑树。迭个是勿是爸爸接老爹尔奶到上海，顺便从乡下带来，寄托自家个桑梓情深呢？已经呒没办法考证了。
冬去春来。小桑树勒勒院子里一年年往上蹿，主干越长越粗壮。每年春雨一滋润，看上去侪是翠绿油亮个桑叶。伊歇辰光，小朋友一大爱好就是养蚕宝宝，但是整个新村里桑树好像只有两棵。所以阿拉屋里迭棵桑树个“名气”慢慢叫传扬出去，交关养蚕个同学侪来问我讨桑叶。勒勒春天养蚕季节，每日天放学回到屋里，爬到树浪采桑叶，分配拨养蚕宝宝个同学，就变成了我个“课外作业”。当然我也邪气自豪，自家成了桑叶供应“大户”。有一趟，其他班级里个一位女同学，屋里向养个蚕宝宝“断粮”三天了，卖桑叶个小贩勿晓得为啥又呒没来，女同学急得要哭。吃好夜饭，伊拉牢伊拉姆妈，到阿拉屋里来“求救”。我搭伊采了足够蚕宝宝吃三天个桑叶，还关照伊：假使需要，可以再来采。过脱交关年数之后，有一趟勒勒公交车浪偶然再碰着搿位女同学，伊先认出我来，还搭我讲起了搿段童年往事。
记得是读四年级辰光个五月份，我勒勒窗口下头读书，偶然发现桑树浪向挂满了青翠个桑果，真像一串串微型翡翠葡萄。爸爸告诉我：迭个叫桑子，也叫桑葚、桑果、桑枣，名字有交关。伊会得慢慢变红，变紫，成熟辰光紫得发黑。江南乡下有一种讲法，新鲜个桑葚赛人参。伊能养眼明目，益肾护肝，滋阴息风利关节。
勒勒阳光雨露滋润下头，桑果慢慢叫转红发紫变黑，挂勒树浪亮晶晶个，像一粒粒饱满个黑珍珠。一清早，我会得拨叽叽喳喳个鸟叫惊醒，有个是芙蓉一样美丽个小鸟，有个是红嘴白腹黑背个大鸟。伊拉侪勒勒啄我个桑葚。伊歇辰光我还呒没保护鸟类个意识，只是可惜桑葚侪拨鸟吃光了，所以我拿出弹皮弓，想赶脱迭眼小鸟。爸爸讲，让伊拉去吃好唻，伊拉吃勿多个，因为桑葚吃多了，小鸟就会吃醉脱掼下来。我听了半信半疑，一直到自家读大学了，学到《诗经》里向“桑之未落，其叶沃若；于嗟鸠兮，无食桑葚……”，再回想起爸爸当初个言话，才晓得还真有搿能个讲法。
放暑假了！桑树浪向个桑葚一批批由红转黑。迭个辰光，楼上楼下小朋友侪会一道来参与一场“丰收采摘”。调皮大王阿康勒三楼，我勒二楼，阿拉一道用竹竿敲桑树。桑葚受到震动，像雨点一样落到地浪。左邻右舍小朋友要紧过来，拿桑葚拾到一只竹编淘米箩里。爸爸拿桑葚放勒老早准备好个盐开水里汏清爽，乃末一小碗一小碗分拨等得来馋煞脱个一帮小鬼头。
夜里向乘风凉辰光，大大小小个小鬼头，人人手里捧好一只小碗，轧勒一撮堆，津津有味勒勒品尝甜蜜个桑果，吃得来满嘴巴侪是紫红个浆水，实在是乐趣无穷。
现在，我每趟看到桑葚，脑子里侪是当年个美丽记忆。
上海言话叙身边事体
吴侬细语吟诗词歌赋
往期回顾：
图片来自网络
欢迎关注本公众号