永福路52号的西班牙风格住宅 / 四六文摘

沪语朗读：渺渺

永福路52号的西班牙风格住宅

来源：上海城建档案

作者：薛理勇

上海话改写：郭莉

讲述：渺渺

上海西南个永福路，是条僻静个小马路，南起湖南路，北到五原路，全长勿足500米，迭个一带也是上海高档住宅区。是法租界公董局勒1930年修建个，当时中文名字叫“古神父路”。

古神父是法国天主教遣使会传教士，1813年勒法国出生，1839年派到澳门，伊个中文名字叫古伯察。清朝康熙、雍正辰光有“禁止外国教会活动”个要求，但迭个古神父无视大清禁令，勒中国北方生活了5年。1844年，中法签订《黄埔条约》，承认天主教是“劝人为善个宗教”，拨伊勒中国个合法地位。搿能一来，伊又跑到江浙一带传教。1852年回到欧洲，出版勿少介绍中国个专门著作，迭个对西方人了解中国以及近代天主教勒中国个发展，侪有一定个作用。

1930年齐巧是古神父逝世70年，公董局为了纪念缅怀伊个“功绩”，就拿搿条马路命名为“古神父路”。1943年改成了“永福路”。

永福路52号，是一幢有名个建筑。上海市城市建设档案馆编个《市历史文化风貌区（中心城区）》收录了该住宅个图纸，哈沙德洋行设计个。辰光是1932年造个。

上海字林洋行出版的《上海街道名录》里向可以查到古神父路52号个登记住户是“Mr＆Mrs R．Buchan”，还有“C·S·Tung”，也就是讲里向是“盘根夫妇”搭仔“C·S·Tung”，从名字来看，迭个C·S·Tung应该是个华人。

我查到个关于盘根搭仔Tung个资料并勿多，综合资料，可以晓得：盘根是美国商人，20世纪初到上海，担任一家叫友华洋行个美国经纪人公司上海分行经理，从事票据、金银搭仔汇兑经纪业务。还有个叫爱纶个美国人，1915年前后勒南京路开了爿“华革和服鞋行”，经营进口男女鞋子、袜子，还代理好几家欧美鞋厂个推销业务。勒盘根个计划鼓励下，1924年，盘根退出友华洋行，爱纶也卖脱华革和服鞋行，两家头成立了一家经纪人公司，从事票据、金银、汇兑业务，行址设勒九江路69号日商住友银行大楼里向。伊拉个公司呒没中文名字，根据英文翻译成“爱纶盘根洋行”，勒上海个外资经纪人公司里还是小有名气个。

C·S·Tung全名是董生同，外滩12号汇丰银行汇兑经纪人公所里向个经纪人，汇丰银行当时是外资勒中国个最大银行，中国外汇比价是由迭个机构确定个，就是讲，是以汇丰银行汇兑经济人公所当天公布个比价，作为兑换价个，盘根爱伦洋行是专做票据、金银、汇兑个经纪人公司，盘根乃末跟迭位董生同关系密切，还拿自家部分空余住宅提供拨董生同居住。

哈沙德洋行是美国建筑师哈沙德1922年左右创办个，一直勒四川路33号企业大楼里办公。1926年伊拉承担设计“华安人寿保险公司大楼”，就是现在个金门饭店，乃末名声大振。南京东路181号上海电力公司大楼也是伊1929年设计建造个。还有一眼主要作品，宁波路586号新光大戏院、华山路699号搭仔731号枕流公寓、四川中路33号企业大楼、南京西路150号西侨青年会大楼，就是现在市体委大楼，还有永安公司新楼等等。哈沙德洋行还承担设计了交关住宅，永福路52号“盘根住宅”就是其中之一。

永福路52号勒永福路搭复兴西路交叉路口个西北转角子浪，占地面积是2800平方米，门开勒永福路浪。主建筑勒地块北面，约270平方米，面前是老大个一块草坪，保存得邪气完好，跟原来个设计图纸基本一致，是幢西班牙风格个住宅。

建筑个主立面朝南，当中正门为中轴线，两侧是勿严格个对称，中轴线两边向外凸出，看上去当中稍高，两边稍低个五只连续拱券个门廊，两侧小拱券上头是平缓个坡顶，当中个三只拱券上头是二楼阳台；底层西端是用几根螺旋柱式装饰个五扇排窗，屋檐是红颜色筒瓦，底层个东端还有龛台，从原始设计图里好看到，龛台里向原来是有雕塑个。二层楼当中是三扇相连个落地长窗，窗门个边框也是用螺旋形柱式装饰个。

建筑个其他立面处理侪简洁、流畅，统一用拉毛墙面，搿使建筑整体跟欧洲中世纪个石构建筑邪气相似，次立面平淡简洁个风格，有效个衬托出了主立面个精致大气，勒上海现存个搿种西班牙风格住宅建筑中，安福路52号实在是精品。

20世纪90年代，我担任拍摄关于上海建筑个几部纪录片顾问，好几趟进入迭幢建筑。发现内装修比较奢华，底层个大厅赛过上海人个“客堂”，是整幢建筑个“公共空间”，也是主人个会客场所，地面侪是用个进口大理石，正中是一对雕刻精细个螺旋立柱，但是到了顶浪又改变成为古典综合立柱，确实带有西班牙或者阿拉伯装修个富丽、豪华风格。

1941年12月7日太平洋战争爆发，盘根夫妇被迫离开上海，后来个记录里就寻勿到伊拉个信息了。大概是勒20世纪九十年代伐，此地作为永乐电影电视集团公司个所在地。1999年，永福路52号被认定为上海市优秀历史建筑。