小飞鱼搭仔水手长（三） / 四六文摘

沪语朗读：疯疯兔

小飞鱼搭仔水手长

来源：童星艺苑

作者：毕健民

沪语改写：徐蔚华

朗读：疯疯兔

配乐：沉默是金

推荐：丁迪蒙

（三）搭小飞鱼上安全教育课

已经好几年了，水手长一直坚持海上安全第一个，迭个思想已经深深个扎勒脑子里了，一直是挂勒心浪向个。搿趟小飞鱼闯祸，就是个典型个勿安全例子，今朝搭伊拉上一堂海上安全知识教育课，是邪气有必要个，绝对勿好轻易放过。

伊存心偏好仔头，一边笑一边讲：“哈哈哈哈，哈哈哈哈，小飞鱼啊小飞鱼，娜搿帮捣蛋鬼，啥个地方勿好去白相，非要跳到轮船个甲板浪来做啥呢？搿搭是娜白相个地方伐？爸爸妈妈教育过娜伐？”

小飞鱼呢，本来认为水手长会得拨伊拉一些安慰，但是听到个是搿眼勿冷勿热个闲话，听起来还闲话里向有闲话，就更加伤心了呀，竟然一道哭起来了。伊拉哭出乌拉个讲：“呜、呜、呜、呜，老爷爷呀，阿拉勿是到甲板浪来白相个，是因为听到了‘轰隆，轰隆’个声音，勿晓得是啥个怪物事，忒紧张了，就拿，拿..拿妈妈以前叮嘱过个闲话侪忘记脱了！今朝真是触霉头呀！呜、呜、呜、呜……”

听了伊拉讲个事体以后，水手长语气转变了：哦，原来是搿能桩事体啊，葛我错怪娜了。其实呢，轰隆，轰隆个声音是轮船水下头个螺旋桨勒转动，伊发出来个声音，晓得了伐？勿要吓大轮船，伊也是娜个朋友呀，但是啊，勿好冲牢仔船飞个啊！”搿个辰光，小飞鱼再明白，大轮船也是飞鱼个朋友。

接下去，老爷爷继续讲了：“螺旋桨呢，是船个推进器，就好比是船个翅膀，假使呒没翅膀，船哪能开呢？真是勿动脑筋个。”小飞鱼拉听了老爷爷个闲话，对大轮船有了新个了解了。

辰光过去得老快，老爷爷还想讲点啥，但是小飞鱼已经交关辰光没吃物事了。肚皮饿得咕咕叫，啥地方还有心思听啊。伊拉搭水手长讲：“老爷爷，侬刚刚个教育，阿拉侪听明白了，现在请侬放阿拉回转去，好伐？”水手长觉着今朝个安全教育课起到了蛮好个效果，就清清嗓子，搭小飞鱼讲：“飞鱼小宝宝，海浪向个情况是千变万化个，随便啥个危险侪有可能发生，下趟假使再碰着大轮船，一定要看清爽大轮船开个方向，千万勿好再犯同样个错误了！大家侪记牢了伐？”

小飞听了，觉着有希望了，就大家一道讲：“老爷爷，记牢了，记牢了，阿拉以后一定记牢侬个现话，注意安全，谢谢侬，谢谢侬噢！”

水手长听了伊拉个回答，觉着老满意个，就拿伊拉一条一条个送到了海里向。小飞鱼“扑通，扑通”下水以后，老老开心个游起来了，伊拉唱了妈妈教个另外一只儿歌：

小飞鱼小飞鱼飞飞，

啥辰光侪好沉牢气。

张开翅膀覅胆小，

划过天空真美丽。

为了表示对水手长老爷爷个感谢，伊拉集合勒轮船个旁边，勿停个摇尾巴跳舞，一道唱歌，最后目送大轮船慢慢叫个开远，然后呢，就邪气快个游到妈妈个身边去了。