阿拉小辰光个热天
来源：新民晚报
作者：赵妃蓉
阿拉小辰光呒没空调，呒没冰箱，呒没微信，呒没哈根达斯，不过回想起来还是小辰光热天最开心。
阿拉小辰光，路旁边个树比现在要高要大，一排梧桐树个叶子就好挡牢辣豁豁个太阳，下半天嘛总归要睏只午觉，地板揩清爽以后，勒拉地板上滚来滚去，老阴凉个，瞎适意。到了三四点钟，我就开始竖起耳朵听卖冷饮个叫声，伊个辰光冷饮侪摆了木头箱子里，用小被头捂起来，卖冷饮个人一边用木头敲箱子，一边叫“冷饮要伐？冷饮要伐？”我一听到迭个声音就激动得勿得了，马上从外婆手里要来零散铜钿，冲出去买冷饮。伊个辰光冷饮品种只有两三种，不过价细勿高，棒冰4分一根，8分已经可以买雪糕了，还有外面包一层巧克力个雪糕，叫紫雪糕，要两角四分，很少吃。
阿拉小辰光，热天吃得最多个实际上是糖番茄、黄瓜、西瓜这些天然个东西，番茄汏清爽，切成块，撒点白砂糖，拌匀，等半个钟头就可以吃了，酸酸甜甜又开胃，老好吃个。黄瓜嘛，更加便当，汏清爽就带着皮啃了，黄瓜有种清香，还有一丝丝甜味，老爽口个。
至于西瓜嘛，阿拉小辰光吃得比现在扎劲。热天西瓜上市以后，爷娘就会用蛇皮袋买一大袋搬回家，全部放了床底下。要吃个辰光就从床底下滚一只出来，先放了水盆里泡，或者放了网袋里用绳子吊放到水井里。为啥涅？因为老早呒没冰箱，所以只好用水降温。外头天再热，井水总归老阴凉个。
每趟西瓜捞上来个辰光，阿拉小人总归想白相白相水，大人看到肯定要骂。格个辰光，我总归勿懂为啥白相点水也要被大人骂，现在晓得了，因为井水温度低，大人是怕寒气进小人身体。
热天揩席子个辰光，一般会在水里滴两滴花露水，揩出来个席子又阴凉又清香。不过要是不等干透就睏上去，也是要被大人骂个，其实也是怕寒气伤身。现在回想起来，伊个辰光挨骂也是一种幸福呀！
也不知道是心理作用还是留了记忆里个总归是美好个，用井水冰镇出来个西瓜冰冰凉凉，清香爽口，比现在冰箱里个冰镇西瓜更加好吃。至于花露水个味道几乎是唯一到现在还能闻到个“老味道”，现在我有辰光就会把花露水做成喷雾洒了房间里，眼睛闭起来，就好像又回到了小辰光。前一阵看《欢乐颂》，里厢有句台词是嘲笑人家工资少个小姑娘嘛只好用用花露水，迭个编剧肯定勿是上海人，因为老上海侪晓得花露水老灵个，嗲得勿得了，迭个味道里有满满个童年气息。
往期回顾：
图：网络 / 编辑：渺渺