过年兜喜神 / 四六文摘

沪语朗读：钱明华

朗读者

过年兜喜神

原创：薛理勇

来源：上海门牌研究所

上海话改写：郭莉

朗读：钱明华

推荐：丁迪蒙

春节，顾名思义,就是春天个节日。古代是以“立春”作为春天开始第一日个，所以春节就是指立春。传统历法又是拿农历十二月最后一日搭仔正月初一作为交接日脚，所以正月初一就进入新年。慢慢叫到了后来，立春活动越来越淡化，新年活动越来越发展，再讲立春节气总归跟新年个日脚邪气接近，乃末立春意思个“春节”搭仔正月初一意思个“新年”就混为一谈了。

新年勒勒中国传统节日里向是最重要、最隆重、最祥和、最闹热个，也是延续辰光最长个节日。一般到了腊月廿三廿四就算开始过“年”了，一直要到正月十八落灯，“年”才算结束，整个新年活动有廿几天。当然，勿同时代，勿同地区，有勿同个新年风俗，迭眼风俗意义大多数也侪是根据“辞旧迎新”主题展开个。中国是历史悠久个国家，交关风俗产生于农耕年代，要是社会向工业时代、商业社会发展了，葛末旧个、传统个风俗就会出现变化，有个还索介变呒没了，搿种是老正常个。还有眼春节风俗，只勒勒妇女当中进行，反映出从前妇女对美好生活个追求。

今朝，阿拉就来讲一只从前妇女过年个旧风俗——兜喜神。

勒从前辰光，每年出一份年历，年历浪有“鞭打春牛”个图案，俗称“春牛图”。勒年历个右上方，板要印一幅八卦图，上头标勒新年个喜神方位，迭个就叫做“喜神方”，侬勿要小看迭个风俗，伊个作用勿小哦。譬如鲁迅先生《彷徨·长明灯》搿能写：“这屯上的居民是不大出行的，动一动就须查黄历，看那上面是否写着‘不宜出行’；倘没有写，出去也须先走喜神方，迎吉利。”每年正月初一老清老早，女人侪会结伴迎牢新一年个喜神方走，叫“迎喜神”。大家侪相信，正月初“迎喜神”会得搭自家迎来吉祥，沾上喜气。巴金名作《家》里向也搿能写：“（女眷们）到了街上，向着本年的喜神方走去，算是干了一年一度的‘出行’把戏。”

古代城市侪有城墙，城墙大多是方个，城里道路东西南北排列得也邪气齐整。但是上海个城墙是圆个，上海又是水乡城邑，城里街道曲曲弯弯，一出门就会得转向。所以“迎喜神”勒嘞上海叫作“兜喜神”，是勿是真个一直朝牢喜神方走过去，已经勿大重要，重要个是妇女必须参加搿能个风俗活动。“喜”个概念也邪气宽泛，可以指吉祥、幸福、开心、好事体咾啥。不过，民间又拿女人怀孕叫做“有喜”，还拿一种经过雌鸡孵化但是还呒没成熟出壳个鸡蛋鸭蛋叫做“喜蛋”，葛末勒勒“母以子贵”个封建年代，怀孕养小囡就是女人个头等大事。所以对女人来讲，“喜神”一般就是“送子罗汉”“送子观音”，“走喜神”“兜喜神”个主要目的、意义就是求子。当然，未婚姑娘么，祈求“喜神”保佑自家早点寻到一位好郎君，尽快养个小毛头；已经结婚个少妇呢，就是祈祷来年再添个小宝宝了。

欸歇辰光个《上海竹枝词》迭能写：曈曈旭日上红墙，多少佳人理晓妆。戚畹招邀浑不应，大家争赴喜神方。作者还勒勒下头加了注脚：“沪俗，阴历元旦有‘兜喜神方’之举。兜喜神方者，即从《历本》所指喜神所在之向绕行一周，所以取吉利也。实则醉翁之意不在酒，盖藉此招摇过市，可与异性接触也。”老底子上海妇女正月初一清早兜喜神风俗邪气流行。因为平常辰光妇女蛮少出门，正月初一介许多打扮一新个女子结伴出行，成了一道风景线，吸引交关男性眼球，有常时难免会弄出眼勿符合传统道德个事体。所以清朝道光皇帝辰光，上海知县黄冕曾经取缔过“兜喜神”，乃末事体稍微有眼控制。

兜喜神侪靠步行，迭个对小脚女人来讲，当然也是蛮艰辛个。后首来上海有了马车、汽车，兜喜神也就慢慢叫演变成了乘车子“兜风”了。一首《岁事竹枝词》迭能写：百年难遇岁朝春，择定何方有喜神。驾御汽车行驶过，风驰电闪避风尘。

到如今，“兜喜神”个风俗老早呒没了，就连得“兜喜神”迭个名词，也呒没几个人晓得了。

搿趟春节初一，侬阿准备出去兜喜神伐？