过去个生活 / 四六文摘

沪语朗读：肖德生

朗读者

过去个生活

来源：国学精粹与生活艺术

作者：王安忆

改编：丁迪蒙

朗读：肖德生

有一日天，走勒上海虹桥开发区前头个天山路浪，陈旧个工房住宅楼下个路旁边，两个老太太勒相互打招呼。一个手里向拿了只小个钢种镬子，看上去已经有年头了，换了只底，盖头浪向有眼瘪塘。

老太对伊个老太说，烧泡饭个辰光勿当心镬子底烧焦了，要去伊面个工地浪，问人家讨眼沙子来擦一擦。两个老人勒讲言话，伊拉个身后头是开发区林立个高楼。

新型、光洁个建筑材料，以及抽象搭仔理性个楼体线条，就像一面巨大个现代戏剧个天幕。搿两个老人则是生动个，伊拉个生活是具体个，仔细个，伊个是过去个生活。

伊个辰光，生活其实是相当细致个，啥个侪是从长计议。

夏末、秋初，豇豆老了，即将要落市，价格也跟勒下来了。搿个辰光，勤劳个主妇就会得买来一篮头一篮头个买回来，拣好，汏清爽。然后，用针穿一条长线，拿豇豆一条一条穿好，晾起来，晒干。搿能呢，冷天介就可以烧肉吃了。用过个线呢，到清水里向淘一淘，理理顺，收起来，开年晒豇豆干个辰光好再用个。

缝被头个线，也是横个、竖个量准足了再剪断脱，缝到头浪向差勿多正好。拆被头下来汏个辰光，要一针一针个抽出来，再理顺，摆勒一边。被夹里汏清爽，晒干以后，就可以再缝。……

电影院里大多数是呒没冷气个，但是有得纸头做个扇子，摆勒检票口个木箱子里向。进去看电影个辰光，拿一把，出来个辰光，再厾回去，下一场个人可以再用。

搿种生活养育勒人生个希望，今年过了有明年，明年过了还有后年，勿是得过且过。勿像现在，到处侪是一次性用具，用过了事，今朝过了，明朝就勿过了。

搿能个短期行为，挥霍资源勿讲，还挥霍了生活个兴致，多少带勒眼“混”。

梅雨季节，满目花花绿绿个尼龙伞，却大多数是破旧个。或者是伞骨断脱了，或者是伞面脱落下来了，雨水从勿吃水个化纤布面上泻下来，伞呢，大部分蛮小个，伞柄也邪气短，人缩勒里向避雨。

老底子个伞，呒没现在个介鲜艳、好看，也呒没介许多花样：两折、三折，又有自动机关，“哗啦”一声张开来了。伊个辰光个伞，大部分是黑颜色个布伞，或者呢，是蜡黄个油布伞，比较大，邪气坚固，雨打下来滴勒伞面浪，声音也是结结实实个，啪、啪、啪。有种油纸伞，比较有色彩，却也是比较脆弱个，一勿当心就会得戳只洞。但是，油纸伞个木伞骨子排得邪气细密。

伊个辰光个人，用物事侪邪气爱惜个。不像现在个人，物事勿当物事用。

伊个辰光，用过个伞，侪要撑开、阴干了，再收起来。木伞骨搭仔伞柄，慢慢叫就像上了油一样，越是用久了就越是结实。铁个伞骨子，也绝对勿会得生锈。伞面假使破脱了，就会寻修伞个工匠补。伊拉个手侪邪气巧，可以补得服服帖帖，平平整整。撑出去，又是一把遮风避雨个好伞。

伊个辰光，工匠也老多个，还有补碗个唻!碎脱个碗，只要没全部碎脱，伊就有得本事对好，再打一排钉，可以一眼也勿漏。小囡白相个皮球破脱了，藤椅，藤榻，甚至是淘箩坏脱了，侪可以补个。手艺好个人有得多少啊！现在侪没了。结果呢，废品堆积成山。

现在个生活其实是要粗糙得多，大量个物质拨匆匆忙忙个吞脱了。伊个辰光生活，是细嚼慢咽个。

伊个辰光，吃是有限制个。家境好个人家，大排骨也是每顿一人吃一块。一条鱼，是一家门一道吃个。吃只鸡是大事体，带有隆重个气氛。现在呢，鸡是多了，搿大多数是从传送带浪啄食饲料个，呒没勒地浪向奔跑过，肉是松散个，味同嚼蜡。伊个辰光，豆腐侪是用卤水点个；绿豆芽吃起来老费时间，根须要一根一根去摘。现在个绿豆芽没根须，肥胖，吃起来口感也勿错，就是勿像绿豆芽了。

有日夜里，到一家常庄去个饭店吃晚饭，因为有事体，就只要了两碗冷面。搿个辰光，生意邪气好。老板搭仔伙计上上下下跑，送活蛇、活鱼拨客人检验，再拿转去，过脱一歇歇，就端上来了乎热滚烫个美味。就是勿搭侬上冷面，穷催八催也勿上来，硬劲拿人打发走。现在个做生意也是搿能个，做个侪是一趟头个买卖。勿像老底子，客人只要来过一趟，就面熟了，下一趟，已经可以搭侬拉拉家常。

店家靠个是回头客，搿再是日长世久个生意之道。勿像现在，今朝做过了，明朝就关门，后日，连个影子也勿看见了。生活，变得了没啥个指望。